1Եւ ա՛յս են ծնունդք որդւոցն Նոյի. Սէ՛մ, Քամ, Յաբեթ. եւ ծնան նոցա որդիք յետ ջրհեղեղին։ 2Որդիք Յաբեթի. Գամեր, եւ Մագովգ, եւ Մադա, եւ Յաւան, եւ Ելիսա, եւ Թոբէլ, եւ Մոսոք, եւ Թիրաս։ 3Եւ որդիք Գամերայ՝ Ասքանա՛զ. եւ Րիփաթ, եւ Թորգոմա։ 4Եւ որդիք Յաւանայ՝ Եղիսա եւ Թարսիս. Կիտացիք, եւ Ռոդացիք։ 5Եւ ՚ի սոցանէ՛ մեկնեցան կղզիք ազգաց յերկրի իւրեանց. իւրաքանչի՛ւր ըստ լեզուս յա՛զգս իւրեանց եւ ՚ի տոհմս իւրեանց։ 6Եւ որդիք Քամայ՝ Քո՛ւշ, եւ Մեստրեմ, Փո՛ւդ, եւ Քանան։ 7Եւ որդիք Քուշայ Սաբա, եւ Եւիլա, եւ Սաբաթա, եւ Ռեգմա, եւ Սաբակաթա։ Եւ որդիք Ռեգմայ, Սաբա եւ Յուդադան։ 8Եւ Քուշ ծնաւ զՆեբրովթ. նա՛ սկսաւ լինել հսկայ ՚ի վերայ երկրի։ 9Եւ նա էր սկայ որսո՛րդ առաջի Տեառն Աստուծոյ. վասն այնորիկ ասեն, իբրեւ զՆեբրովթ սկայ առաջի Տեառն Աստուծոյ։ 10Եւ եղեւ սկիզբն թագաւորութեան նորա Բաբելովն. եւ Որէգ, եւ Աքադ. եւ Քաղանէ յերկրին Սենայար։ 11Յերկրէն յայնմանէ ե՛լ Ասուր, եւ շինեաց զՆինուէ, եւ զՌոբովթ քաղաք. եւ զՔաղան. 12եւ զԴասեման ՚ի մէջ Նինուէի՛ եւ ՚ի մէջ Քաղանայ, ա՛յն է քաղաք մեծ։ 13Եւ Մեստրեմ ծնաւ զԼուդիիմացիս, եւ զՍենիիմացի՛ս եւ զՍաղբիիմացիս. եւ զՀեփթաղիիմացիս. 14եւ զՊատրոսոնիիմացիս, եւ զՔաղսոնիիմացիս, ուստի ելին Փղշտացիք. եւ զԿափթոորիմացիս։ 15Եւ Քանան ծնաւ զՍիդոն զանդրանիկ իւր, եւ զՔետացին։ 16Եւ զՅեբուսացին, եւ զԱմովրհացին, եւ զԳերգեսացին, 17եւ զԽեւացին, եւ զԱրուակացին, եւ զԱմինացին, 18եւ զԱրագիոնացին, եւ զՍամարացին, եւ զԱմաթացին։ Եւ յետ այնորիկ սփռեցան ազգք Քանանացւոց։ 19Եւ եղեն սահմանք Քանանացւոց, ՚ի Սիդոնէ մինչեւ ՚ի գա՛լ ՚ի Գերարա եւ ՚ի Գազա. մինչեւ ՚ի գա՛լ ՚ի Սոդոմ եւ ՚ի Գոմոր, եւ յԱդամա՛ եւ ՚ի Սեբոյիմ մինչեւ ՚ի Լասա։ 20Սոքա՛ են որդիք Քամայ յազգս իւրեանց, ըստ լեզո՛ւս իւրեանց, յաշխարհս իւրեանց, եւ ՚ի տոհմս իւրեանց։ 21Եւ Սեմայ ծնան որդիք եւ նորա, հօրն ամենայն որդւոցն Եբերայ, եղբօրն Յաբեթի երիցու։ 22Որդիք Սեմայ. Էլամ եւ Ասուր, Արփաքսադ եւ Լուդ, եւ Արամ։ 23Եւ որդիք Արամայ. Հուս, եւ Էմուղ, եւ Գադեր, եւ Մոսոք։ 24Եւ Արփաքսադ ծնաւ զՍաղա. եւ Սաղա ծնաւ զԵբեր։ 25Եւ Եբերայ ծնան երկու որդիք. անուն միոյն Փաղէկ. զի յաւուրս նորա բաժանեցաւ երկիր։ Եւ անուն եղբօր նորա Յեկտան։ 26Եւ Յեկտան ծնաւ զԷլմովդադ, եւ զՍաղէք, եւ զԱսարմովդ, եւ զՅարաք։ 27Եւ զՅոդորամ, եւ զԵզէլ, եւ զԴէկլա, 28եւ զԳեբաղ, եւ զԱբիմէէլ, եւ զՍաբեի, 29եւ զՈւփիր, եւ զԵւիղ՚ա, եւ զՅոբաբ։ Ամենեքեան սոքա որդիք Յեկտանայ։ 30Եւ եղեւ բնակութիւն նոցա ՚ի Մասեաց մինչեւ ՚ի գալ ՚ի Սովփերա լեառնն արեւելեայց։ 31Սոքա՛ են որդիք Սեմայ յազգս իւրեանց, ըստ լեզուս իւրեանց, յաշխարհս իւրեանց եւ ՚ի տոհմս իւրեանց։ 32Ա՛յս են ազգք որդւոց Նոյի ըստ ծնունդս իւրեանց ըստ տոհմս իւրեանց։ Եւ ՚ի սոցանէ սփռեցան կղզիք ազգաց ՚ի վերայ երկրի յե՛տ ջրհեղեղին։