1Յառաջնում ամին Կիւրոսի արքայի Պարսից, ՚ի կատարե՛լ բանին Տեառն ՚ի բերանոյ Երեմիայի մարգարէի. զարթո՛յց Տէր զոգին Կիւրոսի թագաւորին Պարսից, եւ ե՛տ հրաման պատուիրանի յամենայն թագաւորութեան իւրում. եւ գրեաց առ ամենեսեան օրինակ զա՛յս։ 2Ա՛յսպէս ասէ Կիւրոս թագաւոր Պարսից. Զամենայն թագաւորութիւնս երկրի ե՛տ ինձ Տէր Աստուած երկնից. եւ նա՛ հրամայեաց ինձ առնել եւ շինել նմա տաճար յԵրուսաղէմ Հրէաստանի։ 3Ո՛ ոք եւ իցէ ՚ի ձեզ յամենայն ժողովրդեան Տեառն, ընդ որում է՛ Աստուած նորա ընդ նմա՝ ելցէ՛ յԵրուսաղէմ Հրէաստանի, եւ շինեսցէ՛ զտուն Տեառն Աստուծոյ Իսրայէլի. եւ ինքն Աստուած որ բնակեալ է յԵրուսաղէմ, եղիցի՛ ընդ նմա։ 4Եւ զամենայն պատրաստութիւն իւր առցէ՛ ընդ իւր, եւ տարցի ՚ի տեղին յայն ուր ինքն բնակեսցէ. եւ առցէ այր ընդ իւր զամենայն կազմած իւր՝ որ ինչ եւ իցէ, արծաթեղէն եւ ոսկեղէն, եւ զա՛յլ կահ եւ զանասուն՝ հանդերձ ընկերօք իւրեանց առցեն ընդ իւրեանս ՚ի պատրաստութիւն տաճարին Տեառն Աստուծոյ յԵրուսաղէմ։ 5Եւ յարեան իշխանք հայրապետաց որդւոցն Յուդայ եւ Բենիամինի, եւ քահանայքն եւ Ղեւտացիք ամենեքեան՝ զորոց զարթոյց Տէր Աստուած զոգիս նոցա ելանե՛լ եւ շինել զտաճարն Տեառն Աստուծոյ յԵրուսաղէմ։ 6Եւ ամենեքեան որ շուրջ էին զնոքօք՝ օգնէին եւ զօրացուցանէին զձեռս նոցա՝ տալով արծա՛թ եւ ոսկի, եւ զկահ եւ զանասուն, եւ ընծայիւք եւ պատարագօք լցուցանէին զնոսա։ 7Եւ թագաւորն Կիւրոս ե՛տ բերել զամենայն սպասս եւ զկահ տաճարին Տեառն զոր ա՛ռ Նաբուքոդոնոսոր յԵրուսաղեմէ. եւ ետ ՚ի պահ ՚ի տուն աստուածոց իւրոց. 8ետ բերել զայն ամենայն Կիւրոս թագաւոր Պարսից ՚ի ձեռն Միթրադատայ գանձաւորի, եւ համարեալ՝ ետ ցՍամանասար իշխան Յուդայ։ 9Եւ ա՛յս է թիւ համարուցն. զոհարանք ոսկեղէնք երեսուն, եւ զոհարանք սպասուն արծաթեղէնք՝ հազար քսան եւ ինն. 10սկաւառակք ոսկիք՝ երեսուն, եւ արծաթեղէնք՝ կրկին հազար. 11ամենայն կահք ոսկեղէնք եւ արծաթեղէնք՝ հինգ հազար եւ չորեքհարիւր։ Եւ ընդ ամենայն որ էին ընդ Սամանասարայ եւ ընդ ելելոյ գերութեանն ՚ի Բաբելոնէ յԵրուսաղէմ։