Ալէլուիա. ՃԺԲ։

1Օրհնեցէ՛ք մանկունք զՏէր, եւ օրհնեցէ՛ք զանուն Տեառն։ 2Եղիցի անուն Տեառն օրհնեալ, յայսմ հետէ մինչեւ յաւիտեան։ 3Յարեւելից մինչ ՚ի մուտս արեւու, օրհնեալ է անուն Տեառն։ 4Բա՛րձր է ՚ի վերայ ամենայն ազգաց Տէր, եւ յերկինս են փառք նորա։ 5Ո՛վ է որպէս Տէր Աստուած մեր ՚ի բարձունս բնակեալ, 6եւ զխոնարհս տեսանէ յերկնից ՚ի յերկիր։ 7Յարուցանէ զաղքատս յերկրէ, եւ բա՛րձր առնէ զտառապեալս յաղբեւաց։ 8Նստուցանէ զնոսա իշխանս, ընդ իշխանս ժողովրդեան իւրոյ։ 9Բնակեցուցանէ զամուլն ՚ի տան ուրախամիտ, որպէս մայր որդւոց բերկրեալ։ Տունք. ը։