1Եւ ապա՛ չուեաց ժողովուրդն յԱսերովթայ, եւ բանակեցաւ յանապատին Փառանու։

2Խօսեցաւ Տէր ընդ Մովսիսի՝ եւ ասէ. 3Առաքեա՛ արս՝ եւ լրտեսեսցե՛ն զերկիրն Քանանացւոց, զոր ե՛ս տաց որդւոցն Իսրայէլի ՚ի կալուածս. այր մի՝ ըստ ցեղի, ըստ տանց նահապետաց իւրեանց առաքեսցես զնոսա՝ զամենայն գլխաւորս ՚ի նոցանէ։ 4Եւ առաքեաց զնոսա Մովսէս յանապատէն Փառանու՝ ըստ բանին Տեառն. ամենեքին ա՛րք գլխաւորք էին նոքա յորդւոցն Իսրայէլի։ Եւ այս են անուանք նոցա։ 5Ցեղին Ռուբինի, Սաղամիէլ որդի Աքուրայ։ 6Ցեղին Շմաւոնի, Սափատ որդի Սուրեայ։ 7Ցեղին Յուդայ, Քաղէբ որդի Յեփոնեայ։ 8Ցեղին Իսաքարայ, Գաղամ որդի Յովսեփայ։ 9Ցեղին Եփրեմայ, Աւսէս որդի Նաւեայ։ 10Ցեղին Բենիամինի, Փաղտի որդի Ռափուայ։ 11Ցեղին Զաբուղոնի, Յուդիէլ որդի Սուդիայ։ 12Ցեղին Յովսեփայ՝ որդւոցն Մանասէի, Գադդէ որդի Սուսայ։ 13Ցեղին Դանայ, Ամիէլ որդի Գամայի։ 14Ցեղին Ասերայ, Սաթուր որդի Միքայելի։ 15Ցեղին Նեփթաղիմայ, Աբի որդի Յաբիայ։ 16Ցեղին Գադայ, Գուդիէլ որդի Մակքեայ։ 17Ա՛յս անուանք են արանցն՝ զոր առաքեաց Տէր լրտեսել զերկիրն Քանանացւոց. եւ անուանեաց Մովսէս զանուն Աւսեայ որդւոյ Նաւեայ՝ Յեսու։ 18Եւ առաքեաց զնոսա Մովսէս յանապատէն Փառանու լրտեսե՛լ զերկիրն Քանանացւոց, եւ ասէ ցնոսա. Ելէ՛ք ընդ անապատդ, եւ ամբարձա՛յք ՚ի լեառնն, 19եւ տեսջիք զերկիրն զի՞նչ իցէ. եւ զժողովուրդն որ նստի ՚ի նմա, եթէ զօրաւորագո՞յն իցէ՝ թէ անաւագ, եթէ սակա՞ւք իցեն՝ եթէ բազումք։ 20Եւ զի՞նչ իցէ երկիրն յորում նոքա բնակեալ իցեն, եթէ բարի՞ իցէ՝ եթէ չար. եւ զի՞նչ իցեն քաղաքքն յորս նոքա բնակեալ են. պարսպաւո՞րք են՝ եթէ անպարիսպք. 21եւ զի՞նչ իցէ երկիրն, պարա՛րտ իցէ՝ եթէ տկար. եթէ իցէ՞ ՚ի նմա ծառատունկ՝ եթէ ոչ. եւ ժրասջի՛ք առջի՛ք ՚ի պտղոյ երկրին։ Եւ աւուրք գարնայնո՛յ էին աւուրքն խայծուածոյ խաղողոյ։ 22Եւ ելեալ լրտեսեցին զերկիրն յանապատէն Սինայ մինչեւ ցՐոոբ ՚ի մուտս Եփրաթայ. 23ելին ընդ անապատն՝ եւ եկին մինչեւ ցՔեբրոն. եւ ա՛նդ Աքիման, եւ Սէսի, եւ Թաղամի, եւ ա՛զգքն Ենակայ. եւ Քեբրոն եւթն ամաւ յառաջագոյն շինեալ էր քան զՏայանիս Եգիպտացւոց։ 24Եւ եկին մինչեւ ցՁորն ողկուզոյ, եւ լրտեսեցի՛ն զնա. եւ հատի՛ն անտի ո՛ւռ որթոյ, եւ ողկոյզ մի խաղողոյ ՚ի նմա, եւ բարձին զնա լծակօք՝ եւ ՚ի նռանէ՛ եւ ՚ի թզոյ։ 25Եւ անուանեցին զանուն տեղւոյն՝ Ձո՛ր ողկուզոյ. վասն ողկուզին զոր հատին անտի որդիքն Իսրայէլի։ 26Եւ դարձան անդրէն որդիքն Իսրայէլի լրտեսեալ զերկիրն յե՛տ աւուրց քառասնից. 27եւ եկեալ հասին առ Մովսէս եւ առ Ահարոն, եւ առ ամենայն ժողովուրդ որդւոցն Իսրայէլի յանապատն Փարան Կադէս. եւ ետուն նոցա զրոյց եւ ամենայն ժողովրդեանն։ Եւ ցուցին զպտուղ երկրին, 28եւ պատմեցին նոցա, եւ ասեն ցնա. Չոգա՛ք յերկիր յոր առաքեցեր զմեզ, երկիր՝ որ բղխէ զկաթն եւ զմեղր. եւ ա՛յս է պտուղ նորա։ 29Բայց ազգն սաստի՛կ էր որ բնակեալ էին ՚ի նմա. եւ քաղաքք ամուրք եւ պարսպաւորք եւ մեծամե՛ծք յոյժ. եւ զազգն Ենակայ տեսա՛ք անդ։ 30Եւ Ամաղէկ բնակեալ էր յերկրին ընդ հարաւակողմն. եւ Քետացին եւ Խեւացին եւ Յեբուսացին եւ Ամովրհացին բնակեալ էին առ լերամբքն, եւ Քանանացին՝ առ ծովեզերբն եւ առ Յորդանանաւ։ 31Լռեցո՛յց Քաղէբ զժողովուրդն ՚ի Մովսիսէ, եւ ասէ ցնոսա. Ո՛չ այդպէս է. այլ ելանելո՛վ ելցուք եւ ժառանգեսցուք զնա. զի կարօղ եմք յաղթել նոցա։ 32Եւ արքն որ ընդ նմա երթեալ էին՝ ասէին. Ո՛չ ելցուք, քանզի ո՛չ կարեմք երթալ ՚ի վերայ ազգին, զի զօրագո՛յն քան զմեզ է յոյժ։ 33Եւ զարհուրեցուցին երկրաւն զոր լրտեսեցին՝ զորդիսն Իսրայէլի՝ եւ ասեն. Ընդ երկիրն ընդ որ մե՛ք անցաք լրտեսել զնա, երկիր՝ մարդածա՛խ է բնակչաց իւրոց. եւ զամենայն զազգն զոր տեսաք ՚ի նմա՝ արք յաղթահասակք են. 34տեսաք անդ՝ եւ սկա՛յս, եւ էաք յաչս նոցա իբրեւ մարախ։