1Խօսեցա՛ւ Տէր ընդ Յեսուայ՝ եւ ասէ. Խօսեա՛ց ընդ որդիսն Իսրայէլի, եւ ասասցես. 2Տո՛ւք զքաղաքս ապաստանացն զորոց խօսեցայ ընդ ձեզ ՚ի ձեռն Մովսիսի. 3ապաստա՛ն սպանողի՝ որ սպանանէ զանձն ակամա՛յ յանգէտս, եւ եղիցին ձեզ քաղաքք ապաստանի. եւ մի՛ մեռցի սպանօղն ՚ի մերձաւորէ արեանն, մինչեւ կացցէ առաջի ժողովրդեանն յատենի. 4եւ փախիցէ՛ ՚ի մի ՚ի քաղաքացն այնոցիկ. եւ կացցէ ՚ի մուտս դրան քաղաքին, եւ խօսեսցի յականջս ծերո՛ց քաղաքին այնորիկ զբանս իւր։ Եւ ժողովեսցեն զնա ժողովուրդն առ ինքեա՛նս, եւ տացեն նմա տեղի, եւ բնակեսցէ՛ ընդ նոսա։ 5Եւ եթէ երթայցէ մերձաւոր արեանն զկնի նորա, մի՛ մատնեսցեն զսպանօղն ՚ի ձեռս նորա. քանզի յանգէ՛տս եհար զընկերն իւր, եւ ո՛չ ատեայր զնա յերէկն եւ յեռանդ։ 6Եւ բնակեսցէ՛ ՚ի քաղաքին յայնմիկ մինչեւ կացցէ առաջի ժողովրդեանն յատենի, մինչեւ մեռանիցի քահանայն մեծ՝ որ իցէ յաւուրսն յայնոսիկ. եւ ապա՛ դարձցի սպանօղն եւ եկեսցէ ՚ի տեղի՛ իւր՝ եւ ՚ի տուն իւր, եւ ՚ի քաղաքն ուստի փախեաւ։ 7Եւ զատուցին զԿադէս ՚ի Գալիլեա՝ ՚ի լերինն Նեփթաղիմայ. եւ զՍիւքեմ ՚ի լերինն Եփրեմայ։ Եւ զքաղաքն Արբոկ՝ ա՛յն է Քեբրոն ՚ի լերինն Յուդայ։ 8Եւ յայնկոյս Յորդանանու յարեւելից Երեքոյի։ Եւ ետուն զԲոսոր յանապատին ՚ի դաշտի, ՚ի ցեղէն Ռուբինի. եւ զՌամովթ ՚ի Գաղաադ, ՚ի ցեղէն Գադայ. եւ զԳովղան ՚ի Բասանաստան ՚ի ցեղէն Մանասէի։ 9Ա՛յս են քաղաքք հոյակապք ամենայն որդւոցն Իսրայէլի, եւ եկին՝ յեցելո՛յ ՚ի նոսա. փախչե՛լ անդր ամենայնի որ հարկանիցէ զանձն ակամայ, զի մի՛ մեռանիցի ՚ի ձեռաց մերձաւորի արեանն, մինչեւ կացցէ առաջի ժողովրդեանն յատենի։