1Ուրա՛խ լեր ամուլ որ ո՛չ ծնանէիր. գոչեա՛ եւ աղաղակեա՛ որ ո՛չդ երկնէիր. զի բազում են որդիք սկնդկիդ՝ առաւե՛լ քան զարամբւոյն։ Քանզի ասաց Տէր. 2Ընդարձակեա՛ զտեղի խորանաց քոց, եւ զսրահից քոց. կանգնեա՛, եւ մի՛ խնայեար. երկայնեա՛ զապաւանդակս քո. հաստատեա՛ զցիցս քո. 3յաջ եւ յահեակ թռուսջիր, եւ զաւակ քո զհեթանոսս ժառանգեսցէ. եւ զքաղաքս աւերեալս շինեսցես։ 4Մի՛ երկնչիցիս զի յամօթ արարին զքեզ. մի՛ պատկառեսցես զի նախատեցին զքեզ. զի զամօթն յաւիտենից մոռասցիս, եւ նախատինք այրութեան քոյ ո՛չ եւս յուշ լիցին քեզ։ 5Զի Տէր է որ առնէ քեզ զայդ. Տէր Սաբաւովթ անուն է նորա. եւ որ փրկեացն զքեզ նո՛յն Աստուած Իսրայէլի ամենայն երկրի կոչեսցի։ 6Ո՛չ եթէ իբրեւ զկին մի լքեալ տարակուսեալ կոչեաց զքեզ Տէր. եւ ո՛չ իբրեւ զկին մի ատեցեալ ՚ի մանկութենէ. այլ ասաց Աստուած. 7Առ ժամանակ մի թողի զքեզ, եւ ողորմութեամբ մեծաւ ողորմեցայց քեզ։ 8Առ փոքր մի սրտմտութեան դարձուցի զերեսս իմ ՚ի քէն, եւ ողորմութեամբ յաւիտենից ողորմեցայց քեզ. ասա՛ց որ փրկեացն զքեզ Տէր։ 9Եւ ՚ի ջուրցն հեղեղէ առ Նոյիւ՝ ա՛յս է ինձ, եւ որպէս երդուայն նմա ՚ի ժամանակին յայնմիկ չբարկանա՛լ երկրի, նո՛յնպէս եւ ո՛չ քեզ։ 10Եւ ո՛չ սպառնալեօք իմովք շարժել զլերինս, եւ փոփոխել զբլուրս. ո՛չ ողորմութիւն իմ պակասեսցէ ՚ի քէն, եւ ո՛չ ուխտ խաղաղութեան քոյ անցցէ։ Ասա՛ց Տէր. 11Հաշտեա՛լ եմ ընդ քեզ տառապեալդ եւ խախտեալ, մինչեւ մխիթարեսցիս. ահաւասիկ պատրաստեալ եմ կարկեհան զքարի՛նս քո, եւ զհիմունս քո շափիղա։ 12Եւ կանգնեցից զաշտարակս քո յասպիս, եւ զդրունս քո յականց վանեայց. եւ ածից շուրջ զքեւ պարիսպ յընտիր ընտիր ականց պատուականաց. 13եւ զամենայն որդիս քո փրկեալս յԱստուծոյ, եւ ՚ի բազում խաղաղութեան մանկունք քո. 14եւ արդարութեամբ շինեսջիր։ ՚Ի բա՛ց լեր յանիրաւէ անտի, եւ ո՛չ երկիցես. եւ դողումն ՚ի քեզ ո՛չ մերձեսցի. 15զի ահաւասիկ եկք՝ առ քեզ վասն իմ մերձեսցին. եւ առ քեզ պանդխտեսցին, եւ զքե՛զ ապաստան արասցեն։ 16Ահաւասիկ՝ ես հաստատեցի զքեզ. ո՛չ որպէս դարբին մի որ փքովք կայծակունս արծարծանէ եւ յառաջ բերէ անօթս ՚ի գործ, այլ ես հաստատեցի զքեզ ո՛չ ՚ի կորուստ ապականութեան։ 17Ամենայն անօթ վնասակար ՚ի քեզ ո՛չ աջողեսցի. եւ զամենայն բարբառ որ յարիցէ ՚ի վերայ քո ՚ի դատաստան, պարտեսցե՛ս. եւ ամենայն դատախազք քո ՚ի նմին։ Զի գո՛յ ժառանգութիւն պաշտօնէից Տեառն. եւ դուք եղիցիք ինձ իրաւացիք՝ ասէ Տէր։