1Եւ ժողովեա՛ց Յեսու զամենայն ցեղսն Իսրայէլի ՚ի Սելով. եւ կոչեաց զամենայն ծերսն Իսրայէլի, եւ զիշխանս նոցա, եւ զդպիրս նոցա, եւ զդատաւորս նոցա, եւ կացին առաջի Տեառն։ 2Եւ խօսեցա՛ւ Յեսու ընդ ամենայն ժողովրդեանն՝ եւ ասէ. Ա՛յսպէս ասէ Տէր Աստուած Իսրայէլի. Յայնկոյս Գետոյն պանդխտեցան հարքն ձեր յառաջագոյն. Թարա՝ հա՛յր Աբրահամու եւ հա՛յր Նաքովրայ, եւ պաշտեցին զաստուածս օտարս։ 3Եւ առի՛ ես զհայր ձեր զԱբրահամ յայնմ կողմանէ Գետոյն, եւ առաջնորդեցի՛ նմա յամենայն երկրիդ Քանանացւոց, եւ բազմացուցի՛ զզաւակ նորա. եւ ետու նմա զԻսահակ. 4եւ ետու Սահակայ զՅակոբ, եւ զԵսաւ. եւ ետու Եսաւայ զլեառնն Սէիր ՚ի ժառանգութիւն։ Եւ Յակոբ եւ որդիք նորա իջին յԵգիպտոս. եւ եղեն անդ յա՛զգ մեծ եւ ՚ի բազում եւ ՚ի հզօր, եւ չարչարեցին զնոսա Եգիպտացիքն. 5եւ եհար Տէր զԵգիպտացիսն նշանօք եւ արուեստիւք՝ զոր արար ՚ի նոսա. 6եւ ապա եհան զձեզ յԵգիպտոսէ. եւ մտէք ՚ի ծովն, եւ պնդեցան Եգիպտացիքն զհե՛տ հարցն ձերոց կառօք եւ երիվարօք ՚ի ծովն Կարմիր։ 7Եւ աղաղակեցա՛ք առ Տէր. եւ եդ զամպն եւ զմէգ ՚ի մէջ մեր եւ ՚ի մէջ Եգիպտացւոցն. եւ ած ՚ի վերայ նոցա զծովն՝ եւ ծածկեաց զնոսա. եւ տեսին աչք մեր զոր արար Տէր ընդ երկիրն Եգիպտացւոց. եւ էիք յանապատի անդ զաւուրս բազումս։ 8Եւ ած զձեզ յերկիրն Ամովրհացւոց բնակելոց յա՛յնկոյս Յորդանանու, եւ ետուն ընդ ձեզ պատերա՛զմ. եւ մատնեաց զնոսա Տէր ՚ի ձեռս ձեր, եւ ժառանգեցէք զերկիրն նոցա. եւ սատակեցէք զնոսա յերեսաց ձերոց։ 9Եւ յարեաւ Բաղակ Սեպփովրայ արքայ Մովաբու եւ ետ պատերազմ ընդ Իսրայէլի. եւ առաքեաց կոչեաց զԲաղաամ որդի Բեովրայ նզովե՛լ զձեզ. 10եւ ո՛չ կամեցաւ Տէր Աստուած քո կորուսանել, եւ օրհնելով օրհնեա՛ց զձեզ, եւ ապրեցոյց զձեզ ՚ի ձեռաց նոցա. եւ մատնեաց զնոսա ՚ի ձեռս ձեր։ 11Եւ անցէք ընդ Յորդանան, եւ եկիք յԵրիքով. եւ պատերազմեցա՛ն ընդ ձեզ բնակիչք Երիքովի. Ամուրհացին եւ Քանանացին, եւ Փերեզացին, եւ Խեւացին, եւ Յեբուսացին, եւ Քետացին, եւ Գերգեսացին. եւ մատնեա՛ց զնոսա ՚ի ձեռս մեր։ 12Եւ առաքեաց յառաջագոյն քան զմեզ զձիաստացսն, եւ մերժեա՛ց