1Եւ էր ամենայն երկիր՝ լեզու մի՛, եւ բարբառ մի՛ ամենեցուն։ 2Եւ եղեւ ՚ի խաղալն նոցա յարեւելից, գտին դա՛շտ մի յերկիրն Սէնաար, եւ բնակեցա՛ն անդ։ 3Եւ ասեն այր ցընկեր իւր. Եկա՛յք արկցուք աղիւս, եւ թրծեսցո՛ւք զայն հրով։ Եւ եղեւ նոցա աղիւսն ՚ի տեղի՛ քարի, եւ կուպր ՚ի տեղի՛ շաղախոյ։ 4Եւ ասեն եկա՛յք շինեսցուք մեզ քաղաք եւ աշտարակ, որոյ լինիցի գլուխն մինչեւ յերկինս. եւ արասցուք մեզ անուն յառա՛ջ քան զսփռել ՚ի վերայ երեսաց ամենայն երկրի։ 5Եւ էջ Տէր տեսանե՛լ զքաղաքն եւ զաշտարակն զոր շինէին որդիք մարդկան։ 6Եւ ասէ Տէր. Ահա՛ ազգ մի՛ եւ լեզու մի՛ ամենեցուն, եւ զայդ սկսան գործել։ Եւ արդ՝ ո՛չինչ պակասի ՚ի նոցանէ, զամենայն զոր ինչ յօժարեսցին գործել։ 7Եկա՛յք իջցուք եւ խառնակեսցո՛ւք անդ զլեզուս նոցա, զի մի՛ լսիցեն իւրաքանչիւր բարբառոյ ընկերի իւրոյ։ 8Եւ սփռեա՛ց զնոսա Տէր Աստուած անտի ընդ երեսս ամենայն երկրի, եւ դադարեցին ՚ի շինելոյ զքաղաքն եւ զաշտարակն։ 9Վասն այնորիկ կոչեցաւ անուն նորա Խառնակութիւն. զի ա՛նդ խառնակեաց Տէր Աստուած զլեզուս ամենայն երկրի. եւ անտի ցրուեաց զնոսա Տէր Աստուած ընդ երեսս ամենայն երկրի։

10Եւ ա՛յս են ծնունդք Սեմայ։ Սէմ որդի հարիւրեմեա՛ն էր յորժամ ծնաւ զԱրփաքսադ յերկրորդում ամի յետ ջրհեղեղին։ 11Եւ եկեաց Սէմ յետ ծնանելոյ նորա զԱրփաքսադ՝ ամս հինգհարիւր. եւ ծնաւ ուստերս եւ դստերս, եւ մեռաւ։ 12Եւ Արփաքսադ եկեաց ամս հարիւր երեսուն եւ հինգ, եւ ծնաւ զՍաղա։ 13Եւ եկեաց Արփաքսադ յետ ծնանելոյ նորա զՍաղա ամս երեքհարեւր եւ երեսուն. եւ ծնաւ ուստերս եւ դստերս, եւ մեռաւ։ 14Եւ եկեաց Սաղա ամս հարիւր երեսուն, եւ ծնաւ զԵբեր։ 15Եւ եկեաց Սաղա յետ ծնանելոյ նորա զԵբեր ամս երեքհարիւր երեսուն. եւ ծնաւ ուստերս եւ դստերս, եւ մեռաւ։ 16Եւ եկեաց Եբեր ամս հարիւր երեսուն եւ չորս, եւ ծնաւ զՓաղէկ։ 17Եւ եկեաց Եբեր յետ ծնանելոյ նորա զՓաղէկ, ամս երկերիւր եւ եւթանասուն. եւ ծնաւ ուստերս եւ դստերս, եւ մեռաւ։ 18Եւ եկեաց Փաղէկ ամս հարիւր երեսուն եւ չորս, եւ ծնաւ զՌագաւ։ 19Եւ եկեաց Փաղէկ յետ ծնանելոյ նորա զՌագաւ՝ ամս երկերիւր ինն. եւ ծնաւ ուստերս եւ դստերս, եւ մեռաւ։ 20Եւ եկեաց Ռագաւ ամս հարիւր երեսուն եւ երկու. եւ ծնաւ զՍերուք։ 21Եւ եկեաց Ռագաւ յետ ծնանելոյ նորա զՍերուք՝ ամս երկերիւր եւթն. եւ ծնաւ ուստերս եւ դստերս, եւ մեռաւ։ 22Եւ եկեաց Սերուք ամս հարիւր երեսուն, եւ ծնաւ զՆաքովր։ 23Եւ եկեաց Սերուք յետ ծնանելոյ նորա զՆաքովր՝ ամս երկերիւր, եւ ծնաւ ուստերս եւ դստերս, եւ մեռաւ։ 24Եւ եկեաց Նաքովր ամս եւթանասուն եւ ինն, եւ ծնաւ զԹարա։ 25Եւ եկեաց Նաքովր յետ ծնանելոյ նորա զԹարա՝ ամս հարիւր քսան եւ երկու. եւ ծնաւ ուստերս եւ դստերս, եւ մեռաւ։ 26Եւ եկեաց Թարա ամս եւթանասուն, եւ ծնաւ զԱբրա՛մ, եւ զՆաքովր, եւ զԱռան։ 27Ա՛յս են ծնունդք Թարայի։ Թարա ծնաւ զԱբրամ, եւ զՆաքովր, եւ զԱռան։ Եւ Առան ծնաւ զՂովտ։ 28Եւ մեռա՛ւ Առան առաջի Թարայի հօր իւրոյ, յերկրին յորում ծնաւ, յաշխարհին Քաղդեացւոց։ 29Եւ առին Աբրամ եւ Նաքովր իւրեանց կանայս. անուն կնոջն Աբրամու՝ Սարա, եւ անուն կնոջն Նաքովրայ՝ Մեղ՚քայ, դուստր Առանայ, հօր Մեղ՚քայ, եւ հօր՝ Յէսքայ։ 30Եւ էր Սարա ամուլ եւ ո՛չ ծնանէր։

31Եւ ա՛ռ Թարա զԱբրամ զորդի իւր, եւ զՆաքովր զորդի իւր, եւ զՂովտ որդի Առանայ որդւոյ իւրոյ. եւ զՍարա զնո՛ւ իւր զկին Աբրամու որդւոյ իւրոյ, եւ եհան զնոսա յաշխարհէն Քաղդեացւոց երթալ յերկիրն Քանանացւոց. եւ եկին մինչեւ ցԽառան, եւ բնակեցին անդ։ 32Եւ եղեն ամենայն աւուրք Թարայի ՚ի Խառան, ամք երկերեւր եւ հինգ. եւ մեռա՛ւ Թարա ՚ի Խառան։