1Խօսեցաւ Տէր ընդ Մովսիսի՝ եւ ասէ. 2Խօսեա՛ց ընդ որդիսդ Իսրայէլի՝ եւ ասասցե՛ս ցնոսա. Սո՛ւրբ եղերուք. զի ես սուրբ եմ Տէր Աստուած ձեր։ 3Իւրաքանչիւր ՚ի հօրէ եւ ՚ի մօրէ իւրմէ երկնչիջի՛ք։ Եւ զշաբաթս իմ պահեսջի՛ք. զի ե՛ս եմ Տէր Աստուած ձեր։ 4Մի՛ երթայցէք զհետ կռոց. եւ աստուածս ձուլածոյս մի՛ առնիցէք ձեզ. ե՛ս եմ Տէր Աստուած ձեր։

5Եւ եթէ զոհիցէք զոհ փրկութեան Տեառն, զընդունելի՛ս ձեր զոհեսջիք։ 6Յաւուր յորում մատուցանիցի՝ կերիցի՛, եւ ՚ի վաղիւ անդր. եւ եթէ մնասցէ մինչեւ ցօրն երրորդ՝ հրո՛վ այրեսցի։ 7Ապա թէ ուտելո՛վ ուտիցի յաւուրն երրորդի, անզո՛հ է, մի՛ ընկալցի. 8եւ որ ուտիցէ զայն՝ մե՛ղս առցէ. զի զսրբութիւն Տեառն պղծեաց, եւ սատակեսցին անձինքն որ ուտիցեն՝ ՚ի ժողովրդենէ իւրեանց։

9Եւ ՚ի հնձել հնձողաց ձերոց զհունձս երկրին ձերոյ, մի՛ սպառիցէք զհունձս անդոց ձերոց մօտ հնձելով. եւ զանկեալն ՚ի հնձոց քոց մի՛ ժողովեսցես։ 10Եւ զայգի քոյ ճռաքաղ մի՛ առնիցես։ եւ պտղաքաղ այգւոյ մի՛ լինիցիս։ տնանկին եւ պանդխտի՛ թողուցուս զայն. ե՛ս եմ Տէր Աստուած ձեր։ 11Մի՛ գողանայցէք. եւ մի՛ ստիցէք. եւ մի՛ զրպարտիցէք իւրաքանչիւր զընկե՛ր իւր։ 12Եւ մի՛ երդնուցուք սուտ յանո՛ւն իմ. եւ մի՛ պղծիցէք զանուն Տեառն Աստուծոյ ձերոյ. ե՛ս եմ Տէր Աստուած ձեր։ 13Մի՛ զրկեսցես զընկեր քո, եւ մի՛ յափշտակեսցես. Մի՛ ագցին վարձք վարձկանին առ քեզ մինչեւ ցառաւօտ։

14Զհամրն մի՛ զզուիցես. եւ առաջի կուրին գայթագղութիւն մի՛ դնիցես. եւ երկնչիցի՛ս ՚ի Տեառնէ Աստուծոյ քումմէ։ Ե՛ս եմ Տէր Աստուած քո։ 15Անիրաւութիւն ՚ի դատաստանի մի՛ առնիցես. եւ ակն աղքատի մի՛ առնուցուս. եւ մի՛ երեսաց աչառիցես հարստի. արդարութեամբ դատեսցի՛ս զընկեր քո։

16Եւ նենգութեամբ ընդ ազգի քում մի՛ գնայցես. եւ յարիւն ընկերի քոյ մի՛ յօժարիցես։ Ե՛ս եմ Տէր Աստուած ձեր. 17մի՛ ատեսցես զեղբայր քո ՚ի մտի քում։ Յանդիմանութեամբ յանդիմանեսցես զընկե՛ր քո, եւ մի՛ ընդունիցիս վասն նորա զմեղս։

18Մի՛ խնդրեսցէ վրէժ ձեռն քո. եւ ընդ որդւոց ժողովրդեան քոյ ոխս՝ մի՛ ունիցիս։ Եւ սիրեսցես զընկեր քո իբրեւ զա՛նձն քո. զի ե՛ս եմ Տէր. 19զօրէնս իմ պահեսջի՛ր։ Զանասո՛ւն քո յօտարախառնս մի՛ խառնեսցես։ Եւ զայգի քո՝ մի՛ վարեսցես այլ եւ այլ։ Զձորձս երկդիմիս գարշելիս՝ մի՛ արկանիցես զքեւ։

