1Եւ դարձոյց զիս ընդ ճանապարհ արտաքին դրա՛ն սրբութեանցն՝ որ հայէր յարեւելս. եւ այն էր փակեալ։ 2Եւ ասէ ցիս Տէր. Ա՛յդ դուռն փակեալ կացցէ՝ եւ մի՛ բացցի՝ եւ մի՛ ոք անցցէ ընդ դա, զի Տէր Աստուած Իսրայէլի մտցէ ընդ դա. եւ եղիցի փակեալ։ 3Քանզի առաջնորդ իշխանն նա՛ նստցի ՚ի դմա ուտել հաց առաջի Տեառն, ընդ ճանապարհ կամարի դրանն մտցէ, եւ ընդ նո՛յն ճանապարհ ելցէ։

4Եւ տարաւ զիս ընդ ճանապարհ դրանն որ ընդ հիւսւսի յանդիման տաճարին. տեսանէի եւ ահա փառօք Տեառն լի՛ էր տունն Տեառն. եւ անկա՛յ ՚ի վերայ երեսաց իմոց։ 5Եւ ասէ ցիս Տէր. Որդի մարդոյ, դի՛ր ՚ի սրտի քում, եւ տե՛ս աչօք քովք, եւ լո՛ւր ակընջօք քովք զամենայն ինչ զոր ես ընդ քեզ խօսեցայց, ըստ ամենայն հրամանաց տանդ Տեառն, եւ ըստ ամենայն իրաւանց դորա. եւ կարգեսցես ՚ի սրտի քում զմուտ տանդ ըստ ամենայն ելից դորա, եւ ըստ ամենայն սրբութեանցն։ 6Եւ ասասցես ցտունդ Իսրայէլի տուն դառնացողաց. Ա՛յսպէս ասէ Տէր Տէր. Շա՛տ լիցի ձեզ առ ամենայն անօրէնութեամբք ձերովք տունդ Իսրայէլի, 7մուծանել ձեզ զորդիս այլազգիս անթլփատս սրտիւ՝ եւ անթլփատս մարմնով՝ լինել ՚ի սրբութիւնս իմ եւ պղծել զնոսա, ՚ի մատուցանել ձեզ զհացդ իմ ճարպով եւ արեամբ, եւ անցանէք զուխտիւ իմով ամենայն անօրէնութեամբք ձերովք։ 8Եւ ո՛չ պահեցէք զպահպանութիւնս սրբութեանց իմոց. եւ կարգեցէք զնոսա պահել զպահպանութիւն սրբութեան սրբութեանց իմոց։ 9Վասն այդորիկ ա՛յսպէս ասէ Տէր Աստուած. Ամենայն որդի օտարածին անթլփատ սրտիւ եւ անթլփատ մարմնով, մի՛ մտցէ ՚ի սրբութիւնս իմ. յամենայն որդւոց այլազգեացն որ իցեն ՚ի տանդ Իսրայէլի։ 10Այլ եւ Ղեւտացիքն որք հեռացան յինէն ՚ի մոլորել ժողովրդանն. որ մոլորեցան յինէն զհետ խորհրդոցն իւրեանց, եւ ընկալցին ըստ անօրէնութեանց իւրեանց։ 11Եւ եղիցին ՚ի սրբութիւնս իմ պաշտօնեայք բարապանք դրանց տանդ, եւ սպասաւորք տաճարիդ. նոքա զենուցուն զողջակէզս եւ զզոհս ժողովրդեանն. եւ նոքա կացցեն առաջի ժողովրդեանն լինել նոցա ՚ի սպասաւորս. 12փոխանակ զի էին նոքա սպասաւորք առաջի կռոցն նոցա. եւ եղեւ տանն Իսրայէլի այն ՚ի տանջանս անիրաւութեան։ Վասն այնորիկ ամբարձի զձեռն իմ ՚ի վերայ նոցա ասէ Տէր Աստուած. եւ ընկալցին ըստ անօրէնութեան իւրեանց. 