1՚Ի վերայ Բաբելացւոց։ Բանն զոր խօսեցաւ Տէր ՚ի վերայ Բաբելոնի, առ երկիրն Քաղդեացւոց ՚ի ձեռն Երեմիայ մարգարէի։ 2Պատմեցէ՛ք յազգս՝ եւ լո՛ւ արարէք. նշան կանգնեցէ՛ք, լսելի՛ արարէք. մի՛ ծածկիցէք. ասասջի՛ք առ Բաբելոն. յամօ՛թ եղեւ Բէլ. փափուկքն աներկեւղք. մատնեցաւ Մեովդաք. յամօ՛թ եղեն կուռք նորա. ամաչեցին գարշելիք նորա։ 3Զի ե՛լ ՚ի վերայ նորա ա՛զգ ՚ի հիւսւսոյ. նա՛ դիցէ զերկիր նորա յապականութիւն. եւ ո՛չ ոք իցէ որ բնակիցէ ՚ի նմա ՚ի մարդոյ մինչեւ յանասուն, զի խախտեցան եւ գնացի՛ն։ 4Յաւուրսն յայնոսիկ, եւ ՚ի ժամանակին յայնմիկ ասէ Տէր՝ եկեսցեն որդիքն Իսրայէլի. ինքեա՛նք եւ որդիքն Յուդայ ՚ի միասին, շրջեսցին եւ լալով գայցեն առ Տէր Աստուած իւրեանց. խնդրեսցեն 5մինչեւ ՚ի Սիոն, հարցցեն զճանապարհէ, ա՛յսր դիմեսցեն, եւ եկեսցեն՝ եւ ապաւինեսցին ՚ի Տէր. զի ուխտ յաւիտենի՛ց է՝ եւ ո՛չ մոռասցին։ 6Իբրեւ զոչխարս կորուսեալս եղեւ ժողովուրդ իմ. հովիւք նոցա մերժեցին զնոսա ՚ի վերայ լերանց, մոլորեցուցին զնոսա ՚ի լեռնէ ՚ի բլուր, գնացին մոռացան զմակաղատեղս իւրեանց։ 7Ամենեքեան որ գտանէին՝ սատակէին զնոսա. թշնամիք նոցա ասացին. Մի՛ ներեսցուք նոցա. փոխանակ զի մեղա՛ն Տեառն. արօտք արդարութեան է, եւ Տեառն որ ժողովեաց զհարսն նոցա։ 8Օտարացարո՛ւք ՚ի միջոյ Բաբելոնի. եւ յերկրէդ Բաբելացւոց ելէ՛ք, եւ եղերո՛ւք իբրեւ զվիշապս առաջի խաշանց։ 9Զի ահաւասիկ ես յարուցից՝ եւ ածից ՚ի վերայ Բաբելացւոց զժողովս ազգաց մեծամեծաց յերկրէ հիւսւսոյ, եւ ճակատեսցին զնովաւ. եւ անտի ըմբռնեսցի. իբրեւ նետ՝ իմաստուն պատերազմողի որ ո՛չ դարձցի ունայն։ 10Եւ եղիցի երկիրն Քաղդեացւոց յաւար. եւ ամենայն աւարառուքն նորա յագեսցին՝ ասէ Տէր. զի ուրա՛խ լինէիք եւ պարծէիք յափշտակել զժառանգութիւն իմ. 11զի խայտայիք իբրեւ զուարա՛կս ՚ի վերայ դալարոյ, եւ ոգորէիք իբրեւ զցուլս։ 12Յամօ՛թ եղեւ մայրն ձեր յոյժ. մա՛յրն որ ՚ի բարութեան էր. ահաւադիկ վախճան ազգաց՝ աւեր, անջուրք, եւ անապատ՝ 13՚ի բարկութենէ Տեառն. եւ մի՛ բնակեսցի, այլ եղիցի յապականութիւն առ հասարակ. եւ ամենայն որ անցանիցէ ընդ Բաբելոն՝ տրտմեսցի, եւ շչեսցէ ՚ի վերայ ամենայն հարուածոց նորա։ 14Ճակատեցարո՛ւք շուրջ զԲաբելոնիւ ամենայն աղեղնաւորք. ձի՛գ դիք ՚ի նա, եւ մի՛ խնայէք ՚ի նետս ձեր՝ զի Տեառն մեղաւ։ 15Խրախո՛յս բարձէք շուրջ զնովաւ, զի լքա՛ն ձեռք իւր. անկա՛ն մահարձանք՝ եւ կործանեցան պարիսպք նորա՝ զի վրէժխնդրութիւն յԱստուծոյ է. խնդրեցէ՛ք վրէժս ՚ի դմանէ. որպէս արարն՝ արարէ՛ք դմա։ 16Սատակեցէ՛ք