1Եւ եղեւ յամին վեցերորդի յամսեանն հինգերորդի, որ օր հինգ էր ամսոյն. ես նստէի ՚ի տա՛ն իմում, եւ ծերքն Յուդայ նստէին առաջի իմ։ Եւ եղեւ ՚ի վերայ իմ անդ ձեռն Ադովնայի Տեառն. 2եւ տեսանէի՝ եւ ահա նմանութիւն առն, ՚ի միջոյն եւ ՚ի խոնարհ՝ հո՛ւր, եւ ՚ի միջոյն եւ ՚ի վեր՝ իբրեւ զտեսիլ փայլական. իբրեւ զգոյն բազմագունի ականն։ 3Եւ ձգեաց նմանութիւն ձեռին՝ եւ ա՛րկ զգագաթա՛մբ գլխոյ իմոյ, եւ վերացո՛յց զիս Ոգի ընդ երկինս եւ ընդ երկիր. եւ տարաւ զիս յԵրուսաղէմ ՚ի տեսլեանն Աստուծոյ, եւ կացոյց զիս ՚ի նախադուռն դրանն ներքնոյ որ հայի ընդ հիւսւսի. ուր էր արձան պատկերին Նախանձու ստացողին։ 4Եւ ա՛նդ էին փառք Աստուծոյ Իսրայէլի, ըստ տեսլեանն զոր տեսի ՚ի դաշտի անդ։ 5Եւ ասէ ցիս. Որդի մարդոյ՝ հայեա՛ց աչօք քովք ՚ի կողմն հիւսւսոյ։ Համբարձի՛ զաչս իմ ՚ի կողմն հիւսւսոյ, եւ ահա ՚ի հիւսւսոյ կողմանէ ՚ի վերայ դրան սեղանոյն ուր կա՛յր պատկերն Նախանձու ՚ի մուտս դրանն որ հայէ՛ր ընդ արեւելս։ 6Եւ ասէ ցիս. Որդի մարդոյ՝ տեսանե՞ս զի՛նչ գործեն դոքա աստ անօրէնութիւն մեծ տունդ Իսրայէլի, հեռանա՛լ ՚ի սրբութեանց իմոց. դարձեալ եւս մեծամեծս քան զայս տեսցես անօրէնութիւնս։ 7Եւ եմո՛յծ զիս առաջի դրաց սրահին. եւ տեսի եւ ահա ծա՛կ մի յորմն։ 8Եւ ասէ՛ ցիս. Որդի մարդոյ բրեա՛ զորմդ։ Եւ բրեցի՛ զորմն, եւ ահա դուռն մի։ 9Եւ ասէ ցիս. Որդի մարդոյ՝ մո՛ւտ տե՛ս զանօրէնութիւնսդ՝ եւ զչարիսդ զոր գործեն դոքա այդր։ 10Մտի՛ եւ տեսի, եւ ահա ամենայն նմանութիւն սողնոց եւ անասնոց, սնոտի գարշելիք. եւ տեսի զամենայն կուռս տանն Իսրայէլի նկարեա՛լ շուրջ զնոքօք։ 11Եւ եւթանասուն այր ՚ի ծերոց անտի տանն Իսրայէլի, եւ Յեզոնիա որդի Սափանայ ՚ի մէջ նոցա կայր առաջի նոցա. եւ իւրաքանչիւր բուրուառ ՚ի ձեռին իւրում, եւ ծուխ խնկոյն ելանէ՛ր դիզանէր իբրեւ զամպ։ 12Եւ ասէ ցիս Տէր. Որդի մարդոյ՝ տեսանե՞ս զինչ ծերք տանդ Իսրայէլի գործեն այդր ընդ խաւար, իւրաքանչի՛ւր ՚ի ծածուկ ՚ի սենեկի իւրում. զի ասեն. Եթո՛ղ Տէր, եւ ո՛չ հայի յերկիր։ 13Եւ ասէ ցիս. Դարձեալ եւս մեծամեծ անօրէնութիւնս տեսցես՝ զոր գործեն դոքա։ 14Եւ եմոյծ զիս առաջի դրան տանն Տեառն, որ հայէր ընդ հիւսւսի. եւ ահա նստէին անդ կանայք՝ եւ ողբային զԹամուզ։ 15Եւ ասէ ցիս. Տեսանե՞ս զայդ որդի մարդոյ. դարձեալ եւ՛ս մեծամեծ գործս քան զայդ տեսանիցես։ 16Եւ եմո՛յծ զիս ՚ի ներքին սրահ տանն Տեառն, եւ ահա ՚ի վերայ դրաց տաճարին Տեառն ընդ սեղանն եւ ընդ վանդակն՝ իբրեւ արք քսանեւհինգ, որոց զթիկունս ՚ի տաճա՛րն Տեառն դարձուցեալ էր, եւ զերեսս ընդ արեւելս, եւ երկի՛ր պագանէին արեգական։ 17Եւ ասէ ցիս. Տեսե՞ր զայդ որդի մարդոյ. միթէ փո՞քր ինչ իցէ անօրէնութիւն տանդ Իսրայէլի զոր գործեն աստ. զի լցին զերկիրդ անօրէնութեամբք, եւ դարձան ՚ի բարկացուցանել զիս. եւ ահա ձգեն զբազուկ որթուն ընդ արհամարհանս։ 18Եւ ես արարից ընդ դոսա բարկութեամբ, եւ ո՛չ խնայեսցէ ակն իմ, եւ ո՛չ ողորմեցայց նոցա. եւ աղաղակեսցեն յականջս իմ մեծաձայն, եւ ո՛չ լուայց նոցա։