1Քսան եւ մի ամաց էր Սեդեկիա արքայ ՚ի թագաւորել իւրում. եւ մետասան ամ թագաւորեաց յԵրուսաղէմ, եւ անուն մօր նորա Ամիտաաղ դուստր Երեմիայ ՚ի Ղուբենայ։ 2Եւ արար չա՛ր առաջի Տեառն, որպէս արար Յովակիմ։ 3Զի ՚ի ցասումն Տեառն էր Երուսաղէմ եւ Յուդայ, մինչեւ մերժեաց զնոսա յերեսաց իւրոց. եւ ապստամբեաց Սեդեկիա յարքայէն Բաբելացւոց։ 4Եւ եղեւ յիններորդի ամի թագաւորութեան նորա, եւ յամսեանն տասներորդի որ օր տասն էր ամսոյն. ե՛կն Նաբուքոդոնոսոր արքայ Բաբելացւոց ամենայն զօրօք իւրովք յԵրուսաղէմ, եւ պաշարեաց զնա. եւ շինեաց շուրջ զնովաւ պարիսպ առ պարիսպ՝ ՚ի չորեքկուսի վիմաց։ 5Եւ եհաս քաղաքն ՚ի նեղութիւն մինչեւ յամն մետասաներորդի Սեդեկիայ արքայի, 6եւ յամիսն չորրորդ՝ որ օր ինն էր ամսոյն. եւ զօրացա՛ւ սով ՚ի քաղաքին. եւ ո՛չ գտանէր հաց ուտելոյ ժողովրդեան երկրին։ 7Եւ խրամատեցաւ քաղաքն, եւ ամենայն արք պատերազմօղք փախեա՛ն, եւ ելին ՚ի քաղաքէ անտի ՚ի գիշերի ընդ ճանապարհ դրանն՝ ընդ պարիսպ եւ ընդ պատուհան, ընդ կողմն պարտիզին արքունի. եւ Քաղդեացիքն շուրջ զքաղաքաւն էին. եւ գնացին ընդ ճանապարհս Արաբացւոց։ 8Եւ զհետ եղեն զօրք թագաւորին Քաղդեացւոց, եւ հասին Սեդեկիա՛յ արքայի յանցս Երիքովի. եւ ամենայն ծառայք նորա ցրուեցան ՚ի նմանէ։ 9Եւ կալան զթագաւորն եւ ածին առ արքայն Բաբելացւոց ՚ի Դեբլաթա յերկիրն Եմաթայ. եւ խօսեցաւ ընդ նմա դատաստանօք։ 10Եւ կոտորեաց արքայն Բաբելացւոց զորդիսն Սեդեկիայ յանդիման նորա. եւ զամենայն իշխանս Յուդայ կոտորեաց ՚ի Դեբլաթա. 11եւ զաչսն Սեդեկիայ կուրացո՛յց. եւ կապեաց զնա ձեռակապօք. եւ տարաւ զնա արքայն Բաբելացւոց ՚ի Բաբելոն, եւ եդ զնա ՚ի տուն աղօրեաց, մինչեւ յօր մահուան իւրոյ։ 12Եւ յամսեանն հինգերորդի որ օր տասն էր ամսոյն. ա՛յն ամ իննուտա՛սն էր Նաբուքոդոնոսորայ արքային Բաբելացւոց. եկն Նաբուզարդան դահճապետ որ կայր առաջի արքային Բաբելացւոց. 13եւ հրձի՛գ արար զտունն Տեառն, եւ զապարանսն արքունի, եւ զամենայն տունս քաղաքին. եւ զամենայն ապարանս մեծամեծս այրեաց հրով։ 14Եւ զամենայն պարիսպսն Երուսաղեմի շուրջանակի՝ ամենայն զօրօք Քաղդեացւոց քակեցի՛ն որ էին ընդ դահճապետին։ 15Բայց յաղքատաց ժողովրդեանն եւ ՚ի մնացորդաց, եւ զսինլքորսն որ մնացին ՚ի քաղաքին. եւ զփախստականս որ փախեան առ արքայն Բաբելացւոց, եւ զմնացորդս ժողովրդեանն եթո՛ղ Նաբուզարդան դահճապետ։ 16Եւ յաղքատաց երկրին եթող Նաբուզարդան դահճապետ յայգեգործս եւ յարդիւնարարս։ 17Եւ զսիւնսն պղնձիս տան Տեառն, եւ զխարիսխսն, եւ զծովն պղնձի որ էր ՚ի տան Տեառն՝ խորտակեցին Քաղդէացիքն, եւ խաղացուցին զամենայն պղինձն ՚ի Բաբելոն։ 18Եւ զոտսն եւ զվերնախարիսխսն, եւ զպսակսն, եւ զտաշտսն, եւ զմսահանսն. եւ զամենայն կահ պղնձի որովք