1Եւ եկեալ Յովսէփ պատմեա՛ց փարաւոնի, եւ ասէ. Հա՛յր իմ եւ եղբարք, եւ խաշինք եւ արջառ նոցա, եւ ամենայն որ ինչ նոցա, եկին յերկրէն Քանանացւոց. եւ ահա են ՚ի Գեսեմ։ 2Եւ յեղբարց անտի իւրոց ա՛ռ ընդ իւր հինգ այր. եւ կացոյց զնոսա առաջի փարաւոնի։ 3Եւ ասէ փարաւոն ցեղբարսն Յովսեփու. Զի՞նչ գործ է ձեր։ Եւ նոքա ասեն ցփարաւոն. Հովի՛ւք խաշանց են ծառայք քո, եւ մե՛ք եւ հարք մեր։ 4Եւ ասեն ցփարաւոն. Պանդխտանալ եկաք յերկրիս յայսմիկ. զի ո՛չ գոյր ճարակ խաշանց ծառայից քոց, քանզի սաստկացա՛ւ սովն յերկրին Քանանացւոց. եւ արդ՝ բնակեսցուք ծառայք քո յերկրին ՚ի Գեսե՛մ։ 5Եւ խօսեցաւ փարաւոն ընդ Յովսեփու՝ եւ ասէ. Հայր քո եւ եղբարք քո եկին առ քեզ։ 6Ահա՝ երկիրս Եգիպտացւոց առաջի քո՛ է. ՚ի բարւո՛ք երկիր բնակեցո՛ զհայր քո եւ զեղբարս քո. եւ բնակեսցեն յերկրին Գեսե՛մ։ Ապա թէ գիտես եթէ իցեն ՚ի նոսա ա՛րք զօրաւորք, կացո՛ զնոսա իշխանս ՚ի վերայ իմոց խաշանց։ 7Եւ ած Յովսէփ զՅակոբ զհայր իւր, եւ կացո՛յց առաջի փարաւոնի։ Եւ օրհնեաց Յակոբ զփարաւոն։ 8Եւ ասէ փարաւոն ցՅակոբ. Քանի՞ են ամք աւուրց կենաց քոց։ 9Եւ ասէ Յակոբ ցփարաւոն. Աւուրք կենաց ամաց իմոց զորս պանդխտեցայ՝ հարիւր եւ երեսո՛ւն ա՛մ է. սակա՛ւք եւ դժուարինք եղեն աւուրք ամաց կենաց իմոց. եւ ո՛չ հասին յաւուրս ամաց կենաց հարց իմոց, զոր աւուրս պանդխտեցան։ 10Եւ օրհնեաց Յակոբ զփարաւոն՝ եւ ել ՚ի նմանէ։ 11Եւ բնակեցոյց Յովսէփ զհայրն իւր եւ զեղբարս իւր, եւ ետ նոցա բնակութիւն յերկրին Եգիպտացւոց ՚ի բարւո՛ք երկրի. յերկրին Ռամեսա. որպէս հրամայեաց փարաւոն։ 12Եւ տայր Յովսէփ ռոճիկս հօրն եւ եղբարց իւրոց. եւ ամենայն տան հօր իւրոյ ցորեան ըստ բերան։ 13Եւ կերակուր ո՛չ գոյր յամենայն երկրին, զի սաստկացա՛ւ սովն յոյժ. եւ նուաղեաց երկիրն Եգիպտացւոց եւ երկիրն Քանանացւոց ՚ի սովոյ անտի։

14Եւ ժողովեա՛ց Յովսէփ զամենայն արծաթ գտեալ յերկրին Եգիպտացւոց՝ եւ յերկրին Քանանացւոց, ընդ ցորենոյն զոր վաճառէր. եւ տայր նոցա կերակուրս։ Եւ տարաւ Յովսէփ զամենայն արծաթն ՚ի տուն փարաւոնի։ 15Եւ նուազեաց արծաթ յերկրէն Եգիպտացւոց, եւ յերկրէն Քանանացւոց։ Եկին ամենայն Եգիպտացիքն առ Յովսէփ՝ եւ ասեն. Տո՛ւր մեզ հաց, եւ ընդէ՞ր մեռանիմք առաջի քո. զի պակասեա՛ց արծաթ։ 16Ասէ ցնոսա Յովսէփ. Ածէ՛ք զանասունս ձեր, եւ տաց ձեզ հաց փոխանակ անասնոց ձերոց, եթէ պակասեաց արծաթ։ 17Եւ ածին զանասունսն առ Յովսէփ, եւ ետ նոցա Յովսէփ հաց. փոխանակ ձիո՛յ, եւ փոխանակ ոչխարի, եւ փոխանակ արջառոյ, եւ փոխանակ իշոյ. եւ կերակրեաց զնոսա հացիւ, փոխանակ ամենայն անասնոց նոցա յամին յայնմիկ։ Ե՛լ այն ամ, 18եւ եկին առ Յովսէփ յերկրորդ ամին՝ եւ ասեն ցնա. Գուցէ՛ սատակիցիմք ՚ի տեռնէ մերմէ. եթէ արծա՛թ էր՝ պակասեաց, եւ եթէ խաշինք եւ ստացուածք՝ առ քե՛զ են տէր. եւ չէ՛ ինչ մնացեալ մեր առաջի տեառն, բայց միայն անձինք եւ երկիրս մեր։ 19Արդ՝ զի մի՛ մեռանիցիմք առաջի քո եւ մեք, եւ երկիրս աւերիցի. ստացի՛ր զմեզ եւ զերկիրս մեր փոխանակ հացի. եղիցո՛ւք մեք եւ երկիրս մեր ծառայք փարաւոնի։ Տո՛ւր սերմն զի սերմանեսցուք, եւ կեցցուք՝ եւ մի՛ մեռցուք. եւ երկիրս մի՛ աւերեսցի։ 20Եւ ստացա՛ւ Յովսէփ զամենայն երկիրն Եգիպտացւոց փարաւոնի. քանզի վաճառեցին Եգիպտացիքն զերկիրն իւրեանց փարաւոնի. զի սաստկացա՛ւ ՚ի վերայ նոցա սովն։ Եւ եղեւ երկիրն փարաւոնի։ 21Եւ զժողովուրդն ծառայեցոյց իւր ՚ի ստրուկ, ՚ի ծագաց սահմանացն Եգիպտոսի մինչեւ ՚ի ծագս նորուն։ 22Բա՛ց յերկրէ քրմացն, զի ո՛չ ստացաւ զնոսա Յովսէփ. քանզի տալով տա՛յր պարգեւս քրմացն փարաւոնի. եւ ուտէին զպարգեւսն զոր տայր նոցա փարաւոն. վասն այնորիկ ո՛չ վաճառեցին զերկիրն իւրեանց։ 23Ասէ Յովսէփ ցամենայն Եգիպտացիսն. Ահա ստացա՛յ զձեզ այսօր եւ զերկիր ձեր փարաւոնի. առէ՛ք ձեզ սերմանս, եւ սերմանեցէք զերկիրդ. 24եւ եղիցին արդիւնք դորա։ Եւ տաջի՛ք զհինգերորդ մասն փարաւոնի. եւ չորք մասունքն ձե՛ր եղիցին, ՚ի սերմն երկրիդ, եւ ՚ի կերակուր ձեզ՝ եւ ամենայն ընտանեաց ձերոց, եւ ՚ի կերակուր տղայոց ձերոց։ 25Եւ ասեն. Կեցուցե՛ր զմեզ. գտաք շնորհս առաջի տեառն մերոյ. եւ եղիցուք ծառա՛յք փարաւոնի։ 26Եւ եդ նոցա օրէնս Յովսէփ մինչեւ ցայսօր յերկրին Եգիպտացւոց՝ հինգերորդե՛լ փարաւոնի. բա՛ց յերկրէ քրմացն որ չէր փարաւոնի։

27Եւ բնակեաց Իսրայէլ յերկրին Եգիպտացւոց յերկրին ՚ի Գեսեմ. եւ ժառանգեցին ՚ի նմա, եւ աճեցին եւ բազմացա՛ն յոյժ։ 28Եւ եկաց Յակոբ յերկրին Եգիպտացւոց ամս եւթն եւ տասն։ Եւ եղեն աւուրք Յակոբայ ամաց կենաց նորա՝ հարիւր եւ քառասուն եւ եւթն ամ։ 29Եւ մերձեցան աւուրք Իսրայէլի մեռանելոյ. եւ կոչեաց զորդի իւր զՅովսէփ՝ եւ ասէ ցնա. Եթէ գտի շնորհս առաջի քո, դի՛ր զձեռն քո ընդ երանօք իմովք. եւ արասցես ՚ի վերայ իմ ողորմութիւն եւ ճշմարտութիւն, չթաղե՛լ զիս յԵգիպտոս։ 30Այլ ննջեցից ընդ հարսն իմ. եւ բարձցեն զիս յԵգիպտոսէ, եւ թաղեսցեն զիս ՚ի գերեզմանի՛ նոցա։ Եւ նա ասէ. Ե՛ս արարից ըստ բանի քում։ 31Եւ ասէ. Երդուի՛ր ինձ։ Եւ երդուա՛ւ նմա։ Եւ երկի՛ր եպագ Իսրայէլ ՚ի վերայ գլխոյ գաւազանի իւրոյ։