1Նորոգեցարո՛ւք առ իս կղզիք. զի իշխանք նորոգեսցին զօրութեամբ. մերձեսցին՝ խօսեսցին միանգամայն, եւ ապա զիրաւունս պատմեսցեն։ 2Ո՞ զարթոյց յարեւելից զարդարութիւն, եւ կոչեա՛ց զնա զհետ իւր. երթիցէ եւ տացէ հատուցումն յանդիման հեթանոսաց. զարհուրեցուսցէ զթագաւորս, եւ տացէ հողոյ զսուրս նոցա. եւ իբրեւ զխռիւ մերժեսցէ զնետս նոցա։ 3Եւ արասցէ զնոսա փախստականս. եւ անցցէ խաղաղութեամբ զճանապարհս ոտից իւրոց։ Արդ՝ ասիցէ՞ք թէ ո՛չ գայցէ. 4ո՞ ազդեաց՝ եւ արար զայս ամենայն. կոչեաց զնա՝ որ կոչէրն յազգացն առաջնոց։ Ե՛ս Տէր առաջին, եւ ես նո՛յն եմ առ յապա։ 5Տեսի՛ն զիս հեթանոսք՝ եւ երկեա՛ն. եւ սարսեցին ամենայն ծագք երկրի. մերձեցան եւ եկի՛ն ՚ի միասին. 6եդին ՚ի մտի իւրաքանչիւր ընդ ընկերի եւ ընդ եղբօր օգնակա՛ն լինել. եւ ասիցեն. 7Քաջալերեսցէ հեւսն զդարբին, կռել կոփել ո՛ւռն հարկանել. եւ ասիցէ նպաստ բարի եղեւ ինձ։ Եւ բեւեռեցին զնոսա բեւեռօք, եւ դիցեն ՚ի գետնի, եւ ո՛չ շարժեսցին։ 8Բայց դո՛ւ Իսրայէլ ծառայ իմ, Յակովբ՝ զոր ընտրեցի. զաւակդ Աբրահամու՝ զոր սիրեցի. 9որում օգնական եղէ ՚ի ծագաց երկրի. եւ ՚ի գիտաց նորա կոչեցի զքեզ, եւ ասացի թէ ծառա՛յ իմ ես դու եւ ընտրեցի զքեզ, եւ ո՛չ թողից զքեզ։ 10Մի՛ երկնչիր՝ զի ընդ քեզ եմ. մի՛ խաբիր՝ զի ես եմ Աստուած քո, որ զօրացուցի զքեզ. եւ օգնեցի քեզ, եւ զգուշացայ քեզ աջով արդարութեան իմոյ։ 11Ահաւադիկ ամաչեսցեն՝ եւ պատկառեսցեն ամենայն հակառակորդք քո, եւ եղիցին նոքա իբրեւ զչեղեալս. եւ կորիցեն ամենայն դատախազք քո։ 12Խնդրեսցես զնոսա, եւ ո՛չ գտցես զմարդսն որ թշնամանիցեն զքեզ. եւ եղիցին իբրեւ զչեղեալս պատերազմողքն քո։ 13Զի ես եմ Տէր Աստուած քո, որ ունիմ զաջոյ ձեռանէ քումմէ, որ ասեմ ցքեզ՝ թէ մի՛ երկնչիր. ես օգնեցից քեզ։ 14Մի՛ երկնչիր, որդնդ Յակոբեան զածածդ Իսրայէլեան. ե՛ս օգնեցի քեզ ասէ Աստուած՝ որ փրկելոցն է զքեզ Սուրբն Իսրայէլի։

15Ահաւասիկ արարի զքեզ իբրեւ զանիւս նո՛րս սղոցաձեւ կամնասայլից. կասեսցես զլերինս, եւ մանրեսցես զբլուրս. եւ արասցես զնոսա իբրեւ զփոշի, 16եւ հոսեսցես. հո՛ղմք առցեն զնոսա, եւ մրրիկք ցրուեսցեն։ Բայց դու ուրա՛խ լիցիս ՚ի Տէր՝ ՚ի Սրբութիւնս Իսրայէլի։ 17Եւ ցնծասցեն տնանկք եւ կարօտեալք որ խնդրէին ջուր, եւ ո՛չ գտանէին. եւ լեզուք նոցա ՚ի ծարաւոյ ցամաքէին. ես Տէր Աստուած լուայց նոցա, Աստուած Իսրայէլի, եւ ո՛չ թողից զնոսա։ 18Այլ բացից գետս ՚ի վերայ լերանց, եւ ՚ի մէջ դաշտաց աղբեւրս. արարից զանապատն ՚ի ճահիճս ջուրց, եւ զերկիրն ծարաւուտ ՚ի վտակս։ 19Եւ բղխեցուցից յանջուր երկրին զմայրն, եւ զտաւսախն, զմուրտն, եւ զնոճն, եւ զսաւսն. զսարդն, եւ զսարոյն, եւ զկաղամախն, զգին, եւ զփայտն իւղոյ։ 20Զի տեսցեն եւ գիտասցեն եւ ծանիցեն եւ իմասցի՛ն ՚ի միասին՝ թէ ձեռն Տեառն արա՛ր զայս ամենայն, եւ Սուրբն Իսրայէլի հաստատեաց։ 21Մերձեա՛լ են իրաւունք ձեր՝ ասէ Տէր Աստուած. մերձեա՛լ են իրաւունք ձեր՝ ասէ Թագաւորն Յակովբայ։ 22Մերձեսցին եւ պատմեսցեն ձեզ որ ինչ անցք անցանելոց իցեն։ Եւ կամ զառաջինսն թէ զի՛նչ են՝ ասացէ՛ք. ՚ի մտի դիցուք, եւ գիտասցուք զի՞նչ առաջին կամ զի՞նչ առ յապա։ 23Ասացէ՛ք մեզ. պատմեցէ՛ք մեզ որ ինչ ՚ի վախճանի լինիցի, եւ գիտասցուք. եթէ աստուածք իցէք՝ բարի՛ արարէք, չա՛ր արարէք. զի տեսցուք ※ միանգամայն եւ զարմասցուք՝ թէ ուստի իցէք դուք, 24եւ ուստի՞ գործած ձեր. զի յերկրէ պիղծս ընտրեցին զձեզ։ 25Բայց ես զարթուցից զհիւսիսայինն, եւ զարեւելեայն. կոչեսցին յանուն իմ. եկեսցեն իշխանք. եւ իբրեւ զկաւ բրտի զոր բրուտն կոխէ՝ ա՛յնպէս կոխիցիք։ 26Ո՞ պատմեսցէ զայն՝ որ իսկզբանէ՛ն է, զի գիտասցուք. եւ զեւ՛ս յառաջագոյնսն, եւ ասասցուք, թէ ճշմարի՛տ է. չի՛ք որ ասէ յառաջագոյն, եւ ո՛չ որ լսէ զբանս ձեր։ 27Սկի՛զբն արարից զՍիովն, եւ զԵրուսաղէմ մխիթարեցի՛ց ՚ի ճանապարհի. 28զի ՚ի հեթանոսաց աւադիկ ո՛չ ոք է, եւ ՚ի կռոց նոցա ո՛չ ոք է որ պատմէ. եւ եթէ հարցի՛ց եւս զնոսա թէ ուստի՛ էք, ո՛չ տացեն ինձ պատասխանի։ 29Զի ընդունա՛յն են որ առնեն զձեզ, եւ սնոտի՛ են որ ստեղծանեն զձեզ։