առնէին սպաս՝ ա՛ռ. 19եւ զապփովթն, եւ զամասարակովթ, եւ զպարզուտսն, եւ զաշտանակսն, եւ զճաշակսն. եւ զտուփսն, որ ոսկի՝ ոսկի, եւ որ արծաթի՝ արծաթի, ա՛ռ դահճապետն։ 20Եւ սիւնք երկո՛ւ էին, եւ ծով մի. եւ ցուլքն երկոտասան էին որ կային ընդ ծովուն. զորս արար արքայ Սողոմոն ՚ի տան Տեառն. եւ ո՛չ գոյր չափ պղնձոյն, եւ ամենայն կահին պղնձոյ։ 21Եւ սեանցն՝ երեսուն եւ հինգ կանգո՛ւն էր բարձրութիւն միո՛յ միո՛յ սեան. եւ մանեակ յերկոտասան կանգնոյ շուրջ զնովաւ. եւ թանձրութիւն նորա շուրջ առ չորս մասունս. 22եւ ախաւեղագէսք նորա պղնձիք. եւ բարձրութիւն միոյ ախաւեղագիսին, ՚ի հի՛նգ կանգնոյ. եւ վանդակապատք եւ նռնաձեւք ՚ի վերայ ահաւեղագիսին շուրջ շրջանակաւ՝ ամենայն պղնձի. ըստ նմին օրինակի եւ երկրորդի սեանն, ութ նռնաձեւ, կանգուն առ կանգուն, յերկոտասան կանգնոյ։ 23Եւ էին նռնաձեւք իննսուն եւ վեց, ՚ի միոջէ կողմանէ. եւ էին ամենայն նռնաձեւքն հարեւր ՚ի վերայ վանդակին շուրջանակի։ 24Եւ ա՛ռ դահճապետն զՍարեա զքահանայ զգլխաւորն, եւ զՍոփոնիա զերկրորդ, եւ երիս բարապանս. 25եւ ՚ի քաղաքէ անտի ա՛ռ ներքինի մի, որ էր ոստիկան արանց պատերազմողաց. եւ եւթն այր անուանի որ կային առաջի թագաւորին՝ գտեա՛լս ՚ի քաղաքին. եւ զդպրապետն զիշխան զօրացն, եւ զդպրապետ ժողովրդեան երկրին, եւ վաթսուն այր ՚ի ժողովրդենէ երկրին՝ որ գտա՛ն ՚ի քաղաքին։ 26Եւ ա՛ռ զնոսա Նաբուզարդան դահճապետ, եւ տարաւ առ արքայն Բաբելացւոց ՚ի Դեբլաթա։ 27Եւ եհա՛ր զնոսա արքայն Բաբելացւոց, եւ սպան զնոսա ՚ի Դեբլաթա յերկրին Եմաթայ։ Եւ գերեցաւ Յուդայ անդո՛ւստ յերկրէ իւրմէ։ 28Եւ ա՛յս ժողովուրդ է զոր գերեաց Նաբուքոդոնոսոր արքայ՝ Յամին եւթներորդի ՚ի Հրէից երի՛ս հազարս եւ քսան եւ երեք. 29եւ յամին ութուտասաներորդի Նաբուքոդոնոսորայ, տարան յԵրուսաղեմէ ոգիս եւթն հարիւր երեսուն եւ երկուս. 30եւ յամին քսաներորդի եւ երրորդի Նաբուքոդոնոսորայ խաղացոյց Նաբուզարդան դահճապետ ՚ի Հրէից ոգիս եւթն հարիւր քառասուն եւ հինգ. ընդ ամենայն ոգիք չո՛րք հազար եւ վեց հարիւր։ 31Եւ եղեւ յերեսներորդի եւթներորդի ամի գերութեան Յովակիմայ արքայի Յուդայ, յերկոտասաներորդ ամսեանն ՚ի քսան եւ ՚ի չորս ամսոյն, բարձրացո՛յց Ուղ՚մարորդաք արքայ Բաբելացւոց՝ յամին յորում թագաւորեաց՝ զգլուխ Յովակիմայ արքայի Յուդայ. եւ եհա՛ն զնա ՚ի տանէն ուր կայր ՚ի պահեստի, 32եւ խօսեցաւ ընդ նմա քաղցրութեամբ. եւ էարկ զաթո՛ռ նորա ՚ի վերոյ քան զաթոռս թագաւորացն որ էին ընդ նմա ՚ի Բաբելովն. 33եւ փոխեաց զպատմուճան բանտի նորա. եւ ուտէր հա՛ց հանապա՛զ առաջի նորա զամենայն աւուրս որչափ եւ եկեաց։ 34Եւ կարգեցաւ նմա ռոճիկ հանապազորդ, զոր տային յարքայէն Բաբելացւոց օր ըստ օրէ մինչեւ ցօր մահու զամենայն աւուրս կենաց իւրոց։