1Եւ եղեւ յետ բանիցս այսոցիկ, փորձեա՛ց Աստուած զԱբրաամ՝ եւ ասէ ցնա. Աբրաա՛մ Աբրաա՛մ։ Եւ նա՛ ասէ. Ա՛ւասիկ եմ։ 2Եւ ասէ ցնա. Ա՛ռ դու զորդիդ քո սիրելի զոր սիրեցեր զԻսահակ, եւ գնա՛ դու յերկիր բարձր, եւ հանցես զդա անդ յողջակէզ ՚ի վերայ միոյ լերանց յորոց ասացից քեզ։ 3Եւ յարեաւ Աբրաամ ընդ առաւօտն, համետեաց զէշ իւր. եւ ա՛ռ ընդ իւր երկուս ծառայս. եւ զԻսահակ զորդի իւր. եւ պատառեաց փայտ յողջակէզ՝ եւ յարեաւ գնա՛ց. եւ եկն ՚ի տեղին զոր ասաց նմա Աստուած։ 4Եւ յաւուրն երրորդի համբարձ Աբրաամ զաչս իւր ※ եւ ետես զտեղին ՚ի հեռաստանէ։ 5Եւ ասէ Աբրաամ ցպատանիս իւր. Նստարո՛ւք դուք այդր հանդերձ իշովդ. եւ ես եւ պատանեակդ երթիցուք մինչեւ ցանդր, եւ երկի՛ր պագցուք եւ դարձցուք առ ձեզ։ 6Եւ ա՛ռ Աբրաամ զփայտ ողջակիզին, եւ եդ ՚ի վերայ Իսահակայ որդւոյ իւրոյ. եւ առ ՚ի ձեռն զսուրն եւ զհուրն. եւ գնացին երկոքեան ՚ի միասին։ 7Եւ ասէ Իսահակ ցԱբրաամ հայր իւր. Հա՛յր։ Եւ նա ասէ. Զի՞ է ո՛րդեակ։ Եւ նա ասէ. Ահա հուր՝ եւ ահա փայտ. ո՞ւր է ոչխար յողջակէզ։ 8Եւ նա ասէ. Աստուած տեսցէ իւր ոչխար յողջակէզ ո՛րդեակ։ Գնացին երկոքեան ՚ի միասին, 9եւ եկին ՚ի տեղին զոր ասաց նմա Աստուած։ Անդ շինեաց սեղան Աբրաամ. եւ ե՛դ ՚ի վերայ զփայտն։ Եւ կապեաց զԻսահակ զորդի իւր, եւ եդ զնա ՚ի սեղան ՚ի վերայ փայտին։ 10Եւ ձգեաց Աբրաամ զձեռն առնուլ զսուրն եւ զենուլ զորդին իւր։ 11Եւ կոչեաց զնա հրեշտակ Տեառն յերկնից՝ եւ ասէ. Աբրաա՛մ Աբրաա՛մ։ Եւ նա ասէ ցնա. Ա՛ւասիկ եմ։ 12Եւ ասէ. Մի՛ մխեր զձեռն քո ՚ի պատանեակդ, եւ մի՛ ինչ առներ դմա. զի այժմ գիտացի թէ երկիւղա՛ծ ես դու յԱստուծոյ, եւ ո՛չ խնայեցեր յորդիդ քո սիրելի վասն իմ։ 13Համբա՛րձ Աբրաամ զաչս իւր եւ ետես, եւ ահա խոյ մի կախեա՛լ կայր զծառոյն սաբեկայ զեղջերաց։ Եւ գնա՛ց Աբրաամ առ զխոյն, եւ եհան զնա յողջակէզ փոխանակ Իսահակայ որդւոյ իւրոյ։ 14Եւ կոչեաց Աբրաամ զանուն տեղւոյն այնորիկ Տէր ետես. զի ասիցեն ցա՛յսօր ՚ի լերինս յայսմիկ Տէր երեւեցաւ։ 15Եւ կոչեաց հրեշտակ Տեառն զԱբրաամ երկիցս անգամ յերկնից՝ եւ ասէ. 16Յա՛նձն իմ երդուայ՝ ասէ Տէր, փոխանակ զի արարե՛ր դու զբանդ զայդ, եւ ո՛չ խնայեցեր յորդիդ քո սիրելի վասն իմ. 17այո՛ օրհնելով օրհնեցի՛ց զքեզ, եւ բազմացուցանելով բազմացուցից զզաւակ քո որպէս զաստեղս երկնից բազմութեամբ. եւ որպէս զաւազ առ ափն ծովու. եւ ժառանգեսցէ՛ զաւակ քո զքաղաքս հակառակորդաց իւրոց։ 18Եւ օրհնեսցի՛ն ՚ի զաւակի քում ամենայն ազգք երկրի. փոխանակ զի լուա՛ր ձայնի իմում։ 19Դարձա՛ւ Աբրաամ առ պատանիսն իւր, եւ յարուցեալ գնացին ՚ի միասին ՚ի Ջրհորն երդման. եւ բնակեցաւ Աբրաամ առ Ջրհորովն երդման։

20Եւ եղեւ յետ բանիցս այսոցիկ, պատմեցաւ Աբրաամու, թէ ահա ծնաւ Մեղ՚քա եւ նա՛ որդիս Նաքովրայ եղբօր քում։ 21ԶՈվք զանդրանիկն նորա, եւ զԲաւ զեղբայր նորա, եւ զԿամուէլ հայր Ասորւոց, 22եւ զՔասադ, եւ զԱզաւ, եւ զՓաղդաս, եւ զՅետդափ, եւ զԲաթուէլ. 23եւ Բաթուէլ ծնաւ զՌեբեկա։ Ո՛ւթ սոքա որդիք՝ զորս ծնաւ Մեղ՚քա Նաքովրայ եղբօր Աբրաամու։ 24Եւ հա՛րճն նորին որոյ անուն էր Ռեմա, ծնաւ եւ նա զՏաբեկ, եւ զԳաամ, եւ զՏոքոս, եւ զՄովքա։