1Եւ եղեւ իբրեւ լուան ամենայն թագաւորք Ամովրհացւոց, որ էին յա՛յն կոյս Յորդանանու առ ծովեզերբն. եւ թագաւորքն Փիւնիկեցւոց որ առ ծովեզերբն. եթէ ցամաքեցո՛յց Տէր Աստուած զՅորդանան գետ առաջի որդւոցն Իսրայէլի յանցանելն նոցա, հաշեցա՛ն սիրտք նոցա եւ զարհուրեցան, եւ ո՛չ գոյր ՚ի նոսա իմաստութիւն եւ ո՛չ մի՝ յերեսաց որդւոցն Իսրայէլի։

2Ընդ այնո՛ւ ժամանակաւ ասէ Տէր ցՅեսու. Արա՛ դու քեզ սուր ՚ի գայլախա՛զ վիմէ՝ եւ նստեալ թլփատեսցե՛ս զորդիսն Իսրայէլի կրկնակի։ 3Եւ արա՛ր իւր Յեսու սո՛ւրս քարեղէնս գայլախազեայս, եւ թլփատեա՛ց զորդիսն Իսրայէլի ՚ի տեղւոջ՝ որ կոչէր Բլո՛ւր անթլփատից։ 4Եւ զոր օրինակ յապաւեաց Յեսու զորդիսն Իսրայէլի որ էին ՚ի ճանապարհի անդ, որ բնաւ չէին թլփատեալք յելելոցն յԵգիպտոսէ, զամենեսեան թլփատեա՛ց Յեսու։ Եւ այս ժողովուրդ է զոր թլփատեաց Յեսու. ամենայն ժողովրդեանն ելելոց յԵգիպտոսէ զարո՛ւ մանուկ. քանզի ամենայն արք ※ պատերազմողք մեռա՛ն յանապատին անդէն ՚ի ※ ճանապարհին, յելանելն իւրեանց յերկրէն Եգիպտացւոց. 5※ զի թլփատեալք էին ամենայն ժողովուրդն որ ելին, եւ ամենայն ※ ժողովուրդն որ ծնան յանապատին ՚ի ճանապարհին ※ ելանելոյ նոցա յերկրէն Եգիպտացւոց։ 6Քանզի զքառասուն եւ զերկուս ամս շրջեցաւ Իսրայէլ յանապատին Աբդարեայ. վասն որոյ անթլփա՛տք էին բազումք ՚ի պատերազմողացն ելելոց յերկրէն Եգիպտացւոց՝ որք անհնազանդեցա՛ն պատուիրանացն Աստուծոյ։ Որոց եւ սահմանեա՛ց Տէր չտեսանե՛լ զերկիրն զոր երդուաւ հարցն նոցա տալ նոցա. զերկիր՝ որ բղխէ զկաթն եւ զմեղր։ 7Եւ փոխանակ նոցա տարաւ զորդիս նոցա՝ զոր թլփատեաց Յեսու. քանզի անթլփատք էին. վասն լինելոյ նոցա անթլփա՛տս ՚ի ճանապարհին։ 8Եւ իբրեւ թլփատեցաւ ամենայն ազգն, հանդարտութիւն կալեալ նստա՛ն անդէն ՚ի բանակին մինչեւ ողջացան։ 9Եւ ասէ Տէր ցՅեսու. Յաւուր յայսմիկ բարձի՛ զնախատինս Եգիպտացւոց ՚ի ձէնջ։ Եւ կոչեաց զանուն տեղւոյն այնորիկ Գաղգաղա՛ մինչեւ ցայսօր. 10եւ ա՛նդ բանակեցան որդիքն Իսրայէլի։ Եւ արարին որդիքն Իսրայէլի զզատիկն ՚ի չորեքտասաներորդո՛ւմ աւուր ամսոյն յերեկորեայ, յարեւելից Երիքովի ՚ի դաշտի անդ. 11եւ կերան ՚ի ցորենոյ երկրին զայգոյ բաղա՛րջ եւ նորի։ 12Յաւուր յայնմիկ պակասեա՛ց մանանայն, յետ ուտելոյ նոցա ՚ի ցորենոյ երկրին. եւ ո՛չ եւս գտանէր որդւոցն Իսրայէլի մանանայ. եւ ժողովեցին զպտուղ երկրին Փիւնիկեցւոց ՚ի տարւոջն յայնմիկ։

13Եւ եղեւ մինչ է՛ր Յեսու յԵրիքով, ամբարձեալ զաչս իւր ետե՛ս, զի կայր առաջի նորա ա՛յր, եւ սուսեր մե՛րկ ՚ի ձեռին նորա. եւ մատուցեալ Յեսուայ՝ ասէ ցնա. Մե՞ր ես՝ թէ ՚ի թշնամեաց մերոց։ 14Եւ նա ասէ ցնա. Ես զօրավա՛ր եմ զօրու Տեառն, եւ ա՛յժմ եկի։ 15Եւ անկա՛ւ Յեսու ՚ի վերայ երեսաց իւրոց եւ երկի՛ր եպագ, եւ ասէ ցնա. Տէր զի՞նչ հրաման տացես ծառայի քում։ 16Եւ ասէ զօրավարն Տեառն ցՅեսու. Լո՛յծ զկօշիկս քո յոտից քոց, զի տեղիդ յորում կաս՝ սո՛ւրբ է։ Եւ արա՛ր այնպէս։