Ալէլուիա. ՃԺ։

1Խոստովան եղէց քեզ Տէր բոլորով սրտիւ իմով, ՚ի խորհուրդս ուղղոց ՚ի ժողովուրդս 2մեծ են գործք Տեառն, եւ քննեալ են յամենայնի կամք նորա։ 3Խոստովանութիւն եւ վայելչութիւն են գործք նորա. արդարութիւն նորա մնա՛յ յաւիտեանս յաւիտենից։ 4Յիշատա՛կ արար սքանչելեաց իւրոց ուղղոց. ողորմած գթա՛ծ է Տէր 5կերակուր տայ երկիւղածաց իւրոց։ Յիշեաց յաւիտենից զուխտ իւր, 6զզօրութիւն գործոց իւրոց պատուիրեաց ժողովրդեան իւրոյ։ 7Տալ նոցա զժառանգութիւն հեթանոսաց, եւ գործք ձեռաց նորա արդարութիւն եւ իրաւունք են։ 8Հաւատարիմ են յամենայնի պատուիրանք նորա, հաստատեալ են յաւիտեանս յաւիտենից, արարեալ են ճշմարտութեամբ եւ ուղղութեամբ։ 9Փրկութիւն առաքեաց Տէր ժողովրդեան իւրում. պատուիրեաց յաւիտենից զուխտ իւր սուրբ եւ ահե՛ղ է անուն նորա։ 10Սկիզբն զգօնութեան երկեւղ Տեառն, իմաստութիւն բարի ամենեցուն որ առնեն զնա, եւ օրհնութիւն նորա մնա՛յ յաւիտեանս յաւիտենից։ Տունք. ը։