1Եւ եմոյծ զիս առաջի դրան տաճարին, եւ ահա ելանէր ջուր ՚ի ներքոյ վարագուրաց տաճարին ընդ արեւելս. զի երեսք տաճարին հայէին ընդ արեւելս. եւ ջուրն հոսէր յաջմէ կողմանէ տաճարին հիւսւսոյ՝ ՚ի սեղանն կոյս։ 2Եւ եհան զիս ընդ ճանապարհ դրանն հիւսւսոյ, եւ շրջեցոյց զիս ընդ ճանապարհ դրանն արտաքնոյ առ դրամբն արտաքնով, որ հայէր ընդ արեւելս. եւ ահա ջուրն հոսէր յաջմէ կողմանէ։ 3Եւ իբրեւ զելս առն դէմ յանդիման, եւ չափ ՚ի ձեռին իւրում։ Եւ չափեաց հազա՛ր, չափովն՝ եւ անց ընդ ջուրն յորդութեանց. 4եւ չափեաց հազա՛ր, չափովն՝ եւ անց ընդ ջուրն, եւ հարկանէր ջուրն մինչեւ ցերանսն. եւ չափեաց հազա՛ր, չափովն՝ եւ անց ընդ ջուրն. եւ հարկանէր ջուրն մինչեւ ցգօտին. 5եւ չափեաց հազա՛ր, չափովն զուխսն՝ եւ ո՛չ կարէր անցանել. զի յորդեաց ջուրն իբրեւ զյորձանս հեղեղաց ընդ որ ո՛չ ոք անցանիցէ։ 6Եւ ասէ ցիս. Տե՛ս որդի մարդոյ։ Եւ դարձոյց զիս եւ տարաւ յափն գետոյն։ 7Եւ ՚ի շրջելն անդ իմում, եւ ահա յափն գետոյն ծառատունկ բազում յոյժ յա՛յսկոյս յա՛յնկոյս։ 8Եւ ասէ ցիս. Ջուրս այս որ ելանէ ՚ի կողմ Գալիլեացւոց ընդ արեւելս, եւ իջանէ յԱրաբիա, եւ գայ մինչեւ ցծով ՚ի ջուրց ելիցն, եւ բժշկեսցէ զջուրս։ 9Եւ եղիցի ամենայն շունչ անասնոց թքելոց. յամենայնի յորոց վերայ եկեսցէ գետն՝ կենդանասցին։ Եւ եղիցի անդ ձուկն բազում յոյժ, զի հասեալ անդր ջրոյս այսորիկ՝ բժշկեսցէ. եւ կենդանասցին յորոց վերայ հասցէ գետն՝ եւ կեցցէ՛։ 10Եւ կացցեն ՚ի նմա որսորդք յԵնգադեայ մինչեւ ցԵնգադիս. ձգանք ուռկանաց առանձինն եղիցին. եւ ձկունք նորա իբրեւ զձկունս ծովուն մեծի, եւ բազմութիւն բազում յոյժ. 11յելս նորա՝ եւ ՚ի դարձս նորին, եւ ՚ի համբառնալ նորին մի՛ սրբեսցին. այլ յայլս մատնեսցին։ 12Եւ առ գետովն ելցեն զափամբն յայսկոյս յայնկոյս՝ ամենայն ծա՛ռ ուտելի, եւ մի՛ հնասցի շուրջ զնովաւ, եւ մի՛ պակասեսցի պտուղ նորա, եւ զդալարութիւն իւր յառաջագոյն արձակեսցէ. զի ջուրք նորա ՚ի սրբութեանց ելանիցեն. եւ եղիցի պտուղ նոցա ՚ի կերակուր, եւ ելք նոցա ՚ի բշժկութիւն։

13Ա՛յսպէս ասէ Տէր Աստուած. Ա՛յս են սահմանք ժառանգութեան երկրին, զոր ժառանգեցուցանիցեն երկոտասան ազգացն որդւոցն Իսրայէլի յաւելուած վիճակաց. 14եւ ժառանգեսցեն զնա իւրաքանչիւրոք՝ որպէս եւ եղբայրն իւր, յոր ամբարձի զձեռն իմ տալ հարցն նոցա. եւ անկցի երկիրն այն ձեզ ՚ի վիճակ ժառանգութեան։ 15Եւ ա՛յս են սահմանք երկրին որ ընդ կողմ հիւսւսոյ։ ՚Ի ծովէն մեծէ, որ իջանէ եւ մեկնէ ՚ի մուտս Եղ՚ղ՚ադայ 16եւ Եմաթայ, եւ Բերովթայ, Սաբարսիմայ. ՚ի մէջ սահմանացն Դամասկոսի, եւ ՚ի մէջ սահմանացն Եմաթայ՝ բնակութիւնք Աւնանայ որ են ՚ի սահմանս Աւրանացւոց։ 17Ա՛յս են սահմանք ՚ի ծովէ ՚ի հանգրուանէ Աւնանայ՝ սահմանք Դամասկոսի. եւ ՚ի կողմ հիւսւսոյ ըստ հիւսւսոյ, եւ սահմանն Եմաթայ սահման հիւսւսոյ, 18դէմ յանդիման արեւելից ՚ի մէջ Աւրանացւոցն եւ ՚ի մէջ Դամասկոսի. ՚ի մէջ Գաղաադացւոցն եւ ՚ի մէջ երկրին Իսրայէլի, Յորդանան մեկնէ ընդ ծովակողմ արեւելից ընդ արմաւաստանն. այս ընդ արեւելս, 19եւ ընդ հարա՛ւ. եւ առ հարաւով ՚ի Թեմանայ եւ յարմաւաստանէ՝ մինչեւ ՚ի ջուրն Մարիբովթկադէս որ ձգի ՚ի ծովն մեծ։ Ա՛յս բաժին հարաւային՝ եւ առ հարաւո՛վ։ 20Եւ սոյն բաժին ծովուն մեծի, որ որոշէ մինչեւ հանդէպ մտիցն Եմաթայ, մինչեւ՛ ՚ի մուտս նորին. ա՛յս ինքն են ընդ ծովակողմն Եմաթայ։ 21Եւ բաժանեսջիք զերկիրն զայն նոցա, եւ ազգացն Իսրայէլի 22արկջիք զնա ՚ի վիճակս. ձե՛զ եւ եկացն, եւ պանդխտացն որ ՚ի միջի ձերում, որք ծնան որդիս ՚ի միջի ձերում. եւ եղիցին ձեզ իբրեւ այդրենածինք ՚ի մէջ որդւոցն Իսրայէլի. եղիցին ընդ ձեզ. կերիցեն ժառանգութեամբ ՚ի մէջ ազգացդ Իսրայէլի։ 23Եւ եղիցին յազգ պանդխտաց ՚ի մէջ պանդխտաց՝ որ իցեն ՚ի ձեզ. ա՛նդ տաջիք նոցա ժառանգութիւն՝ ասէ Տէր Աստուած։