1Յամին իններորդի Սեդեկիա արքայի Յուդայ՝ յամսեանն տասներորդի. եկն եհաս Նաբուքոդոնոսոր արքայ Բաբելացւոց, ինքն եւ ամենայն զօրք իւր յԵրուսաղէմ, եւ պաշարեցին զնա։ 2Եւ յամին մետասաներորդի Սեդեկիայ՝ յամսեանն չորրորդի՝ որ օր ի՛նն էր ամսոյն, պատառեցաւ քաղաքն. 3եւ մտին ամենայն զօրավարք արքային Բաբելացւոց, եւ նստան ՚ի դրանն միջնումն. Ներգեղ՚, Սարասար, Սարմագադ, Նաբուսարսեքիմ, Ռափսարիս. եւ Ներգեղ՚, Սարասար, Ռաբմագ. եւ ամենայն ա՛յլ եւս իշխանք արքային Բաբելացւոց։ 4Եւ եղեւ իբրեւ ետես զնոսա Սեդեկիա արքայ Յուդայ, եւ ամենայն արք պատերազմօղք. փախեան եւ ելին գիշերի ՚ի քաղաքէ անտի ընդ ճանապարհ բուրաստանին արքունի, ընդ դուռնն որ էր ՚ի մէջ պարսպացն. եւ ելին ընդ ճանապարհն Արաբիայ։ 5Եւ զհե՛տ եղեն նոցա զօրք Քաղդեացւոցն, եւ հասին Սեդեկիայ յԱրաբովթ Երիքովայ. կալան զնա՝ եւ ածին առ Նաբուքոդոնոսոր արքայ Բաբելացւոց ՚ի Գեբղաթա յերկիրն Եմաթայ։ Եւ խօսեցաւ ընդ նմա դատաստանօք. 6եւ սպա՛ն արքայն Բաբելացւոց զորդիսն Սեդեկիայ ՚ի Դեբղաթա առաջի նորա. եւ զամենայն ազատսն Յուդայ կոտորեաց արքայն Բաբելացւոց։ 7Եւ զաչսն Սեդեկիայ կուրացոյց, եւ կապեաց զնա պղնձի շղթայիւք տանե՛լ զնա ՚ի Բաբելովն։ 8Եւ զտուն թագաւորին եւ զտունս ժողովրդեանն, այրեցին Քաղդեացիքն հրով, եւ զպարիսպն Երուսաղեմի քակեցին։ 9Եւ զմնացորդս ժողովրդեանն որ մնացին ՚ի քաղաքին, եւ զանկեալսն որ անկան ՚ի նա. եւ զսինլքորսն ժողովրդեանն որ մնացին, խաղացո՛յց Նաբուզարդան դահճապետ ՚ի Բաբելոն։ 10Եւ յաղքատաց ժողովրդեանն՝ որոց ո՛չ ինչ գոյր, եթո՛ղ Նաբուզարդան դահճապետ անդրէն յերկրին Յուդայ. եւ ետ նոցա այգիս եւ ջրարբիս յաւուր յայնմիկ։ 11Եւ ետ պատուիրանաւ Նաբուքոդոնոսոր արքայ Բաբելացւոց զԵրեմիա ՚ի ձեռս Նաբուզարդանայ դահճապետին եւ ասէ. 12Ա՛ռ զդա՝ եւ ա՛կն ած ՚ի վերայ դորա, եւ մի՛ ինչ արասցես դմա չար. այլ զոր ինչ ասասցէ ցքեզ՝ արասցե՛ս դմա։ 13Եւ առաքեցին Նաբուզարդան դահճապետ, եւ Նաբուսազաբան ներքինապետ, եւ Ներգեղ եւ Սարասար. եւ Ռոբոգոմ, եւ ամենայն մեծամեծք արքային Բաբելացւոց. 14եւ առին զԵրեմիա ՚ի բանտէ անտի, եւ ետուն ցԳոդողիա որդի Աքիկամայ՝ որդւոյ Սափանայ, եւ հանին զնա ՚ի տունն. եւ ա՛նդ նստէր ՚ի մէջ ժողովրդեանն։

15Եւ առ Երեմիա եղեւ բա՛ն Տեառն՝ մինչ էր ՚ի նեղութեանն ՚ի սրահի բանտին՝ եւ ասէ. 16Ե՛րթ եւ ասա՛ ցԱբդամելէք Եթւովպացի. Ա՛յսպէս ասէ Տէր զօրութեանց Աստուած Իսրայէլի. Ահաւադիկ ածե՛մ ես զբանն իմ ՚ի վերայ քաղաքիդ այդորիկ ՚ի չարի՛ս եւ ո՛չ ՚ի բարիս. եւ եղիցի առաջի աչաց քոց յաւուր յայնմիկ։ 17Եւ զքեզ փրկեցից յաւուր յայնմիկ՝ ասէ Տէր, եւ ո՛չ տաց զքեզ ՚ի ձեռս արանցն յորոց դու երկնչիս յերեսաց նոցա։ 18Զի ապրեցուցանելով ապրեցուցից զքեզ, եւ ՚ի սուր մի՛ անկցիս. եւ եղիցի քեզ անձն քո ՚ի գի՛ւտս, զի յուսացար յիս՝ ասէ Տէր։