1Եւ յետ բանիցս այսոցիկ ՚ի թագաւորութեանն Արտաշէսի արքայի Պարսից, ե՛լ Եզրա որդի Սարուայ, որդւոյ Ազարիայ, որդւոյ Քեղկեայ. 2որդւոյ Սեղումայ, որդւոյ Սադովկայ, որդւոյ Աքիտովբայ. 3որդւոյ Սամարիայ, որդւոյ Եզրայ, որդւոյ Մարովթսայ. 4որդւոյ Զարեայ, որդւոյ Ոզիայ, որդւոյ Բովկայ. 5որդւոյ Աբիսուայ, որդւոյ Փենեէսի, որդւոյ Եղիազարու, որդւոյ Ահարոնի առաջին քահանայի։ 6Ա՛յս Եզրա՝ որ ե՛լ ՚ի Բաբելոնէ. եւ սա էր գրիչ արագագիր օրինացն Մովսիսի զոր ետ Տէր Աստուած Իսրայէլի. եւ ետ նմա թագաւորն զամենայն որ ինչ խնդրեաց ՚ի նմանէ. զի ձեռն Տեառն Աստուծոյ է՛ր ընդ նմա։ 7Եւ ելին ընդ նմա յորդւոցն Իսրայէլի՝ եւ ՚ի քահանայից՝ եւ յՂեւտացւոց, եւ յերգեցիկ պաշտօնէից, եւ ՚ի դռնապանաց՝ եւ ՚ի Նաթանայացւոցն յԵրուսաղէմ։ Յամին եւթներորդի Արտաշիսի թագաւորի. 8ելին յԵրուսաղէմ յամսեանն հինգերորդի, որ էր ամ եւթներորդ թագաւորին. 9եւ յամսամտին հինգերորդ ամսեանն ե՛կն Եզրա յԵրուսաղէմ. վասն զի ձեռն Տեառն Աստուծոյ բարութեամբ էր ընդ նոսա։ 10Եւ ե՛դ Եզրա ՚ի սրտի իւրում խնդրել զօրէնսն Տեառն, եւ գրել զնա, եւ ուսուցանել Իսրայէլի զհրամանս եւ զդատաստանս։ 11Եւ ա՛յս են իրք հրամանի զոր ետ Արտաշէս թագաւոր Եզրի քահանայի եւ գրչի գրոց բանի օրինացն Տեառն, եւ հրամանաց նորա ՚ի վերայ Իսրայէլի։ 12Արտաշէս թագաւորաց թագաւոր, Եզրի գրչի օրինացն Տեառն Աստուծոյ երկնից. 13ամենայն հաստատութեամբ ետու ես հրաման ՚ի վերայ ամենեցուն որ են ընդ թագաւորութեամբ իմով, ժողովրդոցն Իսրայէլի, եւ քահանայից եւ Ղեւտացւոցն, զի ելցեն ամենեքեան յԵրուսաղէմ ընդ քեզ։ 14Յերեսաց թագաւորի, եւ եւթն խորհրդակցացն առաքեցաւ գիրս այս, ա՛յց առնել Հրէիցն՝ եւ Երուսաղեմացւոցն առաջնորդութեամբ Եզրի, որոյ են օրէնք Աստուծոյ ՚ի ձեռին իւրում։ 15Եւ հրամայեաց թագաւորն տա՛լ ՚ի տուն Տեառն արծաթ եւ ոսկի, հանդերձ խորհրդակցօք իւրովք յԵրուսաղէմ, եւ դնել ՚ի տաճարին առաջի Տեառն Աստուծոյ Իսրայէլի. 16եւ ամենայն որոյ գտցի արծաթ եւ ոսկի՝ Հրէայք որք իցեն պանդուխտք ՚ի Բաբելոն՝ ժողովուրդք եւ քահանայք, առցե՛ն ընդ իւրեանս եւ տարցին ՚ի տուն Տեառն յԵրուսաղէմ։ 17Եւ ամենեքեան որք ելցեն՝ պատրաստեսցեն զա՛յս օրինակ, որպէս եւ գրեցաք. Զուարակս, խոյս, գառինս, եւ զզոհս եւ զնուէրս իւրեանց. եւ մատուսցեն ՚ի վերայ սեղանոյ Տեառն Աստուծոյ իւրեանց յԵրուսաղէմ։ 18Ե՛ւս առաւել վասն քո՝ ասէ, եւ վասն եղբարց քոց արարի բարութիւն, եւ թողի՛ զարծաթ եւ զոսկի, որպէս վայել է՛ Աստուծոյ ձերոյ՝ արարէ՛ք։ 19Եւ զկահ տուեալ քեզ ՚ի սպասաւորութիւն տանն Տեառն, ա՛ռ ընդ քեզ՝ եւ տա՛ր յԵրուսաղէմ. 20եւ զաւելորդսն տաջի՛ր ՚ի պահեստ գանձու տան թագաւորաց։ 21Ե՛ս Արտաշէս թագաւոր ետու հրաման ամենայն գանձաւորաց որ իցեն յա՛յն կողմն Եփրատ գետոյն, զամենայն ինչ զոր եւ խնդրեսցէ ՚ի ձէնջ Եզրա քահանայ եւ գրիչ օրինացն Տեառն Աստուծոյ երկնից, տաջի՛ք ՚ի տուն Տեառն Աստուծոյ նորա։ 22Պատրա՛ստ արարէք արծաթ՝ տաղանտս հարիւր. եւ ցորեան՝ քոռս հարիւր, եւ գինի՝ նո՛յնչափ, եւ ձէթ՝ նո՛յնչափ. 23եւ մի՛ ոք կացցէ ընդդէմ հրամանաց թագաւորի։ Զամենայն ինչ զոր հրամայեցի ՚ի տուն Տեառն Աստուծոյ երկնից եւ երկրի՝ այս եղիցի. եւ մի՛ ոք ձեռնարկեսցէ խափանե՛լ ՚ի տանէ Տեառն Աստուծոյ Իսրայէլի. զի մի՛ եղիցի բարկութիւն ՚ի Տեառնէ Աստուծոյ ՚ի վերայ թագաւորութեան իմոյ՝ եւ որդւոյ իմոյ։ 24Եւ ետու ձեզ գիտել թէ ամենայն որ իցեն ՚ի քահանայից եւ յՂեւտացւոց՝ եւ ՚ի սաղմոսերգողաց՝ դռնապանացն եւ Նաթանացւոցն, եւ որք իցեն սպասաւորք տանն Աստուծոյ՝ մի՛ տացեն հարկս, եւ մի՛ ոք իշխեսցէ ծառայեցուցանել զնոսա։ 25Եւ դու Եզրա՝ որոյ է՛ իմաստութիւն Աստուծոյ ՚ի ձեռին քում, կացո՛ գրիչս եւ դատաւորս՝ զի դատեսցեն զամենայն ժողովուրդս որ են յա՛յն կողմն Գետոյն, եւ ուսուսցեն ամենեցուն որք ո՛չ գիտիցեն զօրէնս Աստուծոյ քոյ։ Եւ ամենեքեան որք ո՛չ գիտիցեն. 26եւ ամենեքեան որք ո՛չ առնիցեն ըստ օրինացն Տեառն՝ եւ ըստ օրինաց թագաւորին, մատնեալք լիցին ՚ի դատաստան ըստ գործոց իւրեանց, եթէ ՚ի մահ, եթէ ՚ի տանջանս, եթէ ՚ի տուգանս, եւ եթէ ՚ի կապանս։ 27Օրհնեա՛լ է Տէր Աստուած հարցն մերոց՝ որ արկ զայս ՚ի սիրտ թագաւորին, եւ փառաւորեաց զանուն Տեառն Աստուծոյ մերոյ որ է յԵրուսաղէմ. 28եւ արար առ իս զողորմութիւն՝ եւ պատուեաց զիս առաջի թագաւորին եւ խորհրդակցաց նորա, եւ առաջի ամենայն իշխանաց թագաւորին. եւ ես զօրացայ. վասն զի ձեռն Տեառն ամենայն բարութեամբ է՛ր ընդ իս. ժողովեցի զամենայն իշխանս Իսրայէլի ելանել ընդ իս։