20Եթէ ոք ննջեսցէ ընդ կնոջ արութեամբ սերման. եւ նա՝ իցէ աղախին պահեալ առն, եւ փրկանօք չիցէ՛ փրկեալ, եւ ազատութեամբ չիցէ՛ ազատեալ. հարց եւ փորձ լիցի նոցա. եւ մի՛ մեռանիցին՝ զի չիցէ՛ ազատեալ։ 21Եւ մատուսցէ ընդ յանցանաց իւրոց Տեառն առ դրան խորանին վկայութեան խո՛յ յանցանաց. 22եւ քաւեսցէ՛ վասն նորա քահանայն խոյի՛ւն յանցանաց առաջի Տեառն վասն մեղացն զոր մեղաւ. եւ թողցի նմա մեղքն՝ զոր մեղաւ։

23Եւ յորժամ մտանիցէք յերկիրն՝ զոր Տէր Աստուած տացէ ձեզ, եւ տնկիցէք զամենայն փայտ ուտելի, սրբեսջի՛ք զպղծութիւն նորա. եւ պտուղ նորա զերեամ պի՛ղծ լիցի ձեզ, եւ մի՛ կերիցի։ 24Եւ յամին չորրորդի եղիցի ամենայն պտուղ նորա սուրբ, օրհնեա՛լ Տեառն. 25եւ յամին հինգերորդ կերիջի՛ք զպտուղ նորա. յաւելուա՛ծ ձեզ լինիցին բերք նորա։ Ե՛ս եմ Տէր Աստուած ձեր. 26՚ի վերայ լերանց մի՛ ուտիցէք։ Եւ մի՛ հմայիցէք. եւ մի՛ հաւահարց՝ եւ մի՛ հաւագէտք լինիցիք։ 27Ցցունս ՚ի վարսից գլխոց ձերոց մի՛ առնիցէք. եւ մի՛ ապականիցէք զտեսիլ մօրուաց ձերոց։

28Եւ վէ՛տս ՚ի վերայ ոգւոյ մի՛ առնիցէք ՚ի մարմինս ձեր։ Եւ գիր կտեալ մի՛ առնիցէք ՚ի ձեզ։ Ե՛ս եմ Տէր Աստուած ձեր։ 29Մի՛ պղծիցես զդուստր քո պոռնկեցուցանելով զնա. զի մի՛ պոռնկեսցի երկիրն, եւ լցցի՛ երկիրն անիրաւութեամբ։ 30Զշաբաթս իմ պահեսջի՛ք, եւ ՚ի սրբութեանց իմոց երկնչիջի՛ք, զի ե՛ս եմ Տէր։

31Զհետ վհկաց՝ մի՛ երթայցէք, եւ ՚ի գէտս մի՛ յարիցիք պղծե՛լ նոքօք։ Ե՛ս եմ Տէր Աստուած ձեր. 32առաջի ալեաց յառնիցե՛ս, եւ պատուեսցե՛ս զերեսս ծերոյն, Եւ երկնչիցի՛ս յԱստուծոյ քումմէ. ե՛ս եմ Տէր Աստուած քո։

33Եւ եթէ յարեսցի առ ձեզ եկ՝ յերկրին ձերում, մի՛ նեղիցէք զնա։ 34Իբրեւ զբնակն ձեր լինիցի ձեզ՝ եւ եկն յարեալ ՚ի ձեզ։ Եւ սիրեսցե՛ս զնա իբրեւ զանձն քո. զի պանդուխտք եղերուք եւ դո՛ւք յերկրին Եգիպտացւոց. ե՛ս եմ Տէր Աստուած ձեր։

35Մի՛ առնիցէք անիրաւութիւն ՚ի դատաստանի, ՚ի չափս եւ ՚ի կշի՛ռս, եւ ՚ի զո՛յգս։ 36Զոյգք արդարք, եւ չափք արդարք, եւ կշիռք արդարք, եւ կապիճ արդա՛ր լիցի ձեզ։ Ե՛ս եմ Տէր Աստուած ձեր՝ որ հանի զձեզ յերկրէն Եգիպտացւոց։ 37Եւ պահեսջի՛ք զամենայն զօրէնս իմ, եւ զամենայն զհրամանս իմ. եւ արասջի՛ք զնոսա՝ զի ե՛ս եմ Տէր Աստուած։