1Զարթի՛ր զարթի՛ր Սիովն. զգեցի՛ր զզօրութիւն քո Սիովն. եւ դու զգեցի՛ր զփառս քո Երուսաղէմ քաղաքդ սուրբ. զի ո՛չ եւս յաւելցեն անցանել ընդ քեզ պիղծք եւ անթլփատք։ 2Թօթափեա՛ զփոշիդ, յո՛տն կաց եւ նի՛ստ Երուսաղէմ. լո՛յծ զկապ պարանոցի քոյ գերիդ դուստր Սիովնի։ 3Զի ա՛յսպէս ասէ Տէր. Ձրի՛ վաճառեցայք, եւ ո՛չ արծաթով փրկեսջիք։ 4Ա՛յսպէս ասէ Տէր. Յերկի՛րն Եգիպտացւոց էջ ժողովուրդ իմ զառաջինն՝ բնակել անդ նժդեհութեամբ. եւ յԱսորեստան բռնութեամբ վարեցան. 5եւ արդ՝ ընդէ՞ր էք աստ։ Ա՛յսպէս ասէ Տէր. զի՞ վարեցաւ ժողովուրդն իմ ձրի. զարմացեա՛լ էին եւ լային։ Ա՛յսպէս ասէ Տէր. Վասն ձե՛ր անուն իմ հանապազ հայհոյի ՚ի մէջ հեթանոսաց։ 6Վասն այնորիկ ծանիցէ՛ ժողովուրդ իմ զանուն իմ յաւուր յայնմիկ. թէ ես նո՛յն եմ որ խօսէին, եւ արդ եկի հասի՛։

7Իբրեւ զի գեղեցի՛կ են ՚ի վերայ լերանց ոտք աւետարանչի համբաւուն խաղաղութեան, իբրեւ աւետարանչի՛ բարութեանց. զի լսելի՛ արարից զփրկութիւն քո, ասել ցՍիոն թէ թագաւորեսցէ քեզ Աստուած։ 8Զի ձայն պահապանաց քոց բարձրացաւ, եւ ՚ի նո՛յն բարբառ առ հասարա՛կ ցնծասցեն. զի դէմ յանդիմա՛ն տեսցեն զժամանակ յորում ողորմեսցի Տէր Սիովնի։ 9Լերինք գոչեսցեն աւերակօքն հանդերձ Երուսաղեմի զցնծութիւն. զի ողորմեցա՛ւ նմա Տէր, եւ փրկեաց զԵրուսաղէմ։ 10Եւ յայտնի արասցէ Տէր զբազուկ իւր սուրբ առաջի ամենայն ազգաց. եւ տեսցեն ամենայն ծագք երկրի զփրկութիւն Աստուծոյ մերոյ։ 11՚Ի բա՛ց կացէք, ՚ի բա՛ց կացէք. ելէ՛ք այտի, եւ ՚ի պիղծս մի՛ մերձենայք. ելէ՛ք ՚ի միջոյ նոցա, եւ մեկնեցարո՛ւք՝ որ բարձեալ բերէք զսպաս Տեառն։ 12Զի ո՛չ խռովութեամբ ելջիք, եւ ո՛չ փախստեամբ գնասջիք. զի առաջի ձեր Տէր ինքնի՛ն գնասցէ, եւ որ ժողովէն զձեզ Աստուած Իսրայէլի։

13Ահաւադիկ ՚ի մի՛տ առցէ մանուկ իմ. վերասցի՛ եւ բարձրասցի եւ փառաւորեսցի՛ յոյժ։ 14Զոր օրինակ զարմասցին բազումք ՚ի վերայ քո, ա՛յնպէս անշքեսցի տեսիլ քո ՚ի մարդկանէ, եւ փառք քո յորդւոց ՚ի մարդկանէ։ 15Ա՛յնպէս զարմասցին ազգք բազումք ՚ի վերայ քո, եւ կարկեսցե՛ն թագաւորք զբերանս իւրեանց. զի որոց ո՛չ պատմեցաւ վասն նորա՝ տեսցեն, եւ որոց չիցէ՛ լուեալ ՚ի մի՛տ առցեն։