զնոսա յերեսաց ձերոց. զերկոտասան թագաւորս Ամովրհացւոց, ո՛չ սրով քով եւ ո՛չ աղեղամբ քով. 13եւ ետ ձեզ Տէր զերկիրս՝ յորում ո՛չ վաստակեցէք. եւ բնակեցէք ՚ի քաղաքս զոր ո՛չ շինեցէք, եւ յայգիս եւ ՚ի թզենիս՝ զոր ո՛չ տնկեցէք դուք՝ եւ ուտէք։ 14Եւ արդ՝ երկերո՛ւք դուք ՚ի Տեառնէ. եւ պաշտեցէ՛ք զնա ուղղութեամբ եւ արդարութեամբ. եւ ՚ի բա՛ց արարէք զաստուածս օտարոտիս՝ զոր պաշտեցին հարք ձեր յա՛յնկոյս Գետոյն, եւ յԵգիպտոս. եւ պաշտեցէ՛ք զՏէր։ 15Ապա թէ ո՛չ իցէ ձեզ հաճոյ պաշտել զՏէր, ընտրեցէ՛ք այսօր թէ զո՞ պաշտիցէք. զաստուածս հարցն ձերոց որ յա՛յնկոյս Գետոյն էին, թէ՞ զաստուածս Ամովրհացւոցն, յորոց դո՛ւք բնակեալ էք յերկրի նոցա։ Այլ ես՝ եւ տուն իմ պաշտեմ զՏէր՝ զի սուրբ է։ 16Պատասխանի ետուն ժողովուրդն՝ եւ ասեն. Քա՛ւ լիցի մեզ թողուլ զՏէր Աստուած մեր՝ եւ պաշտել զաստուածս օտարս. 17զի Տէր Աստուած մեր, նա՛ եհան զմեզ եւ զհարս մեր յերկրէն Եգիպտացւոց ՚ի տանէ ծառայութեան, եւ արար մեզ զնշանս մեծամեծս զայնոսիկ. եւ պահեա՛ց զմեզ յամենայն ճանապարհին յորում գնացաք, եւ յամենայն ազգս՝ ընդ որ անցաք։ 18Եւ մերժեաց Տէր զԱմովրհացին եւ զամենայն ազգս բնակեալս յերկրին՝ յերեսաց մերոց։ Այլ եւ մե՛ք պաշտեսցուք զՏէր. զի նա՛ է Աստուած մեր։ 19Եւ ասէ Յեսու ցժողովուրդն. Ո՛չ կարէք դուք պաշտել զՏէր՝ զի սուրբ է. եւ նա՝ նախանձեալ ո՛չ ներիցէ մեղաց եւ անօրէնութեանց ձերոց. 20յորժամ թողուցուք զՏէր, եւ պաշտիցէք զաստուածս օտարս. եւ հասեալ ՚ի վերայ չարչարիցէ զձեզ, եւ ծախեսցէ զձեզ փոխանակ բարեացն՝ զոր արար ձեզ։ 21Եւ ասէ ժողովուրդն ցՅեսու. Ո՛չ այդպէս, այլ զՏէր պաշտեսցուք։ 22Եւ ասէ Յեսու ցժողովուրդն. Ահա դուք ձեզէ՛ն եղերուք վկայք անձանց ձերոց, զի դուք ընտրեցէք զՏէր պաշտել զնա։ Եւ ասեն. Վկա՛յ եմք։ 23Եւ ասէ. Արդ ՚ի բա՛ց արարէք ՚ի ձէնջ զաստուածս օտարոտիս, եւ ուղղեցէ՛ք զսիրտս ձեր առ Տէր Աստուած Իսրայէլի։ 24Եւ ասէ ժողովուրդն ցՅեսու. ԶՏէր Աստուած մե՛ր պաշտեսցուք, եւ ձայնի՛ նորա լուիցուք։ 25Եւ ուխտեաց Յեսու ո՛ւխտ ընդ ժողովրդեանն յաւուր յայնմիկ. եւ ետ նմա օրէնս եւ դատաստա՛նս ՚ի Սելով առաջի խորանին Աստուծոյ Իսրայէլի։ 26Եւ գրեա՛ց Յեսու զբանս զայսոսիկ՝ ՚ի գի՛րս օրինաց Աստուծոյ. եւ ա՛ռ վէ՛մ մեծ, եւ կանգնեաց զնա ՚ի ներքոյ բեւեկնոյն առաջի Տեառն. 