Օրհնութիւնք Աշտիճանաց. ՃԻԸ։

1Բազում անգամ մարտեան ընդ իս ՚ի մանկութենէ իմմէ, ասաց Իսրայէլ։ 2Բազում անգամ մարտեան ընդ իս ՚ի մանկութենէ իմմէ, եւ ինձ ո՛չ յաղթեցին։ 3Զթիկո՛ւնս իմ հարին մեղաւորք, ընդ երկա՛ր արարին զանօրէնութիւնս իւրեանց։ 4Տէր արդա՛ր է, խորտակէ զուլն մեղաւորաց։ 5Ամաչեսցեն եւ յե՛տս դարձցին ամենեքեան՝ ոյք ատեան զՍիովն։ 6Եղիցին նոքա որպէս զխոտ տանեաց, որ մինչչեւ՛ ՚ի բուռն եկեալ էր չորացաւ։ 7Ուստի ո՛չ ելից զբուռն ի՛ւր հնձօղն, եւ ո՛չ զգիրկս իւր որ զորա՛յն ժողովէր։ 8Ո՛չ ասացին ամենեքեան ոյք անցանէին առ նոքօք, թէ օրհնութիւն Տեառն ընդ ձե՛զ է, եւ օրհնեցա՛ք զձեզ ՚ի տանէ Տեառն։ Տունք. ը։