1Եւ ասէ Աստուած ցՅակոբ. Արի ա՛նց ՚ի տեղին ՚ի Բեթէլ. եւ անդ բնակեսցես. եւ արասցես անդ սեղա՛ն Աստուծոյ որ երեւեցաւն քեզ ՚ի փախչելն քո յերեսաց Եսաւայ եղբօր քոյ։ 2Եւ ասէ Յակոբ ցընտանիսն իւր, եւ ցամենեսին որ ընդ նմա էին. ՚Ի բա՛ց առէք զաստուածսդ օտարոտիս որ ընդ ձե՛զ են ՚ի միջոյ ձերմէ, եւ սրբեցարո՛ւք. եւ փոխեցէ՛ք զպատմուճանս ձեր։ 3Եւ յարուցեալ ելցո՛ւք ՚ի Բեթէլ, եւ արասցուք անդ սեղան Աստուծոյ. որ լուաւ ինձ յաւուր նեղութեան, որ էր ընդ իս. եւ ապրեցոյց զիս ՚ի ճանապարհին՝ զոր գնացի։ 4Եւ ետուն ցՅակոբ զաստուածսն օտարոտիս որ էին ՚ի ձեռս նոցա, եւ զգինդս որ յականջս իւրեանց։ Եւ ծածկեաց զնոսա Յակոբ ՚ի ներքոյ բեւեկնոյն ՚ի Սիկիմ, ※ եւ կորոյս զնոսա մինչեւ ցայսօր ժամանակի։ 5Եւ չուեաց Իսրայէլ ՚ի Սիկիմայ. եւ եղեւ ա՛հ Աստուծոյ ՚ի վերայ քաղաքացն որ շուրջ զնովաւ. եւ ո՛չ ելին զհետ որդւոցն Իսրայէլի։ 6Եւ եկն Յակոբ ՚ի Լուզ՝ որ է յերկրին Քանանացւոց, այն ինքն է Բեթէլ, ինքն եւ ամենայն ժողովուրդն որ ընդ նմա։ 7Եւ շինեաց անդ սեղան. եւ կոչեաց զանուն տեղւոյն այնորիկ Բեթէլ. զի ա՛նդ երեւեցաւ նմա Աստուած ՚ի փախչել նորա յերեսաց Եսաւայ եղբօր իւրոյ։

8Եւ մեռա՛ւ Դէբովրա դայեկն Ռեբեկայ, եւ թաղեցաւ ՚ի ներքոյ Բեթելայ ընդ կաղնեաւն. եւ կոչեաց զանուն նորա Կաղնի՛ սգոյ։ 9Եւ երեւեցաւ Աստուած Յակոբայ՝ մինչդեռ ա՛նդ էր ՚ի Լուզ. յորժամ եկն ՚ի Միջագետաց Ասորոց։ Եւ օրհնեաց զնա Աստուած։ 10Եւ ասէ ցնա Աստուած. Անուն քո Յակոբ՝ ո՛չ եւս կոչեսցի Յակոբ, այլ Իսրայէ՛լ եղիցի անուն քո։ Եւ կոչեաց զանուն նորա Իսրայէլ։ 11Եւ ասէ ցնա Աստուած. Ե՛ս եմ Աստուած քո բաւական. աճեսջի՛ր եւ բազմասջի՛ր. ազգք եւ ժողովուրդք ազգաց եղիցին ՚ի քէն, եւ թագաւո՛րք յերանաց քոց ելցեն. 12եւ զերկիրդ զոր ետու Աբրաամու եւ Սահակայ՝ քե՛զ տաց զդա, քե՛զ եղիցի, եւ զաւակի քում յետ քո տաց զերկիրդ զայդ։ 13Եւ վերացաւ ՚ի նմանէ Աստուած ՚ի տեղւոջէն՝ ուր խօսեցաւ ընդ նմա։ 14Եւ կանգնեաց Յակոբ արձա՛ն ՚ի տեղւոջն ուր խօսեցաւ ընդ նմա, արձա՛ն քարեղէն. եւ նուիրեաց ՚ի նմա նուէ՛րս. եւ արկ ՚ի վերայ նորա եւղ։ 15Եւ կոչեաց զանուն տեղւոյն ուր խօսեցաւ ընդ նմա Աստուած՝ Բեթէ՛լ։

16Եւ չուեա՛ց ՚ի Բեթելայ։ Եւ եղեւ իբրեւ մերձեցաւ ՚ի Քաբրաթա երկիր, մտանել յԵփրաթա, ծնաւ Ռաքէլ։ 17Եւ դժուարածին եղեւ ՚ի ծննդեանն. եւ եղեւ ՚ի վշտանալն նորա ՚ի ծննդեանն, եւ ասէ ցնա ծնուցիչն. Քաջալերեա՛ց, զի եւ ա՛յդ եւս քո ո՛ւստր է։ 18Եւ եղեւ ընդ հանել ոգւոցն, քանզի մեռաւ, կոչեաց զանուն նորա Որդի վշտաց իմոց. եւ հայրն կոչեաց զնա Բենիամին։ 19Մեռա՛ւ Ռաքէլ՝ եւ թաղեցաւ ՚ի ճանապարհին Եփրաթայ. ա՛յն իսկ է Բեթղ՚ահէմ։ 20Եւ կանգնեաց Յակոբ արձա՛ն ՚ի վերայ շիրմին նորա, ա՛յն է արձան շիրմի Ռաքելայ մինչեւ ցայսօր ժամանակի։

21Եւ՝ չուեա՛ց Իսրայէլ՝ եւ էհար զխորան իւր յայնկոյս աշտարակին Գադերայ։ 22Եւ եղեւ իբրեւ բնակեաց Իսրայէլ յերկրին յայնմիկ. գնաց Ռոբէն՝ եւ ննջեաց ընդ Բալլայ հարճի հօր իւրոյ. լուաւ Իսրայէլ՝ եւ չար թուեցաւ առաջի նորա։ Եւ էին որդիք Յակոբայ երկոտասանք։ 23Որդիք Լիայ՝ անդրանիկ Յակոբայ՝ Ռոբէն. Շմաւոն. Ղեւի. Յուդայ. Իսաքար. Զաբողոն։ 24Եւ որդիք Բալլայ նաժշտի Ռաքելայ՝ Դան, եւ Նեփթաղիմ։ 25Եւ որդիք Զելփա նաժշտին Լիայ՝ Գադ եւ Ասեր։ 26Եւ որդիք Ռաքելի՝ Յովսէփ եւ Բենիամին։ Ա՛յս են որդիք Յակոբայ. որ եղեն նմա ՚ի Միջագետս Ասորւոց։ 27Եւ եկն Յակոբ առ Իսահակ հայր իւր ՚ի Մամբրէ՝ ՚ի քաղաք դաշտին. ա՛յն է Քեբրոն, յերկրին Քանանացւոց, ուր պանդխտեցան Աբրաամ եւ Իսահակ։ 28Եւ եղեն ամենայն աւուրք Իսահակայ՝ զոր եկեաց. ամք հարիւր ութսուն։ 29Եւ պակասեալ Իսահակայ մեռա՛ւ, եւ յաւելաւ յազգ իւր. ծերացեալ եւ լի՛ աւուրբք։ Եւ թաղեցին զնա Եսաւ եւ Յակոբ որդիք իւր։