1Ա՛յսպէս ասէ Տէր. Ո՞ւր է թուղթն ապահարզանի որով արձակեցի զմայրն ձեր. կամ ո՞ւր է գրաւական վաճառականացն, որով վաճառեցի զձեզ. այլ ՚ի մեղս ձեր վաճառեցայք. եւ վասն անօրէնութեանց ձերոց արձակեցի զմայրն ձեր։ 2Զի եկի, եւ ո՛չ գոյր մարդ. կոչեցի՝ եւ ո՛չ ոք էր որ լսէր. միթէ ո՞չ կարէ փրկել ձեռն իմ. կամ ո՞չ զօրեմ ապրեցուցանել. ահա կշտամբութեամբ իմով աւերեցի զծով, եւ զգետս ապականեցից. եւ ցամաքեսցի՛ն ձկունք նոցա ՚ի ջուրցն պակասութենէ. եւ մեռցին ՚ի ծարաւոյ։ 3Զգեցուցի՛ց զերկինս խաւարաւ, եւ իբրեւ զքո՛ւրձ արարից զհանդերձ նոցա։ 4Տէր Տէր տա՛յ ինձ լեզու խրատու, զի գիտացից խօսե՛լ ՚ի ժամու զբանն. պատրաստեաց զիս ընդ առաւօտս. յաւե՛լ ինձ ունկն ՚ի լսել. 5եւ խրատ Տեառն բանայ զականջս իմ. եւ ես ո՛չ խստանամ եւ ո՛չ ընդդէմ դառնամ։ 6Զթիկունս իմ ետո՛ւ ՚ի հարուածս, եւ զծնօտս իմ յապտակս. եւ զերեսս իմ ո՛չ դարձուցի յամօթոյ ընդ երեսս թքանելոյ։ 7Եւ Տէր Տէր եղեւ իմ օգնական. վասն այնորիկ ո՛չ ամաչեցի, այլ արարի զդէմս իմ իբրեւ զվէ՛մ հաստատուն։ Եւ գիտացի թէ ո՛չ ամաչեցից. 8զի մե՛րձ է որ արդարացուցանէ զիս. ո՞վ է ոսոխն իմ, եկեսցէ եւ կացցէ՛ ՚ի մէջ. եւ ո՞վ է որ դատին զիս, մերձեսցի առ իս։ 9Զի ահաւասիկ Տէր Տէր օգնակա՛ն է ինձ, ո՞վ է որ չարչարիցէն զիս։ Ահաւադիկ դուք ամենեքեան իբրեւ զձորձս հնասջիք, եւ ցեց մեցամէ՛ս կերիցէ զձեզ։ 10Ո՞վ իցէ ՚ի ձէնջ որ երկնչի ՚ի Տեառնէ, լուիցէ՛ զձայն ծառայի նորա. որ գնային ընդ խաւար՝ եւ ո՛չ գոյր նոցա լոյս. յուսացեալք յանուն Տեառն եւ խրախուսեալք յԱստուած։ 11Ահաւադիկ դուք ամենեքեան հո՛ւրբ վառեալ պարտեսջիք իբրեւ ՚ի բոցոյ. գնասջիք ՚ի լոյս հրո՛յ ձերոյ, եւ բորբոքեսջիք բոցով. վասն ի՛մ եղեւ ձեզ այդ, եւ ՚ի տրտմութեան ննջեսջիք։