1՚Ի սկզբանէ արար Աստուած զերկին եւ զերկիր։ 2Եւ երկիր է՛ր աներեւոյթ եւ անպատրաստ. եւ խաւա՛ր ՚ի վերայ անդնդոց. եւ Հոգի Աստուծոյ շրջէ՛ր ՚ի վերայ ջուրց։ 3Եւ ասաց Աստուած. Եղիցի՛ լոյս։ Եւ եղեւ՛ լոյս։ 4Եւ ետես Աստուած զլոյսն զի բարի՛ է։ Եւ մեկնեաց Աստուած ՚ի մէջ լուսոյն եւ ՚ի մէջ խաւարին։ 5Եւ կոչեաց Աստուած զլոյսն տիւ, եւ զխաւարն կոչեաց գիշե՛ր։ Եւ եղեւ երեկոյ՝ եւ եղեւ վաղորդայն՝ օ՛ր մի։ 6Ե՛ւ ասաց Աստուած. Եղիցի՛ հաստատութիւն ՚ի մէջ ջրոցդ, եւ եղիցի մեկնե՛լ ՚ի մէջ ջուրցդ եւ ջուրց։ Եւ եղեւ այնպէս։ 7Եւ արար Աստուած զհաստատութիւնն։ Եւ անջրպետեաց Աստուած ՚ի մէջ ջրոյն որ ՚ի ներքոյ հաստատութեանն, եւ ՚ի մէջ ջրոյն որ ՚ի վերոյ հաստատութեանն։ 8Եւ կոչեաց Աստուած զհաստատութիւնն երկին։ Եւ ետես Աստուած զի բարի է։ Եւ եղեւ երեկոյ, եւ եղեւ վաղորդայն, օ՛ր երկրորդ։ 9Եւ ասաց Աստուած. Ժողովեսցի՛ն ջուրքդ որ ՚ի ներքոյ երկնից ՚ի ժողով մի, եւ երեւեսցի ցամաքն։ Եւ եղեւ այնպէս. եւ ժողովեցան ջուրքն, որ ՚ի ներքոյ երկնից ՚ի ժողովս իւրեանց. եւ երեւեցաւ ցամաքն։ 10Եւ կոչեաց Աստուած զցամաքն երկիր. եւ զժողովս ջուրցն կոչեաց ծովս։ Եւ ետես Աստուած զի բարի է։ 11Եւ ասաց Աստուած. Բղխեսցէ՛ երկիր բա՛նջար խոտոյ. սերմանել սերմն ըստ ազգի եւ ըստ նմանութեան. եւ ծառ պտղաբեր՝ առնել պտուղ ըստ ազգի իւրում. որոյ սերմն իւր ՚ի նմին ըստ ազգի ՚ի նմանութիւն ՚ի վերայ երկրի։ Եւ եղեւ այնպէս։ 12Եւ եհան երկիր բանջար խոտոյ, սերմանել սերմն որ է ՚ի վերայ ամենայն երկրի. եւ փայտ պտղաբեր առնել պտուղ՝ որոյ սերմն իւր ՚ի նմին ըստ ազգի ՚ի վերայ երկրի։ Եւ ետես Աստուած զի բարի է։ 13Եւ եղեւ երեկոյ, եւ եղեւ վաղորդայն, օ՛ր երրորդ։ 14Եւ ասաց Աստուած. Եղիցի՛ն լուսաւորք ՚ի հաստատութեան երկնից, ՚ի լուսաւորութիւն ՚ի վերայ երկրի. եւ մեկնե՛լ ՚ի մէջ տուընջեան, եւ ՚ի մէջ գիշերոյ. եւ եղիցին ՚ի նշանս, եւ ՚ի ժամանակս, եւ յաւուրս, եւ ՚ի տարիս։ 15Եւ եղիցին ՚ի լուսաւորութիւն ՚ի հաստատութեան երկնից ծագել յերկիր. եւ եղեւ ա՛յնպէս։ 16Եւ արար Աստուած զերկուս լուսաւորսն զմեծամեծս. զլուսաւորն մեծ յիշխանութիւն տուընջեան, եւ զլուսաւորն փոքր յիշխանութիւն գիշերոյ. եւ զաստեղս։ 17Եւ ե՛դ զնոսա Աստուած ՚ի հաստատութեան