զզաւակ ՚ի Բաբելոնէ. եւ առնուցու մանգաղ ՚ի ժամանակի հնձոց. յերեսաց Յունական սրոյն իւրաքանչիւր ՚ի ժողովո՛ւրդ իւր դարձցին, եւ իւրաքանչիւր յերկի՛ր իւր փախիցեն։ 17Ոչխար մոլորեալ Իսրայէլ. առեւծք մերժեցին զնա. նա՛խ եկեր զնա թագաւորն Ասորեստանեայց, եւ յետոյ զոսկերս նորա արքայն Բաբելացւոց։ 18Վասն այդորիկ ա՛յսպէս ասէ Տէր զօրութեանց Աստուած Իսրայէլի. Ահաւասիկ ես խնդրեցից վրէ՛ժ յարքայէն Բաբելացւոց եւ յերկրէ՛ նորա, որպէս խնդրեցի վրէժ յարքայէն Ասորեստանեայց։ 19Եւ պատսպարեցուցից զԻսրայէլ անդրէն ՚ի ճարակս իւր. եւ արածեսցի ՚ի Կարմելոս, եւ ՚ի Բասան, եւ ՚ի լերինն Եփրեմի, եւ ՚ի Գաղաադ. եւ յագեսցին անձինք նոցա։ 20Յաւուրսն յայնոսիկ, եւ ՚ի ժամանակին յայնմիկ՝ ասէ Տէր, խնդրեսցեն զանիրաւութիւնն Իսրայէլի, եւ ո՛չ եւս իցէ. եւ զմեղս Յուդայ՝ եւ ո՛չ գտանիցեն. զի քաւի՛չ եղէց անիրաւութեանց նոցա 21՚ի վերայ երկրի։ Ե՛լ դառնութեամբ ՚ի վերայ նորա, եւ ՚ի բնակչաց նորա խնդրեսջիր վրէժս. սո՛ւր եւ ապականութիւն զկնի նորա՝ ասէ Տէր. եւ արասջի՛ր ըստ ամենայնի զոր պատուիրեցի քեզ։ 22Ձա՛յն պատերազմի յերկրէն Քաղդէացւոց, եւ բեկումն մեծ։ 23Զիա՞րդ խորտակեցաւ եւ մանրեցաւ ուռնն ամենայն երկրի. զիա՞րդ եղեւ Բաբելոն յապականութիւն ՚ի մէջ ազգաց։ 24Յարձակեսցի՛ն ՚ի վերայ, եւ ըմբռնեսցիս՝ Բաբելոն, եւ ո՛չ իմասցիս. գտար եւ ըմբռնեցա՛ր, զի Տեառն ընդդէմ դարձար։ 25Եբա՛ց Տէր զգանձս իւր, եւ եհան զանօթս բարկութեան իւրոյ. զի գործ Տեառն զօրութեանց է յերկրին Քաղդեացւոց։ 26Եկին հասին նմա ժամանակք իւր. բացէ՛ք զշտեմարանս նորա. որոնեցէ՛ք զնա իբրեւ զայրս, եւ սատակեցէ՛ք զնա. մի՛ մնասցեն նոցա մնացորդք։ 27Ցամաքեցուցէ՛ք զամենայն պտուղս նորա, եւ իջցեն ՚ի սպանո՛ւմն. վա՛յ նոցա՝ զի ե՛կն օր նոցա, եւ ժամանակ վրէժխնդրութեան նոցա։ 28Ձա՛յն փախուցելոց եւ ապրելոց յերկրէն Քաղդեացւոց, պատմե՛լ ՚ի Սիովն զվրէժխնդրութիւն ՚ի Տեառնէ Աստուծոյ մերմէ, զվրէժխնդրութիւն տաճարի իւրոյ։ 29Պատուէ՛ր տուք բազմաց ՚ի վերայ Բաբելոնի, ամենայն աղեղնաւորաց՝ թէ բանակեցարո՛ւք զդովաւ շուրջանակի. զի մի՛ ոք իցէ որ ապրիցի ՚ի դմանէ. հատուցէ՛ք դմա ըստ գործոց իւրոց, ըստ ամենայնի զոր արար՝ արարէ՛ք դմա. զի Տեառն ընդդէմ դարձաւ, Աստուծոյ Սրբոյն Իսրայէլի։ 30Վասն այնորիկ անկցին երիտասարդք նորա ՚ի հրապարակս նորա, եւ ամենայն արք պատերազմօղք նորա անկեալ դնիցին յաւուր յայնմիկ՝ ասէ Տէր։ 31Ահաւասիկ ես ՚ի վերայ քո՝ ասէ Տէր զօրութեանց, ՚ի վերայ հպարտիդ. զի հասեա՛լ է օր քո՝ եւ ժամանակ վրէժխնդրութեան քոյ։ 32Եւ տկարասցի հպարտութիւն քո, եւ կործանեսցի. եւ ո՛չ ոք իցէ որ յարուցանիցէ զնա. եւ վառեցից հո՛ւր յանտառս նորա, եւ կերիցէ շուրջ զնովաւ զամենայն։ 33Ա՛յսպէս ասէ Տէր զօրութեանց. Բռնադատեցան որդիքն Իսրայէլի եւ որդիքն Յուդայ. ամենեքեան որ գերեցին զնոսա, բռնաբարեցին զնոսա, եւ ո՛չ կամէին արձակել զնոսա։ 34Որ փրկեաց զնոսա Հզօրն. Տէր ամենակալ անուն է նորա. դատեսցի՛ դատաստան ընդ ոսոխս իւր. զի բարձցէ զերկիրն, եւ զայրասցի՛ բնակչաց Բաբելովնի։ 35Սո՛ւր ՚ի վերայ Քաղդեացւոցն՝ ասէ Տէր. եւ ՚ի վերայ բնակչացն Բաբելովնի, եւ ՚ի վերայ ամենայն մեծամեծաց նորա, եւ ՚ի վերայ խորհրդակցաց նորա։ 36Սո՛ւր ՚ի վերայ ըղձութեանց նորա, եւ բարձցին. սո՛ւր ՚ի վերայ պատերազմողաց նորա, եւ լքցին։ 37Սո՛ւր ՚ի վերայ երիվարաց եւ կառաց նորա. սո՛ւր ՚ի վերայ նահատակաց նոցա, եւ ՚ի վերայ ամենայն խառնաղանճիցն որ ՚ի մէջ նորա՝ եւ եղիցին իբրեւ զկանա՛յս։ Սուր ՚ի վերայ գանձուց նորա, եւ յափշտակեսցին։ 38Սո՛ւր ՚ի վերայ ջուրց նորա, եւ ամաչեսցեն. զի երկիր դրօշելո՛ց է. եւ ՚ի վերայ կղզեացն որովք պարծէին։ 39Վասն այնորիկ ճիւա՛ղք բնակեսցեն ՚ի կղզիսն, եւ բնակեսցեն ՚ի նմա դստերք համբարեաց. եւ մի՛ եւս շինեսցի ՚ի սպառ, եւ մի՛ եւս բնակեսցէ յաւիտեան. 40որպէս սատակեաց Աստուած զերկիրն Սոդոմացւոց եւ Գոմորացւոց, եւ զսահմանակիցս նորա՝ ասէ Տէր, եւ մի՛ բնակեսցէ անդ մարդ, եւ մի՛ պանդխտեսցի ՚ի նմա որդի մարդոյ։ 41Ահաւասիկ գո՛ւնդ գայ ՚ի հիւսիսոյ, եւ ա՛զգ մեծ. եւ թագաւորք բազումք զարթիցեն ՚ի ծագաց երկրէ։ 42Աղեղն եւ վաղակաւո՛ր ՚ի ձեռին իւրում ժպի՛րհ է, եւ մի՛ ողորմեսցի. ձա՛յն նոցա իբրեւ զծով գոչեսցէ. հեծեալք յերիվարս, պատրաստեալք իբրեւ զհուր ՚ի պատերազմ ՚ի վերայ քո դո՛ւստր Բաբելացւոց։ 43Լուաւ զլուր նոցա արքայն Բաբելացւոց, եւ լքան ձեռք նորա. նեղութիւն տագնապեա՛ց զնա, երկունք իբրեւ ծննդականի։ 44Ահաւադիկ իբրեւ զառեւծ ելցէ ՚ի յորձանացն Յորդանանու ՚ի տեղին Եթամայ. զի երագերա՛գ հալածեցից զնա ՚ի նմանէ. եւ զամենայն երիտասարդս յարուցից ՚ի վերայ նորա։ Զի ո՞վ ոք է իբրեւ զիս. եւ ո՞վ ընդդէմ դառնայցէ ինձ. եւ ո՞վ ոք հովիւ կայցէ հակառակ։ 45Վասն այդորիկ լուարո՛ւք զխորհուրդ Տեառն զոր խորհեցաւ ՚ի վերայ Բաբելովնի, եւ զխորհուրդս նորա զոր խորհեցաւ ՚ի վերայ բնակչաց Քաղդէացւոց. Եթէ ո՞չ ապականեցէք զգառինս հօտից նոցա. եթէ ոչ ապականիցին ՚ի նոցանէ արօտք. 46զի ՚ի ձայնէ կործանման Բաբելոնի շարժեսցի՛ երկիր, եւ գոյժ նորա լուիցի՛ ՚ի հեթանոսս։