1Պի՛նդ կացէք այսուհետեւ, եւ մի՛ միւսանգամ ընդ լծով ծառայութեան մտանէք։

2Ահաւասիկ ես Պաւղոս ասե՛մ ձեզ. զի եթէ թլփատիք, Քրիստոս ինչ ձեզ ո՛չ օգնէ։ 3Վկայե՛մ ամենայն մարդոյ՝ որ թլփատիցի, թէ պարտակա՛ն է զամենայն օրէնսն կատարել։ 4Խափանեա՛լ էք ՚ի Քրիստոսէ, որ օրինօքն արդարանայք. եւ անկեա՛լ էք ՚ի շնորհաց անտի։ 5Զի մեք Հոգւոյն՝ ՚ի հաւատոց յուսո՛յն արդարութեան ակն ունիմք։ 6Զի ՚ի Քրիստոս Յիսուս՝ ո՛չ թլփատութիւն ինչ կարօղ է, եւ ո՛չ անթլփատութիւն. այլ հաւա՛տք սիրով աջողեալք։ 7Բարւո՛ք ընթանայիք, ո՞ կասեցոյց զձեզ ճշմարտութեանն չհաւանել։ 8Զի ա՛յն հրապոյրք՝ ո՛չ յայնմանէ են որ կոչեացն զձեզ։ 9Փոքր մի խմոր զամենա՛յն զանգուածն խմորէ։ * 10Այլ ես յուսացեա՛լ եմ ՚ի ձեզ Տերամբ՝ թէ ո՛չ այլազգ ինչ խորհիցիք. եւ որ խռովեցուցանէ զձեզ, կրեսցէ դատաստան՝ ո՛ ոք եւ իցէ։ 11Այլ ես ե՛ղբարք՝ եթէ թլփատութիւն քարոզէի, ընդէ՞ր տակաւին հալածիմ. ապա ուրեմն խափանեա՛լ իցէ գայթագղութիւն խաչին։ 12Երանի՛ թէ մօտակտուր իսկ լինէին, որ զձեզն խռովեցուցանեն։ 13Զի դուք յազատութիւն կոչեցեալ էք։ Ե՛ղբարք, միայն զի ազատութիւնն ձեր ո՛չ լինիցի ՚ի պատճառս մարմնոյ. այլ սիրո՛վ ծառայեցէ՛ք միմեանց։ 14Զի ամենայն օրէնք ՚ի մի՛ բան կատարին. ՚ի Սիրեսցեսն զընկեր քո իբրեւ զանձն քո։ * 15Ապա թէ զմիմեանս խածատիցէք՝ եւ ուտիցէք. զգո՛յշ լերուք՝ գուցէ ՚ի միմեանց սատակիցիք։ 16Բայց զայս ասեմ. Հոգւո՛վ գնացէք, եւ զցանկութիւն մարմնոյ մի՛ կատարէք։ 17Զի մարմին ցանկայ հակառա՛կ հոգւոյ, եւ հոգի հակառա՛կ մարմնոյ. եւ զի սոքա միմեանց հակառա՛կ են, մի՛ զոր կամիցիքն՝ զայն առնիցէք։ 18Իսկ եթէ Հոգւո՛վ վարիք, ապա չէ՛ք ընդ օրինօք։ 19Զի յայտնի՛ են գործք մարմնոյ. ա՛յս ինքն են, շնութի՛ւն, պոռնկութի՛ւն, պղծութի՛ւն, գիջութի՛ւն, 20կռապաշտութի՛ւն, կախարդութի՛ւն, թշնամութի՛ւն, հե՛ռ, նախա՛նձ, բարկութի՛ւն, հակառակութի՛ւնք, երկպառակութի՛ւնք, հերձուա՛ծք, 21չարակնութի՛ւն, սպանութի՛ւնք, արբեցութի՛ւնք, անառակութի՛ւնք, եւ որ ինչ սոցի՛ն նման են. զոր յառաջագո՛յն իսկ ասեմ ձեզ, որպէս եւ կանխաւն ասէի, թէ որ զայսպիսի ինչ գործեն, զարքայութիւն Աստուծոյ ո՛չ ժառանգեն։ 22Իսկ պտուղ Հոգւոյն ա՛յս է. սէ՛ր, խնդութիւն, խաղաղութի՛ւն, երկայնմտութի՛ւն, 23քաղցրութի՛ւն, բարութի՛ւն, հաւա՛տք, հեզութի՛ւն, ժուժկալութի՛ւն. զայսպիսեաց աստի օրէնքն չե՛ն հակառակ։ 24Իսկ որ Քրիստոսեա՛նքն են, զմարմինս իւրեանց ՚ի խա՛չ հանին կարեօքն եւ ցանկութեամբք հանդերձ։ 25Եթէ կեամք Հոգւով, ընդ Հոգւոյն եւ միաբանեսցո՛ւք։ 26Եւ մի՛ լիցուք սնապարծք՝ միմեանց ձայն տալով, եւ ընդ միմեանս նախանձելով։