երկնից լուսատո՛ւ լինել յերկիր։ 18Եւ իշխել տուընջեան եւ գիշերոյ, եւ մեկնել ՚ի մէջ լուսոյն եւ ՚ի մէջ խաւարին։ Եւ ետես Աստուած զի բարի է։ 19Եւ եղեւ երեկոյ եւ եղեւ վաղորդայն, օ՛ր չորրորդ։ 20Եւ ասա՛ց Աստուած. Հանցե՛ն ջուրք զեռունս շնչոց կենդանեաց, եւ թռչունս թեւաւո՛րս ՚ի վերայ երկրի ըստ հաստատութեան երկնից։ Եւ եղեւ այնպէս։ 21Եւ արա՛ր Աստուած կէտս մեծամեծս, եւ զամենայն շունչ զեռնոց կենդանեաց, զոր հանին ջուրք ըստ ազգի իւրեանց. եւ զամենայն թռչունս թեւաւորս ըստ ազգի։ Եւ ետես Աստուած զի բարի՛ են։ 22Եւ օրհնեաց զնոսա Աստուած եւ ասէ. Աճեցէ՛ք եւ բազմացարո՛ւք եւ լցէ՛ք զջուրսդ որ ՚ի ծովս. եւ թռչունքդ բազմասցի՛ն ՚ի վերայ երկրի։ 23Եւ եղեւ երեկոյ, եւ եղեւ վաղորդայն, օր հի՛նգերորդ։ 24Եւ ասաց Աստուած. Հանցէ՛ երկիր շունչ կենդանի ըստ ազգի չորքոտանի, եւ սողունս, եւ գազանս երկրի ըստ ազգի։ Եւ եղեւ այնպէս։ 25Եւ արա՛ր Աստուած զգազանս երկրի ըստ ազգի, եւ զանասո՛ւնս ըստ ազգի, եւ զամենայն սողունս երկրի ըստ ազգի իւրեանց։ Եւ ետես Աստուած զի բարի՛ են։ 26Եւ ասաց Աստուած. Արասցո՛ւք մարդ ըստ պատկերի մերում եւ ըստ նմանութեան, եւ իշխեսցեն ձկա՛նց ծովու. եւ թռչնոց երկնից, եւ անասնոց, եւ ամենայն երկրի, եւ ամենայն սողնոց որ սողին ՚ի վերայ երկրի։

27Եւ արա՛ր Աստուած զմարդն ՚ի պատկեր իւր. ըստ պատկերի Աստուծոյ արար զնա. արու եւ էգ արար զնոսա։ 28Եւ օրհնեաց զնոսա Աստուած՝ եւ ասէ. Աճեցէ՛ք եւ բազմացարո՛ւք՝ եւ լցէ՛ք զերկիր. եւ տիրեցէ՛ք դմա. եւ իշխեցէ՛ք ձկանց ծովու, եւ թռչնոց երկնից, եւ ամենայն անասնոց. եւ ամենայն երկրի, եւ ամենայն սողնոց որ սողին ՚ի վերայ երկրի։ 29Եւ ասաց Աստուած. Ահաւադիկ ետո՛ւ ձեզ զամենայն խոտ սերմանելի՝ սերմանել սերմն ըստ ազգի եւ ըստ նմանութեան, որ է ՚ի վերայ ամենայն երկրի. եւ ամենայն փայտ որ ունիցի յինքեան պտուղ սերման սերմանելոյ, ձե՛զ լիցի ՚ի կերակուր։ 30Եւ ամենայն գազանաց երկրի. եւ ամենայն թռչնոց երկնից. եւ ամենայն սողնոց որ սողին ՚ի վերայ երկրի՝ որ ունիցի շունչ կենդանի. եւ ամենայն խոտ դալա՛ր ՚ի կերակուր։ Եւ եղեւ ա՛յնպէս։ 31Եւ ետես Աստուած զամենայն զոր արար, եւ ահա բարի՛ են յոյժ։ Եւ եղեւ երեկոյ, եւ եղեւ վաղորդայն, օր վե՛ցերորդ։