1Պատգամն Աստուծոյ, որ եղեւ ՚ի վերայ Երեմիայի Քեղկեայ, ՚ի քահանայի՛ց անտի՝ որ բնակեալ էր յԱնաթովթ յերկրին Բենիամինի։ 2Առ որ եղեւ բան Տեառն յաւուրս Յովսիայ որդւոյ Ամոնայ արքայի Հրէաստանի. յերեքտասաներորդի ամի թագաւորութեան նորա։ 3Եւ եղեւ յաւուրս Յովակիմայ որդւոյ Յովսիայ արքայի Հրէաստանի, մինչեւ ՚ի վախճան մետասաներորդի ամին Սեդեկիայ որդւոյ Յովսիայ արքայի Յուդայ՝ ցգերութիւնն Երուսաղեմի, յամսեանն հինգերորդի։ 4Եղեւ բան Տեառն առ իս եւ ասէ. 5Մինչչեւ՛ ստեղծեալ էիր յորովայնի, գիտե՛մ զքեզ. եւ մինչչեւ՛ ելեալ էիր յարգանդէ, սրբեցի՛ զքեզ. մարգարէ՛ ՚ի հեթանոսս եդի՛ զքեզ։ 6Եւ ասեմ. Որ ե՛սդ Տէր Տէր. ահաւասիկ եւ խօսել իսկ ո՛չ գիտեմ, զի մանո՛ւկ եմ ես։ 7Եւ ասէ ցիս Տէր. Մի՛ ասեր եթէ մանուկ եմ ես. զի առ ամենեսեան առ որս առաքեցից զքեզ՝ երթիցե՛ս. եւ ըստ ամենայնի զոր միանգամ պատուիրեցից քեզ՝ խօսեսցի՛ս։ 8Մի՛ երկիցես յերեսաց նոցա՝ զի ընդ քե՛զ եմ ՚ի փրկել զքեզ՝ ասէ Տէր։ 9Եւ ձգեաց Տէր զձեռն իւր առ իս՝ եւ մերձեցո՛յց ՚ի բերան իմ, եւ ասէ ցիս. Ահա ետո՛ւ զբանս իմ ՚ի բերան քո. 10ահա՛ կացուցի՛ զքեզ այսօր ՚ի վերայ ազգաց եւ թագաւորութեան, խլել եւ բրել, կորուսանել եւ յատակել, շինել եւ տնկել։ 11Եւ եղեւ բա՛ն Տեառն առ իս՝ եւ ասէ. Զի՞նչ տեսանես Երեմիա։ Եւ ասեմ. Գաւազան ընգուզի՛ տեսանեմ ես։ 12Եւ ասէ ցիս Տէր. Բարւո՛ք տեսանես. զի զարթուցեալ եմ ՚ի բանս իմ առնե՛լ զնոսա։ 13Եւ եղեւ բան Տեառն առ իս կրկի՛ն անգամ եւ ասէ. Զի՞նչ տեսանես։ Եւ ասեմ. Կատսա՛ յեռանդան տեսանեմ ես, եւ երեսք նորա յերեսաց հիւսւսոյ։ 14Եւ ասէ ցիս Տէր. Յերեսա՛ց հիւսւսոյ բորբոքեսցին չարիք ՚ի վերայ բնակչաց երկրի։ 15Զի ահաւասիկ ես միախուռն կոչեցից զամենայն թագաւորութիւնս թագաւորութեանց՝ ՚ի հիւսւսոյ երկրէ՝ ասէ Տէր. եկեսցեն եւ արկցեն զիւրաքանչիւր աթոռ ՚ի վերայ սեմոց դրանցն Երուսաղեմի, եւ ՚ի վերայ ամենայն պարսպացն նորա շուրջանակի, եւ ՚ի վերայ ամենայն քաղաքաց Հրէաստանի։ 16Եւ խօսեցայց դատաստանա՛ւ ընդ նոսա վասն ամենայն չարեաց իւրեանց. զի թողին զիս եւ զոհեցին աստուածո՛ց օտարաց, եւ երկի՛ր պագին գործոց ձեռաց իւրեանց։ 17Եւ դու պնդեա՛ զմէջ քո, արի՛ եւ ասա՛ նոցա զամենայն զոր միանգամ ես պատուիրե՛մ քեզ. մի՛ երկիցես յերեսաց նոցա, եւ մի՛ զանգիտիցե՛ս առաջի նոցա. զի ընդ քե՛զ եմ ես՝ ՚ի փրկել զքեզ ասէ Տէր։ 18Բայց ես ահաւադիկ եդի՛ զքեզ այսօր իբրեւ զքաղա՛ք ամուր. եւ իբրեւ զսիւն երկաթի, եւ իբրեւ զպարիսպ պղնձի ամուր, ամենայն թագաւորաց Հրէաստանի եւ իշխանա՛ց նորա, եւ քահանայից նորա, եւ ժողովրդեան երկրին։ 19Եւ մարտիցեն ընդ քեզ՝ եւ քեզ ինչ ո՛չ կարիցեն ստնանել. զի ես ընդ քե՛զ եմ ՚ի փրկել զքեզ ասէ Տէր։