Ալէլուիա. Անգեայ եւ Զաքարիայ. ՃԽԸ։

1Օրհնեցէ՛ք զՏէր յերկնից, օրհնեցէ՛ք զնա ՚ի բարձանց։ 2Օրհնեցէ՛ք զնա ամենայն հրեշտակք նորա, օրհնեցէ՛ք զնա ամենայն զօրութիւնք նորա։ 3Օրհնեցէ՛ք զնա արեգակն եւ լուսին, օրհնեցէ՛ք զնա ամենայն աստեղք եւ լոյս։ 4Օրհնեցէ՛ք զնա երկինք երկնից, եւ ջուրք որ ՚ի վերոյ քան զերկինս օրհնեցէ՛ք զանուն Տեառն։ 5Զի նա ասաց եւ եղեն, հրամայեաց եւ հաստատեցաւ։ 6Կարգեաց զնոսա յաւիտեանս յաւիտենից, հրաման ետ եւ ո՛չ անցանէ։ 7Օրհնեցէ՛ք զՏէր յերկրէ վիշապք, եւ ամենայն խորք։ 8Հուր եւ կարկուտ ձիւն եւ սառն, հողմ եւ մրրիկ որ առնեն զբան նորա։ 9Լերինք եւ ամենայն բլուրք, ծառք պտղաբերք եւ ամենայն մայրք։ 10Գազանք եւ ամենայն անասունք, սողունք եւ ամենայն թռչունք թեւաւորք։ 11Թագաւորք երկրի եւ զօրք իւրեանց, իշխանք եւ ամենայն դատաւորք երկրի։ 12Երիտասարդք եւ կուսանք, ծերք եւ տղայք օրհնեցէ՛ք զանուն Տեառն։ Բարձրացաւ անուն նորա միայն, 13խոստովանութիւն նմա յերկինս եւ յերկրի։ Բարձր առնէ Տէր զեղջեւր ժողովրդեան իւրոյ, 14օրհնութիւն յամենայն սրբոց նորա, որդւոցն Իսրայէլի, ժողովուրդ որ մերձ է առ Տէր։ Տունք. ժդ։