1Կոչեա՛ց Յակոբ զորդիսն իւր եւ ասէ. Ժողովեցարո՛ւք, զի պատմեցից ձեզ ինչ որ պատահիցէ ձեզ ՚ի վախճանի աւուրց։ 2Ժողովեցարո՛ւք եւ լուարո՛ւք որդիք Յակոբայ. լուարո՛ւք Իսրայէլի հօր ձերում։ 3Ռոբէն անդրանիկ իմ. դո՛ւ զօրութիւն իմ եւ սկիզբն որդւոց իմոց։ Խստութեամբ գնացեր. եւ խստութեամբ յանդիմանութեամբ թշնամանեցեր։ 4Իբրեւ զջուր մի՛ եռասցիս. զի ելե՛ր յանկողինս հօր քոյ, յայնժամ պղծեցեր զանկողինս յոր ելեր։ 5Շմաւոն եւ Ղեւի եղբարք. կատարեցին զանիրաւութիւն ՚ի կամաց իւրեանց։ 6՚Ի խորհուրդս նոցա մի՛ մտցէ անձն իմ, եւ ՚ի ժողովս նոցա ո՛չ հաճեսցին միտք իմ. զի սրտմտութեամբ իւրեանց սպանին զարս, եւ ցանկութեամբ իւրեանց կարթակոտո՛ր արարին զցուլս։ 7Անիծեա՛լ սրտմտութիւն նոցա՝ զի յանդո՛ւգն էր, եւ ոխութիւն նոցա՝ զի խի՛ստ էր. բաժանեցից զնոսա ՚ի մէջ Յակոբայ. եւ ցրուեցից զնոսա ՚ի մէջ Իսրայէլի։ 8Յո՛ւդա՝ զքեզ օրհնեսցեն եղբարք քո։ Ձեռն քո ՚ի վերայ թիկանց թշնամեաց քոց. երկի՛ր պագցեն քեզ որդիք հօր քոյ։ 9Կորի՛ւն առիւծու Յո՛ւդա. ՚ի շառաւեղէ՛ ելեր որդեակ իմ, ելե՛ր բազմեցար, ննջեցեր իբրեւ զառեւծ, եւ իբրեւ զկորիւն առիւծու. ո՛ յարուցանէ զնա։ 10Մի՛ պակասեսցէ իշխան Յուդայ, եւ մի՛ պետ յերանաց նորա. մինչեւ եկեսցէ նա որոյ ի՛ւրն է հանդերձեալքն. եւ նա՛ է ակնկալութիւն հեթանոսաց։ 11Կապեսցէ՛ զորթոյ զյաւանակ իւր, եւ զգնդակէն զյաւանակ իշոյն. լուասցէ՛ գինւով զպատմուճան իւր, եւ արեա՛մբ խաղողոյ զհանդերձս իւր։ 12Զուարթագին են աչք նորա ՚ի գինւոյ. եւ սպիտա՛կ ատամունք իւր քան զկաթն։ 13Զաբողոն՝ յեզերս ծովո՛ւ բնակեսցէ, եւ ինքն նաւահանգիստ նաւաց. եւ ձգեսցի մինչեւ ՚ի Սիդոն։ 14Իսաքար՝ բարւո՛յ ցանկացաւ, հանգուցեալ ՚ի մէջ վիճակաց. 15տեսեալ զհանգիստն զի գեղեցիկ էր, եւ զերկիրն՝ զի պարարտ էր, եդ զուս իւր յաշխատել. եւ եղեւ ա՛յր արդիւնարար։ 16Դան՝ դատեսցէ զժողովուրդ իւր իբրեւ զմի՛ այր ՚ի մէջ Իսրայէլի. 17եւ եղիցի Դան՝ օձ դարանակալ ՚ի ճանապարհի, հարկանել զգարշապար երիվարի. եւ ընկենուլ զհեծեալն յետս, 18եւ մնալ փրկութեան Տեառն։ 19Գադ՝ հինի ելցէ. եւ ինքն ելցէ հինիւ զհետ նոցա։ 20Ասերայ՝ պարա՛րտ հաց իւր. եւ ինքն տացէ կերակուր իշխանաց։ 21Նեփթաղիմ ծա՛ռ բարձրացեալ, աճեցուցանե՛լ արմտեօք, զգեցուցանել արմտեօք զգեղեցկութիւն։ 22Որդեակ աճեցեալ Յովսէփ. որդեակ՝ աճեցեա՛լ նախանձելի. որդեակ իմ մատաղ առ իս դարձի՛ր. զոր բանսարկուքն բամբասէին, 23եւ դատափե՛տ առնէին։ Եւ ոխանային ընդ նմա ա՛րք աղեղանց. 24եւ փշրեցան զօրութեամբ աղեղունք իւրեանց, եւ լուծան ջիլք բազկաց նոցա ձեռամբ Հզօրին Յակոբայ։ Անտի՛ որ զօրացոյց զԻսրայէլ, 25յԱստուծոյ հօրն քոյ, եւ օգնեաց քեզ Աստուած իմ. եւ օրհնեաց զքեզ յօրհնութիւն երկնից ՚ի վերուստ. եւ զօրհնութիւն երկրի՝ լի՛ ամենայնիւ. վասն օրհնութեանց ստեանց եւ արգանդի 26օրհնութեանց հօր քոյ եւ մօր քոյ. որ զօրացան քան զօրհնութիւնս լերանց մշտնջենաւորաց, եւ քան զօրհնութիւնս բլրոց յաւիտենականաց. եղիցին ՚ի վերայ գլխոյ Յովսեփու, եւ ՚ի վերայ գլխոց եղբարցն որոց առաջնորդեաց։ 27Բենիամին՝ գա՛յլ յափշտակօղ, զայգո՛ւնն դեռեւս ուտիցէ. եւ առ երեկս բաշխեսցէ կերակուրս։ 28Ամենեքեան սոքա որդիք Յակոբայ՝ ազգք երկոտասան. եւ ա՛յս է զոր խօսեցաւ ընդ նոսա հայրն իւրեանց, եւ օրհնեաց զնոսա։ Իւրաքանչիւր ըստ օրհնութեան իւրում 29օրհնեաց զնոսա։ Եւ պատուիրեաց նոցա, եւ ասէ ցնոսա. Ես յաւելո՛ւմ առ ժողովուրդ իմ։ Թաղեցէ՛ք զիս ընդ հարս իմ յայրի անդ՝ որ է յագարակին Եփրոնի Քետացւոյ. յայրին ※ որ յանդի անդ է ՚ի կրկնում, 30յանդիման Մամբրէի յերկրին Քանանացւոց՝ զոր ստացաւ Աբրաամ յԵփրոնէ Քետացւոյ ՚ի ստացուածս շիրմի։ 31Ա՛նդ թաղեցին զԱբրաամ եւ զՍառա կին նորա։ Ա՛նդ թաղեցին զԻսահակ եւ զՌեբեկա կին նորա։ Ա՛նդ թաղեցին զԼիա ՚ի ստացուածի ագարակին եւ այրին որ է ՚ի նմա առ ՚ի յորդւոցն Քետայ։ 32Եւ դադարեա՛ց Յակոբ ՚ի պատուիրելոյ որդւոցն իւրոց։ Եւ առեալ զոտսն իւր անդէն ՚ի մահիճսն՝ պակասեաց. եւ յաւելաւ առ ժողովուրդ իւր։