1Իբրեւ լուաւ Յաբին արքայ Սուրայ, առաքեա՛ց առ Յոբաբ արքայ Մառոնայ, եւ առ արքայն Սէմերոնի, եւ առ արքայն Աքիփայ. 2եւ առ թագաւորս մեծի Սիդոնայ ՚ի լեռնայինսն, եւ յՌաբաթ հանդէպ Քեներեթայ։ Եւ ՚ի դաշտայինն, եւ ՚ի Նաբեթովր, եւ ՚ի ծովեզերեայս 3Քանանացիս յարեւելից կողմանէ. ՚ի ծովեզերեայսն Ամովրհացւոց, եւ ՚ի Քետացիս, եւ ՚ի Փերեզացիս, եւ Յեբուսացիս որ ՚ի լերինն, եւ ՚ի Խեւացիսն որ ընդ Ահերմոնի՛ւ ՚ի Մասեփայ։ 4Եւ ելին ինքեանք եւ թագաւորք իւրեանց ընդ նոսա. եւ զօր բազում իբրեւ զաւազ առ ափն ծովու բազմութեամբ, եւ երիվարք եւ կառք բազում յոյժ. 5գումարեցա՛ն ամենայն թագաւորքն այնոքիկ եւ եկին ՚ի միասին. եւ բանակեցա՛ն միանգամայն առ ջրովն Մառոնայ տա՛լ պատերազմ ընդ Իսրայէլի։ 6Եւ ասէ Տէր ցՅեսու. Մի՛ երկնչիր յերեսաց նոցա, զի վաղիւ ՚ի սո՛յն ժամու մատնեցի՛ց ես զամենեսեան զնոսա վանեալս առաջի որդւոցն Իսրայէլի. զերիվարս նոցա կարթակոտո՛րս արասցես, եւ զկառս նոցա այրեսցե՛ս հրով։ 7Եւ եկն Յեսու եւ ամենայն զօրն պատերազմօղ ընդ նմա, ՚ի վերայ նոցա ՚ի ջուրն Մառոնայ յանկարծօրէն. եւ անկան ՚ի վերայ նոցա ՚ի լեռնակողմանն։ 8Եւ մատնեա՛ց զնոսա Տէր ընդ ձեռամբ Իսրայէլի. եւ կոտորեալ զնոսա արարին հալածակա՛ն մինչեւ ցմեծն Սիդոն, եւ մինչեւ ցՄասրեփովթմայիմ, եւ մինչեւ ցդաշտն Մասեփայ ընդ արեւելս. եւ կոտորեա՛ց զնոսա մինչեւ չմնալոյ ՚ի նոցանէ ապրեալ։ 9Եւ արա՛ր ընդ նոսա Յեսու որպէս պատուիրեաց նմա Տէր. զերիվարս նոցա կարթակոտո՛րս արար, եւ զկառս նոցա այրեա՛ց հրով։ 10Եւ դարձա՛ւ Յեսու ՚ի ժամանակին յայնմիկ, եւ ա՛ռ զԱսովր եւ զթագաւորն նորա, եւ սպան զնա. զի Ասովր էր նախիշխան ամենայն թագաւորութեանցն այնոցիկ. 11եւ կոտորեցին զամենայն շնչաւոր որ ՚ի նմա սրո՛վ սուսերի, եւ սատակեցին զամենեսին. եւ ո՛չ մնաց ՚ի նմա շնչաւոր։ Եւ զԱսովր այրեցին հրով. 12եւ զամենայն քաղաքս թագաւորութեանցն այնոցիկ, եւ զթագաւորս նոցա ա՛ռ Յեսու, եւ կոտորեաց զնոսա սրով սուսերի, եւ սատակեաց զնոսա. զոր օրինակ հրամայեա՛ց նոցա Մովսէս ծառայ Տեառն։ 13Այլ զամենայն քաղաքս հողացուցեալս ՚ի նոցանէ ո՛չ այրեաց Իսրայէլ, բայց միայն զԱսուր զոր այրեաց Յեսու. 14եւ զամենայն կապուտ նորա եւ զանասուն առին իւրեանց յաւարի որդիքն Իսրայէլի. բայց զնոսա զամենեսին սատակեցին սրով սուսերի մինչեւ կորուսին զնոսա, եւ ո՛չ թողին ՚ի նոցանէ եւ ո՛չ մի շնչաւոր. 15զոր օրինակ հրամայեաց Տէր Մովսիսի ծառայի իւրում. եւ որպէս պատուիրեաց Մովսէս Յեսուայ՝ նո՛յնպէս արար Յեսու. եւ ո՛չ անց եւ ո՛չ զիւիք յամենայնէ զոր պատուիրեաց նմա Մովսէս։ 16Եւ ա՛ռ Յեսու զամենայն երկիրն զայն, զլեռնակողմնն, եւ զամենայն երկիրն Նագեբ, եւ զամենայն երկիրն Գոսոմ, եւ զդաշտայինն եւ զարեւմտեայն, եւ զլեառնն Իսրայէլի, եւ զհովիտս նորա որ առ լերամբն. 17՚ի լեռնէն Աքեղայ եւ ցելսն Սուրայ, մինչեւ ցԲաաղգադ. եւ զդաշտայինն Լիբանանու առ ոտամբն Ահերմոնի. եւ զթագաւորս նոցա. զամենեսին ա՛ռ եւ կոտորեա՛ց։ 18Եւ աւուրս բազո՛ւմս արար Յեսու ընդ ամենայն թագաւորսն ընդ այնոսիկ պատերազմ։ 19Եւ ո՛չ էր քաղաք զոր ո՛չ մատնեաց Տէր որդւոցն Իսրայէլի, բաց ՚ի Խեւացւոցն որ բնակեալ էր ՚ի Գաբաւոն. զամենեսին ա՛ռ պատերազմաւ։ 20Զի ՚ի Տեառնէ կարծրանայի՛ն սիրտք նոցա պատահել պատերազմաւ Իսրայէլի՝ զի սատակեսցին. եւ մի՛ տացի նոցա ողորմութիւն, այլ զի սատակեսցին որպէս խօսեցաւ Տէր ընդ Մովսիսի։ 21Եւ ե՛կն Յեսու ՚ի ժամանակին յայնմիկ՝ եւ սատակեա՛ց զԵնակիմսն, ՚ի լեռնակողմն Քեբրոնի, եւ Դաբիրայ, եւ յԱնովբայ՝ եւ յամենայն լեռնէն Իսրայէլի, եւ յամենայն լեռնէն Յուդայ, հանդերձ քաղաքօ՛ք նոցա. եւ սատակեա՛ց զնոսա Յեսու, 22եւ ո՛չ մնաց յԵնակիմացն յորդւոցն Իսրայէլի, բայց միայն ՚ի Գազա, եւ ՚ի Գէթ, եւ յԱսեդովթ մնացին։ 23Եւ ա՛ռ Յեսու զամենայն երկիրն որպէս պատուիրեաց Տէր Մովսիսի. եւ ետ Յեսու ժառանգութիւն Իսրայէլի վիճակաւ ըստ ցեղից նոցա. եւ դադարեա՛ց երկիրն պատերազմել։