1Եւ եղեւ յամսեանն եւթներորդի՝ եկն Իսմայէլ որդի Նաթանայ, որդւոյ Ելիսամայ յազգէ թագաւորին, եւ ծառայք թագաւորին, եւ տասն այր ընդ նմա առ Գոդողիա որդի Աքիկամայ ՚ի Մասեփա. եւ կերան հաց ՚ի միասին ՚ի Մասեփա։ 2Եւ յարեաւ Իսմայէլ որդի Նաթանայ, եւ տասնեքին արքն որ ընդ նմա, եւ եհար զԳոդողիա որդի Աքիկամայ որդւոյ Սափանայ սրով՝ եւ սպա՛ն զնա. զոր կացուցեալ էր արքային Բաբելացւոց ՚ի վերայ երկրին. 3եւ զամենայն Հրէայսն որ էին ընդ Գոդողիայ ՚ի Մասեփա, եւ զամենայն Քաղդեացիս որ անդ գտան զարս պատերազմօղս, կոտորեաց Իսմայէլ։ 4Եւ եղեւ յերկրորդում աւուր սպանանելոյ անդ զԳոդողիա. եւ ո՛չ ոք գիտէր։ 5Եկի՛ն արք ՚ի Սիւքիմայ, եւ ՚ի Սաղեմայ, եւ ՚ի Շամրնէ, արք ութսուն. գերծեալ զմօրուս եւ պատառեալ զհանդերձս՝ կոծելով, եւ մաննա եւ կնդրուկ ՚ի ձեռս նոցա տանել ՚ի տուն Տեառն։ 6Եւ ել Իսմայէլ որդի Նաթանայ ընդ առաջ նոցա ՚ի Մասեփայ, երթալո՛վ երթայր եւ լա՛յր. եւ եղեւ իբրեւ մերձեցաւ ՚ի նոսա՝ ասէ ցնոսա. Մտէ՛ք առ Գոդողիա որդի Աքիկամայ։ 7Եւ եղեւ իբրեւ մտին ՚ի մէջ քաղաքին, կոտորեաց զնոսա Իսմայէլ որդի Նաթանայ ՚ի մէջ քաղաքին, եւ ամա՛ց ՚ի ջրհոր՝ ինքն եւ արքն որ ընդ նմա։ 8Եւ արք տասն գտան անդ, եւ ասեն ցԻսմայէլ. Մի՛ սպանաներ զմեզ, զի գոն մեզ գանձք ՚ի բացի, ցորեան եւ գարի՝ մեղր եւ եւղ։ Եւ զա՛նց արար եւ ո՛չ սպան զնոսա ՚ի մէջ եղբարց իւրեանց։ 9Եւ ջրհորն յոր ամաց Իսմայէլ զամենայն մարմինս արանցն զոր կոտորեաց վասն Գոդողիա, ջրհոր մեծ էր՝ զոր արար արքայ Ասա յերեսաց Բաասայ արքայի Իսրայէլի. զայն ելի՛ց Իսմայէլ որդի Նաթանայ վիրաւորօք։ 10Եւ դարձոյց Իսմայէլ զամենայն ժողովուրդն որ մնացեալ էր ՚ի Մասեփա. եւ զդստերս թագաւորին հանդերձ ամենայն սինլքորօք ժողովրդեանն որ էին ՚ի Մասեփա. զորս յանձնարարեա՛լ էր Նաբուզարդանայ դահճապետի Գոդողիայ որդւոյ Աքիկամայ. եւ կանխեաց Իսմայէլ որդի Նաթանայ ընդ առաւօտս, եւ գնաց յա՛յն կոյս առ որդիսն Ամովնայ։

11Եւ լուաւ Յովնան որդի Կարէի՝ եւ ամենայն զօրավարք զօրացն որ ընդ նմա էին՝ զամենայն չարիսն զոր գործեաց Իսմայէլ որդի Նաթանայ. 12ժողովեցին զամենայն զօրականն իւրեանց, եւ խաղացին երթալ տալ պատերազմ ընդ Իսմայելի որդւոյ Նաթանայ. եւ գտին զնա ՚ի վերայ ջուրցն բազմաց որ էին ՚ի Գաբաւոն։ 13Եւ եղեւ իբրեւ տեսին ամենայն ժողովուրդն որ էին ընդ Իսմայելի, զՅովնան որդի Կարէի, եւ զամենայն զօրավարս զօրացն որ էին ընդ նմա՝ ուրա՛խ եղեն։ 14Եւ դարձան առ նոսա ամենայն ժողովուրդն զոր գերեաց Իսմայէլ ՚ի Մասեփայ, եւ եկին առ Յովնան որդի Կարէի։ 15Բայց Իսմայէլ որդի Նաթանայ՝ ապրեցաւ ութ արամբք յերեսացն Յովնանայ, եւ անկաւ առ որդիսն Ամովնայ։ 16Եւ ա՛ռ Յովնան որդի Կարէի, եւ ամենայն զօրավարք զօրացն որ էին ընդ նմա, զամենայն մնացորդս ժողովրդեանն զորս թափեաց յԻսմայելէ յորդւոյ Նաթանայ ՚ի Մասեփայ. յետ սպանանելոյն զԳոդողիա որդի Աքիկամայ զարս հզօրս պատերազմօղս, եւ զկանայս, եւ զայլս, եւ զներքինիս, զոր ա՛ռ յերկրէն Գաբաւոնացւոց, 17եւ գնաց. եւ նստան յերկրին Բերութքամայ հանդէպ Բեթղահէմի, երթալ մտանել յերկիրն Եգիպտացւոց. 18յերեսաց Քաղդեացւոցն. քանզի զահի՛ հարան յերեսաց նոցա. զի սպան Իսմայէլ զԳոդողիա որդի Աքիկամայ՝ զոր կացո՛յց արքայն Բաբելացւոց ՚ի վերայ երկրին։