1Եւ յաւե՛լ Աբրաամ առնուլ կին որում անուն էր Քետտուրա։ 2Եւ ծնաւ նմա զԷմրան, եւ զՅեկտան, եւ զՄադան, եւ զՄադիան, եւ զԵսբոկ, եւ զՍովիւէ։ 3Եւ Յեկտան ծնաւ զՍաբա, եւ զԹեման, եւ զԴադան։ Եւ եղեն որդիք Դադանայ, Ռագուէլ, եւ Նաբդեէլ, եւ Ասուրիիմ, եւ Ղ՚ատուսիիմ, եւ Ղ՚ովոմիմ։ 4Եւ որդիք Մադիամու, Գեփար, եւ Ափեր, եւ Ենոք, եւ Աբիգա, եւ Եդրագա։ Ամենեքեան սոքա էին որդիք Քետուրայ։ 5Եւ ե՛տ Աբրաամ զամենայն ինչս իւր Իսահակա՛յ որդւոյ իւրում։ 6Եւ որդւոց հարճիցն իւրոց որ էին Աբրաամու, ե՛տ Աբրաամ պարգեւ՛ս. եւ արձակեա՛ց զնոսա յԻսահակայ որդւոյ իւրոյ մինչդեռ ինքն կենդանի էր՝ ընդ արեւելս յերկիրն արեւելից։ 7Եւ ա՛յս են ամք աւուրց կենացն Աբրաամու զորս եկեաց, հարիւր եւթանասուն եւ հինգ ամ։ 8Եւ պակասեալ Աբրաամու մեռա՛ւ ՚ի բարւոք ծերութեան, ալեւորեալ եւ լի՛ աւուրբք. եւ յաւելաւ առ ժողովուրդ իւր։ 9Եւ թաղեցին զնա Իսահակ եւ Իսմայէլ որդիք նորա, յայրի՛ անդ ՚ի կրկնում յագարակին Եփրոնի որդւոյ Սահառայ Քետացւոյ. որ է յանդիմա՛ն Մամբրէի. 10ագարա՛կն եւ այրն զոր ստացաւ Աբրաամ յորդւոցն Քետայ։ Ա՛նդ թաղեցին զԱբրաամ եւ զՍառա կին նորա։ 11Եւ եղեւ յետ մահուանն Աբրաամու, օրհնեա՛ց Աստուած զԻսահակ զորդի նորա։ Եւ բնակեցաւ Իսահակ առ Ջրհորի՛ տեսլեանն։

12Եւ ա՛յս են ծնունդք Իսմայելի որդւոյ Աբրաամու, զոր ծնաւ Ագա՛ր Եգիպտացի Աբրաամու՝ աղախինն Սառայի։ 13Եւ ա՛յս են անուանք որդւոցն Իսմայելի. ըստ անուանց ազգացն նորա։ Անդրանիկն Իսմայելի Նաբեովթ եւ Կեդար, եւ Աբդեէլ, եւ Մաբսամ, 14եւ Մասմա, եւ Իդումա, եւ Մասէ, 15եւ Քողդադ, եւ Թեմա, եւ Յետուր, եւ Նափէս, եւ Կեդմա։ 16Սոքա են որդիք Իսմայելի, եւ ա՛յս են անուանք նոցա ՚ի հանգրուանս իւրեանց, եւ ՚ի խորանս իւրեանց, երկոտասան իշխանք նոցա ըստ ազգաց իւրեանց։ 17Եւ ա՛յս են ամք կենաց Իսմայելի, հարիւր երեսուն եւ եւթն ամ. եւ պակասեալ մեռաւ, եւ յաւելաւ յազգ իւր։ 18Եւ բնակեցաւ յԵւիլայ մինչեւ ցՍուր որ է յանդիման Եգիպտոսի, մինչեւ ՚ի գալ յԱսորեստանեայս. յանդիման ամենայն եղբարց իւրոց բնակեցաւ։

19Եւ ա՛յս են ծնունդք Իսահակայ որդւոյ Աբրաամու. Աբրաամ ծնաւ զԻսահակ։ 20Եւ էր Իսահակ ամաց քառասնից յորժամ ա՛ռ զՌեբեկա զդուստր Բաթուելի Ասորւոյ, որ էր ՚ի Միջագետա՛ց Ասորւոց, զքոյր Լաբանու Ասորւոյ ի՛ւր ՚ի կնութեան։ 21Եւ աղաչէր Իսահակ զՏէր վասն Ռեբեկայ կնոջ իւրոյ՝ զի ամո՛ւլ էր։ Եւ լուա՛ւ նմա Աստուած. եւ յղեցաւ Ռեբեկա կին նորա։ 22Եւ խաղային մանկունք ՚ի նմա։ Եւ ասէ՝ եթէ այսպէս լինիցի ինձ, ընդէ՞ր իցէ ինձ այս։ Եւ գնա՛ց հարցանել ՚ի Տեառնէ։ 23Եւ ասէ ցնա Տէր. Երկո՛ւ ազգք են յարգանդի քում, եւ երկո՛ւ ժողովուրդք յորովայնէ քումմէ զատցին. եւ ժողովուրդ զժողովրդեամբ ելեւե՛լ առնիցէ, եւ երէցն կրտսերո՛յն ծառայեսցէ։ 24Եւ իբրեւ լցան նորա աւուրք ծնանելոյ. եւ էին երկո՛ւ որդիք յորովայնի նորա։ 25Եւ եկն ե՛լ որդին անդրանիկ շառագոյն ամենեւին՝ իբրեւ զմորթ թա՛ւ, եւ անուանեաց զանուն զորա Եսա՛ւ. եւ ապա ե՛լ եղբայր նորա, եւ ձեռն նորա ունէր զգարշապարէ Եսաւայ. եւ կոչեաց զանուն նորա Յակո՛բ։ 26Եւ Իսահակ էր ամաց վաթսնի՛ց՝ յորժամ ծնաւ զնոսա Ռեբեկա։ Եւ աճեցին մանկունքն։ 27Եւ էր Եսաւ՝ այր հմո՛ւտ որսոյ վայրա՛գ. եւ Յակոբ՝ այր առանց պաճուճանաց ընտասուն։ 28Եւ սիրեաց Իսահակ զԵսաւ, զի որս նորա կերակո՛ւր էր նմա. եւ Ռեբեկա սիրէր զՅակոբ։ 29Եւ էր եփեալ Յակոբայ թա՛ն. եւ եկն Եսաւ ՚ի դաշտէ՝ նքթեալ։ 30Եւ ասէ Եսաւ ցՅակոբ. Տո՛ւր ինձ ճաշակել ՚ի շիկաթանէ՛դ յայդմանէ, զի նքթեա՛լ եմ։ Վասն այնորիկ կոչեցաւ անուն նորա Եդոմ։ 31Եւ ասէ Յակոբ ցԵսաւ. Վաճառեա՛ ինձ այսօր զանդրանկութիւնս քո։ 32Եւ ասէ Եսաւ. Ահաւասիկ ես երթա՛մ ՚ի վախճանել, եւ առ իմէ՞ իցեն ինձ այն անդրանկութիւնք։ 33Եւ ասէ ցնա Յակոբ. Երդուի՛ր ինձ այսօր։ Եւ երդուա՛ւ նմա։ Եւ վաճառեաց Եսաւ զանդրանկութիւնս իւր Յակոբայ։ 34Եւ Յակոբ ետ Եսաւայ հա՛ց եւ թան ոսպնեայ. կերա՛ւ եւ արբ, եւ յարեաւ գնա՛ց։ Եւ անարգեա՛ց Եսաւ զանդրանկութիւնն։