1Եւ կանխեա՛ց Յեսու ընդ առաւօտն. եւ չուեցին ՚ի Սատիմայ եւ եկին մինչեւ ցՅորդանան, ի՛նքն եւ ամենայն որդիքն Իսրայէլի. եւ բանակեցա՛ն անդ յառաջ քան զանցանելն։ 2Եւ եղեւ յետ երից աւուրց, անցի՛ն դպիրքն ընդ բանակն, 3եւ պատուիրեցին ժողովրդեանն եւ ասեն. Յորժամ տեսանիցէք զտապանակ ուխտին Տեառն Աստուծոյ ձերոյ, եւ զքահանա՛յսն մեր, եւ զՂեւտացիսն որ բարձեալ ունիցին զնա՝ ※ եւ դո՛ւք խաղասջիք ՚ի տեղեաց ձերոց եւ գնասջի՛ք զհետ նորա։ 4Բայց հեռագո՛յն լինիցի ընդ ձեզ եւ ընդ նոսա՝ որչափ կանգունք երկո՛ւց հազարաց, զտեղի՛ առնուցուք եւ ո՛չ մերձենայցէք ՚ի նա. զի գիտիցէք զճանապարհն ընդ որ երթայցէք. զի ո՛չ էք երթալոց զճանապարհ երէկին եւ եռանդի։ 5Եւ ասէ Յեսու ցժողովուրդն. Սրբեցարո՛ւք առ վաղիւ. զի վաղիւ արասցէ ձեզ Տէր սքանչելիս։ 6Եւ խօսեցա՛ւ Յեսու ընդ քահանայսն՝ եւ ասէ. Առէ՛ք զտապանակ ուխտին Տեառն, եւ գնացէ՛ք յառաջագոյն առաջի ժողովրդեանն։ Եւ բարձին քահանայքն զտապանակ ուխտին Տեառն՝ եւ երթային առաջի ժողովրդեանն։

7Եւ ասէ Տէր ցՅեսու. Յաւուր յայսմիկ սկի՛զբն արարից բարձրացուցանե՛լ զքեզ առաջի ամենայն որդւոցն Իսրայէլի. զի ծանիցեն թէ որպէս էի՛ ընդ Մովսիսի, նո՛յնպէս եղէց եւ ընդ քեզ։ 8Եւ արդ՝ պատուիրեա՛ քահանայիցն որ բառնան զտապանակ ուխտին՝ եւ ասասցե՛ս. Յորժամ մտանիցէ՛ք յեզր ջրոյն Յորդանանու, կացջի՛ք ՚ի ներքս ՚ի Յորդանան։ 9Եւ ասէ Յեսու ցորդիսն Իսրայէլի. Մատերո՛ւք այսր եւ լուարո՛ւք զպատգամս Տեառն Աստուծոյ մերոյ։ 10Եւ ասէ Յեսու. Այնո՛ւ գիտասջիք եթէ Տէր կենդանի՛ է ՚ի ձեզ. եւ սատակելով սատակեսցէ՛ յերեսաց ձերոց՝ զՔանանացին, եւ զՔետացի, եւ զԽեւացի, եւ զՓերեզացի, եւ զԳերգեսացի, եւ զԱմովրհացի, եւ զՅեբուսացի. 11ահաւասիկ տապանակ ուխտին Տեառն ամենայն երկրի անցանէ ※ առաջի ձեր ընդ Յորդանան։ 12Եւ արդ՝ յառա՛ջ կալարուք ՚ի ձէնջ ա՛րս երկոտասան յորդւոցդ Իսրայէլի, այր մի յիւրաքանչիւր ցեղէ. 13եւ եղիցի իբրեւ մխիցին ոտք քահանայիցն կրելեաց զտապանակ ուխտին Տեառն ամենայն երկրի ՚ի ջուրն Յորդանանու, պակասեսցէ՛ ջուրն որ իջանէ ՚ի վերուստ, կացցէ՛ իբրեւ զկարկառակո՛յտ մի։ 14Եւ եղեւ իբրեւ չուեաց ժողովուրդն ՚ի խորանաց իւրեանց անցանե՛լ ընդ Յորդանան. եւ քահանայքն բարձին զտապանակ ուխտին Տեառն առաջի ամենայն ժողովրդեանն։ 15Եւ իբրեւ մտանէին քահանայքն որ կրէին զտապանակ ուխտին ՚ի Յորդանան, եւ ոտք քահանայիցն կրելեաց տապանակին մխեցա՛ն յեզր ջրոյն Յորդանանու, եւ Յորդանան լցեա՛լ գայր դարիւ եւ դարիւ որպէս յաւուրս հնձոց ցորենոյ. 16եւ կացին ջուրքն որ իջանէին ՚ի վերուստ՝ միաձո՛յլք, անջրպետեալք, հեռացեա՛լք յոյժ ※ յոյժ. յԱդամիտէս քաղաքէ՝ որ է մա՛սն Կարիաթարիմայ. եւ որ իջանէինն՝ իջին ՚ի ծո՛վն Արաբացւոց ՚ի ծովն Աղի, մինչեւ ՚ի սպա՛ռ նուազելոյ. եւ ժողովուրդն կա՛յր յանդիման Երեքոյի։ 17Եւ կացին քահանայքն որ կրէին զտապանակ ուխտին Տեառն ՚ի վերայ ցամաքի ՚ի մէջ Յորդանանու պատրաստութեամբ։ Եւ ամենայն որդիքն Իսրայէլի անցին ընդ ցամաք, մինչեւ վախճանեաց ամենայն ժողովուրդն անցանել ընդ Յորդանան։