13եւ մի՛ մերձեսցին առ իս քահանայանալ ինձ, եւ մի՛ հպել յամենայն սրբութիւնս որդւոցն Իսրայէլի, եւ մի՛ յամենայն սրբութիւն սրբութեանց իմոց. եւ ընկալցին զանարգանս իւրեանց մոլորութեամբն զոր մոլորեցան։ 14Եւ կարգեսցեն զնոսա պահել զպահպանութիւնս տանն. յամենայն ՚ի գործս նորա, եւ յամենայն ինչ զոր գործեսցեն անդ։ 15Եւ քահանայքն Ղեւտացիք որդիքն Սադովկայ որք պահեցին զպահպանութիւնս սրբութեանց իմոց ՚ի մոլորել տանն Իսրայէլի յինէն, նոքա՛ մերձեսցին առ իս պաշտել զիս. եւ կացցեն առաջի երեսաց իմոց մատուցանել ինձ զոհս եւ ճարպ եւ արիւն՝ ասէ Տէր Աստուած։ 16Նոքա մտցեն ՚ի սրբութիւնս իմ, եւ նոքա մերձեսցին ՚ի սեղան իմ պաշտել զիս. եւ պահեսցեն զպահպանութիւնս իմ։ 17Եւ եղիցի ՚ի մտանելն նոցա ընդ դուռն սրահին ներքնոյ, զգեցցին զպատմուճանս կտաւիս. եւ մի՛ զգենուցուն ասուիս ՚ի պաշտամանն իւրեանց, ՚ի դրանէ ներքին սրահին։ 18Եւ խոյրս կտաւիս ունիցին ՚ի գլուխս իւրեանց, եւ անդրավարտիս կտաւիս յերանս իւրեանց, եւ ո՛չ զգենուցուն բռնութիւն։ 19Եւ յելանելն իւրեանց յարտաքին սրահն առ ժողովուրդն, մերկասցին զպատմուճանս իւրեանց որով պաշտիցենն. եւ դիցեն զնոսա ՚ի սենեակն սրբութեանց, եւ զգեցցին ա՛յլ պատմուճանս. եւ մի՛ սրբեսցեն զժողովուրդն պատմուճանօք իւրեանց։ 20Եւ զգլուխս իւրեանց մի՛ գերծցեն, եւ զվարսս իւրեանց մի՛ անօսրացուսցեն. ծածկելով ծածկեսցեն զգլուխս իւրեանց։ 21Եւ գինի մի՛ արբցեն ամենայն քահանայքն ՚ի մտանե՛լն իւրեանց ՚ի ներքին սրահն։ 22Եւ զայրի, եւ զհանեալ մի՛ առնուցուն իւրեանց ՚ի կանայս, այլ զկոյսս ՚ի զաւակէ տանն Իսրայէլի. եւ այրի թէ իցէ ՚ի քահանայէ մնացեալ՝ առցեն։ 23Եւ զժողովուրդն իմ ուսուսցեն ընտրե՛լ ՚ի մէջ սրբոյն եւ պղծոյն. եւ ՚ի մէջ անարատին եւ արատաւորին։ 24Եւ ՚ի վերայ դատաստանի արեան նոքա՛ կացցեն քննել. զարդարութիւնս իմ արդարացուսցեն, եւ զիրաւունս իմ իրաւացուսցեն. եւ զօրէնս իմ, եւ զհրամանս իմ յամենայն տօնս պատմեսցեն, եւ զշաբաթս իմ սրբեսցե՛ն։ 25Եւ ՚ի դի՛ մարդոյ մի՛ մտցեն պղծիլ. բայց թէ ՚ի հօր կամ ՚ի մօր՝ եւ յուստերս եւ ՚ի դստերս՝ եւս յեղբօր եւ ՚ի քեռ՝ որ առն չիցէ տուեալ՝ պղծեսցին։ 26Եւ յետ սրբելոյն նորա՝ եւթն օր թուեսցէ իւր։ 27Եւ յորում աւուր մտանիցէ ՚ի սրբութիւն սրահին ներքնոյ պաշտե՛լ ՚ի սրբութեանն՝ մատուցանէ քաւութիւն՝ ասէ Տէր Աստուած։ 28Եւ ո՛չ եղիցի նոցա ժառանգութիւն, զի ես եմ նոցա ժառանգութիւն. եւ կալուածք մի՛ տացին նոցա ՚ի մէջ որդւոցն Իսրայէլի, զի ե՛ս եմ նոցա ժառանգութիւն։ 29Եւ զզոհսն, եւ զվասն մեղացն, եւ զվասն անգիտութեանն՝ նոքա՛ կերիցեն. եւ ամենայն նուէրք Իսրայէլի՝ նոցա լիցին։ 30Պտուղ ամենայնի եւ անդրանիկք ամենեցուն, եւ երախայրիք յամենայն պտղոց ձերոց՝ քահանայի՛ցն եղիցի։ Եւ զառաջին մուտ արդեանց ձերոց տաջի՛ք քահանային՝ դնել օրհնութիւն ՚ի վերայ տանց ձերոց։ 31Զամենայն զմեռելոտի եւ զգազանաբեկ, ՚ի թռչնոց եւ յանասնոց, մի՛ ուտիցեն քահանայքն։