Ալէլուիա. ՃԵ։ 105:1: Խոստովան եղերո՛ւք Տեառն զի քաղցր է, զի յաւիտեան է ողորմութիւն նորա։

Ալէլուիա. ՃԵ։

1Խոստովան եղերո՛ւք Տեառն զի քաղցր է, զի յաւիտեան է ողորմութիւն նորա։ 2Ո՛ խօսեսցի զզօրութիւնս Տեառն, լսելի արասցէ զամենայն օրհնութիւնս նորա։ 3Երանի ոյք պահեն զիրաւունս, եւ առնեն զարդարութիւն յամենայն ժամ։ 4Յիշեա՛ զմեզ Տէր ընդ հաճոյս ժողովրդեան քոյ, եւ ա՛յց արա մեզ ՚ի փրկութեան քում։ 5Տեսցո՛ւք մեք զքաղցրութիւն ընտրելոց քոց. ուրա՛խ եղիցուք յուրախութիւն ազգի քոյ, եւ գովեսցուք մեք ՚ի ժառանգութեան քում։ 6Մեղաք մեք ընդ հարսն մեր, անօրինեցաք եւ յանցեաք։ 7Հարքն մեր յԵգիպտոս ո՛չ իմացան զսքանչելիս քո, եւ ո՛չ յիշեցին զբազում ողորմութիւնս քո։ Բարկացուցին զքեզ յանցանելն իւրեանց ընդ ծով Կարմիր. 8փրկեաց զնոսա վասն անուան իւրոյ զի ծանիցեն զզօրութիւնս նորա։ 9Սաստեաց ՚ի ծով Կարմիր եւ ցամաքեցաւ, առաջնորդեաց նոցա ընդ անդունդս որպէս ընդ անապատ։ 10Կեցոյց զնոսա ՚ի ձեռաց ատելեաց նոցա, եւ փրկեաց զնոսա ՚ի ձեռաց թշնամեաց նոցա։ 11Ծածկեաց ծով զնեղիչս նոցա, եւ մի ՚ի նոցանէ ո՛չ ապրեցաւ։ 12Հաւատացին ՚ի բան նորա, եւ օրհնեցի՛ն զօրհնութիւն նորա։ 13Վաղվաղեցին եւ մոռացան զգործս նորա, եւ ո՛չ անսացին խորհրդոյ նորա։ 14Ցանկացան զցանկութիւն յանապատի, եւ փորձեցին զԱստուած յանջրդի։ 15Ետ նոցա զխնդրուածս նոցա, առաքեաց լիութիւն յանձինս նոցա։ 16Բարկացուցին զՄովսէս ՚ի բանակի, եւ զԱհարոն սուրբ Տեառն։ 17Բացաւ երկիր եւ եկուլ զԴադան, եւ ծածկեաց զբանակսն զԱբիրովնի։ 18Հուր վառեցաւ ՚ի ժողովս նոցա, եւ բոց մաշեաց զմեղաւորս։ 19Արարին որթ ՚ի Քորեբ եւ երկի՛ր պագին պատկերի, 20եւ փոխեցին Զփառս իւրեանց ՚ի նմանութիւն որթու խոտակերի։ 21Մոռացան զԱստուած կենարար իւրեանց, որ արար զմեծամեծս յԵգիպտոս, 22զսքանչելիս իւր յերկիր Քամայ, եւ զահ իւր ՚ի վերայ Կարմիր ծովուն։ 23Ասաց սատակել զնոսա, եթէ ո՛չ Մովսէս ընտրեալ կայր առաջի նորա։ Դարձաւ առ Տէր եւ անցոյց զբարկութիւն նորա, զի մի՛ սատակեսցին նոքա։ 24Անարգեցին զերկիրն ցանկալի, եւ ո՛չ հաւատացին բանի նորա։ 25Տրտնջեցին ՚ի բանակս իւրեանց, եւ ո՛չ լուան ձայնի Տեառն։ 26Համբարձ զձեռն իւր ՚ի վերայ նոցա, հարկանել զնոսա յանապատի։ 27Ցրուեսցի՛ զաւակ նոցա ընդ հեթանոսս. ցրուեսցի զաւակ նոցա ընդ գաւառս։ 28Պղծեցան նոքա ՚ի Բէլբեգովր, կերան զզոհեալ եւ զմեռելոտի։ 29Բարկացուցին զնա ՚ի գործս իւրեանց, յաճախեաց ՚ի վերայ նոցա բեկումն։ 30Ապա եկաց ՚ի մէջ Փենէէս, քաւեաց եւ արգելաւ մահ. 31համարեցաւ նմա յարդարութիւն ազգէ յազգ մինչեւ յաւիտեան։ 32Բարկացուցին զնա ՚ի ջուրսն Հակառակութեան. չարչարեցաւ Մովսէս վասն նոցա,. 33զի դառնացուցի՛ն զոգի նորա։ Հրամայեաց շրթամբք իւրովք, 34եւ ո՛չ սատակեցին զազգսն զոր ասաց նոցա Տէր։ 35Խառնակեցան ընդ հեթանոսս եւ ուսան զգործս նոցա. 36ծառայեցին կռոց նոցա, եւ եղեւ նոցա ՚ի գայթագղութիւն։ 37Զոհեցին զուստերս եւ զդստերս իւրեանց դիւաց, 38եւ հեղին արիւն անբիծ։ Արիւն ուստերաց եւ դստերաց իւրեանց, զոր զոհեցին կռոցն Քանանու։ 39Շաղախեցաւ երկիր յարենէ նոցա եւ պղծեցաւ ՚ի գործոց նոցա, զի պոռնկեցա՛ն ՚ի գնացս իւրեանց։ 40Բարկացաւ սրտմտութեամբ Տէր ՚ի վերայ ժողովրդեան իւրոյ, եւ գարշեցոյց զժառանգութիւն իւր յոյժ։ 41Մատնեաց զնոսա ՚ի ձեռս հեթանոսաց, տիրեցին նոցա ատելիք իւրեանց 42եւ թշնամիք իւրեանց նեղեցին զնոսա, եւ խոնարհ եղեն ՚ի ներքոյ ձեռաց նոցա։ 43Բազում անգամ փրկեաց զնոսա, եւ նոքա դառնացուցին զնա ՚ի խորհուրդս իւրեանց, եւ կորացան յանօրէնութեան իւրեանց։ 44Հայեցաւ Տէր ՚ի նեղութիւնս նոցա, ՚ի լսել ձայնի աղօթից նոցա։ 45Յիշեաց զուխտ իւր եւ զղջացաւ ըստ բազում ողորմութեան իւրում. 46ետ զնոսա ՚ի գթութիւնս առաջի ամենայն գերչաց նոցա։ 47Փրկեաց զմեզ Տէր Աստուած մեր, եւ ժողովեաց զմեզ ՚ի հեթանոսաց։ Խոստովան եղիցուք անուան քում սրբոյ, եւ պարծեսցուք յօրհնութիւնս քո։

Կանոնս Գոբղայս. է̃

48Օրհնեալ Տէր Աստուած Իսրայէլի, յաւիտեանս յաւիտենից։ Եւ ասասցէ ամենայն ժողովուրդն. Եղիցի եղիցի։ Տունք. խդ։ ։ Սաղմոս. ժէ։ Տունս. յժդ։