27եւ ասէ Յեսու ցամենայն ժողովուրդն. Ահա վէմս ա՛յս եղիցի ձեզ ՚ի վկայութիւն. զի սա լուաւ զամենայն խօսեցեալսն ՚ի Տեառնէ զոր խօսեցաւ ընդ ձեզ այսօր. եւ եղիցի սա ձեզ ՚ի վկայութիւն աւուրց յետնոց՝ յորժամ ստիցէք Տեառն Աստուծոյ ձերում։ 28Եւ արձակեա՛ց Յեսու զժողովուրդն, եւ գնա՛ց իւրաքանչիւր ՚ի տեղի իւր։ 29Եւ պաշտեաց Իսրայէլ զՏէր զամենայն աւուրս Յեսուայ, եւ զամենայն աւուրս ծերոցն որ ձգեցին զժամանակս ընդ Յեսուայ. որք եւ տեսի՛ն զամենայն գործս Տեառն՝ զոր արար յԻսրայէլ։

30Եւ եղեւ յետ այսորիկ մեռանե՛լ Յեսուայ որդւոյ Նաւեայ ծառայի Տեառն, հարիւր եւ տասն ամաց. 31եւ թաղեցին զնա առ սահմանօք ժառանգութեան իւրոյ ՚ի Թամնասաքար ՚ի լերինն Եփրեմայ ՚ի հիւսւսոյ լերինն Գայասու։ Եւ անդ եդին ընդ նմա ուր թաղեցին զնա առ ՚ի յիշատակէ զսուրսն քարեղէնս, որով թլփատեա՛ց զորդիսն Իսրայէլի ՚ի Գաղգաղա, յորժամ եհան զնոսա յերկրէն Եգիպտացւոց՝ որպէս հրամայեա՛ց Տէր. եւ ա՛նդ են մինչեւ ցայսօր ժամանակի։

32Եւ զոսկերսն Յովսեփու հանին որդիքն Իսրայէլի յԵգիպտոսէ. եւ թաղեցի՛ն զնա ՚ի Սիկիմ, ՚ի բաժնի ագարակին զոր ստացաւ Յակոբ յԱմովրհացւոցն բնակելոցն ՚ի Սիկիմ, որոջաց հարիւրոց. եւ ետ զայն Յովսեփայ ՚ի բաժնի։ 33Եւ եղեւ յետ այսորիկ վախճանե՛լ Եղիազարու քահանայի որդւոյ Ահարոնի. եւ թաղեցաւ ՚ի Գաբաաթ Փենէէսի որդւոյ իւրում, զոր ետ նմա ՚ի լերինն Եփրեմայ։ Յաւուրսն յայնոսիկ առեալ որդւոցն Իսրայէլի զտապանակ ուխտին Աստուծոյ շրջեցուցանէին ընդ իւրեանս։ Եւ քահանայացաւ Փենէէս փոխանակ Եղիազարու հօր իւրոյ, մինչեւ մեռաւ՝ եւ թաղեցա՛ւ յիւրումն Գաբաաթ։ Եւ որդիքն Իսրայէլի գնացին յիւրաքանչիւր տեղիս իւրեանց, եւ յիւրաքանչիւր քաղաքս իւրեանց. եւ պաշտեցին որդիքն Իսրայէլի զԱստարտն եւ զԱստարովթ, եւ զաստուածս ազգացն որ շուրջ զնոքօք։ Եւ մատնեա՛ց զնոսա Տէր ՚ի ձեռս Եգղոմայ արքայի Մովաբու. եւ տիրեաց նոցա ամս ո՛ւթ եւ տասն։