2Սիրեցից զքեզ Տէր զօրութիւն իմ, Տէր հաստատի՛չ իմ ապաւէն իմ եւ փրկիչ իմ։ 3Աստուած օգնակա՛ն իմ եւ ես յուսամ ՚ի նա. ապաւէ՛ն իմ եղջեւր փրկութեան իմոյ ընդունելի իմ է։ 4Օրհնելո՛վ կարդացի առ Տէր, եւ ՚ի թշնամեաց իմոց ապրեցոյց։ 5Շուրջ եղեն զինեւ երկունք մահու. եւ ուղխք անօրէնութեան խռովեցուցին զիս։ 6Վիշտք դժոխոց պաշարեցին զիս. եւ ժամանեցին ինձ որոգայթք մահու։ 7՚Ի նեղութեան իմում ես առ Տէր կարդացի, եւ առ Աստուած իմ աղաղակեցի։ Լուաւ ինձ ՚ի տաճարէ սրբոյ իւրմէ ձայնի աղօթից իմոց, եւ աղաղակ իմ առաջի նորա մտցէ յականջս նորա։ 8Խռովեցաւ եւ դողա՛ց երկիր՝ եւ հիմունք լերանց սասանեցա՛ն եւ խռովեցան՝ զի բարկացաւ ՚ի վերայ նոցա Աստուած։ 9Ել ծուխ ՚ի բարկութենէ նորա, եւ հո՛ւր յերեսաց նորա բորբոքեցաւ, եւ փայլատակունք հատա՛ն ՚ի նմանէ։ 10Խոնարհեցոյց զերկինս եւ էջ, եւ մէ՛գ ՚ի ներքոյ ոտից նորա։ 11Ել ՚ի քրովբէս եւ թռեաւ, եւ սլացաւ նա ՚ի թեւս հողմոց։ 12Եդ զխաւարն ՚ի ծածկոյթ իւր, եւ շո՛ւրջ զնովաւ են յարկք իւր. եւ խաւարային ջուրք մինչեւ յամպս օդոց։ 13՚Ի փայլատակել նորա առաջի նորա, ամպք անցուցին զկարկուտ եւ զկայծակունս հուր։ 14Որոտաց Տէր յերկնից, եւ Բարձրեալն ե՛տ զձայն իւր ՚ի կարկուտ եւ ՚ի կայծակունս հուր։ 15Առաքեաց զնետս իւր եւ ցրուեա՛ց զնոսա, յաճախեաց զփայլատակունս իւր եւ խռովեցո՛յց զնոսա։ 16Երեւեցան աղբեւրք ջուրց, եւ յայտնեցան հիմունք աշխարհի։ ՚Ի սաստէ քումմէ Տէր, եւ ՚ի շնչել հոգւոյ բարկութեան քո։ 17Առաքեաց ՚ի բարձանց եւ ընկալաւ զիս, ընկալաւ զիս ՚ի ջուրց բազմաց։ 18Փրկեսցէ զիս Տէր ՚ի թշնամեա՛ց իմոց հզօրաց, եւ յատելեաց իմոց զի հզօր եղեն քան զիս։ 19Ժամանեցին ինձ յաւուր չարչարանաց իմոց. եղեւ Տէր հզօրիչ իմ, 20եւ եհան զիս յանդորր, եւ փրկեսցէ զիս Տէր՝ զի կամեցաւ զիս։ 21Հատուսցէ ինձ Տէր ըստ արդարութեան իմում. ըստ անբծութեան իմում հատուսցէ ինձ։ 22Ես պահեցից զճանապարհս Տեառն, եւ ո՛չ ամպարշտեցայց յԱստուծոյ իմմէ։ 23Ամենայն իրաւունք նորա առաջի իմ են. զարդարութիւն իւր ո՛չ ՚ի բացէ արար յինէն։ 24Եղէց եւ ես անբիծ ընդ նմա. եւ զգուշացայց յանօրէնութենէ իմմէ։ 25Հատուսցէ ինձ Տէր ըստ արդարութեան իմում, ըստ սրբութեան ձեռաց իմոց առաջի աչաց իւրոց։ 26Ընդ սրբոյն՝ սո՛ւրբ եղիցես, ընդ առն անբծի՝ անբիծ եղիցես, 27ընդ ընտրեալսն ընտրեալ եղիցես, եւ զթեւրսն կործանեսցես։ 28Դու՝ զժողովուրդս խոնարհս կեցուցանես. եւ զաչս ամբարտաւանից դո՛ւ խոնարհեցուցանես։ 29Դու՝ լուսաւո՛ր առնես զճրագ իմ Տէր. Աստուած իմ լո՛յս արա ինձ ՚ի խաւարի։ 30Քեւ փրկեցայց ՚ի փորձութենէ, Աստուծով իմով անցից ընդ պարիսպս։ 31Աստուած իմ անբիծ են ճանապարհք քո, եւ բանք Տեառն ընտրեալ են. եւ ապաւէն ամենեցուն որ յուսան ՚ի նա։ 32Վասն զի ո՞վ է Աստուած բա՛ց ՚ի Տեառնէ, կամ ո՞վ է Աստուած բաց յԱստուծոյ մերմէ։ 33Աստուած որ զգեցուցեր ինձ զօրութիւն՝ եւ եդիր յանբծութեան զճանապարհս իմ։ 34Հաստատեցեր զոտս իմ որպէս զեղջերուի, եւ ՚ի վերայ բարձա՛նց կացուցեր զիս։ 35Ուսուցեր զձեռս իմ ՚ի պատերազմ, եւ արարեր զբազուկ իմ որպէս զաղեղն հաստ. 36եւ ետուր ինձ զպաշտպանութիւն փրկութեան քոյ։ Աջ քո ընկալաւ զիս՝ եւ խրատ քո կանգնեաց զիս ՚ի սպառ, եւ խրատ քո ուսուսցէ զիս։ 37Ընդարձակեցեր զգնացս իմ ՚ի ստորեւ՛ իմով. եւ ո՛չ տկարացան շաւիղք իմ։ 38Հալածեցից զթշնամիս իմ եւ հասից նոցա, եւ ո՛չ դարձայց ՚ի նոցանէ՝ մինչեւ սպառեցից զնոսա։ 39Նեղեցից զնոսա եւ այլ մի՛ կարասցեն կալ. եւ անկցին ՚ի ներքոյ ոտից իմոց։ 40Որ զգեցուցեր ինձ զօրութիւն ՚ի պատերազմի. զյարուցեալսն ՚ի վերայ իմ ներքո՛յ իմ արարեր։ 41Զթշնամիս իմ հալածականս արարեր, եւ զատելիս իմ սատակեցեր։ 42Աղաղակեցին, եւ ո՛չ ոք էր որ փրկէր զնոսա. կարդացին առ Տէր եւ ո՛չ լուաւ նոցա։ 43Մանրեցից զնոսա որպէս փոշի՛ առաջի հողմոյ. որպէս կաւ գռեհաց կոխեցից զնոսա։ 44Փրկեսցէ զիս Տէր ՚ի հակառակութենէ ժողովրդոց, եւ կացուսցէ զիս գլուխ հեթանոսաց։ 45Ժողովուրդ զոր ո՛չ գիտէի ծառայեա՛ց ինձ. եւ ՚ի լուր ակընջաց լուաւ ինձ։ 46Որդիք օտարաց ստեցին ինձ. որդիք օտարաց մաշեցա՛ն եւ կաղացա՛ն ՚ի շաւղաց իւրեանց։ 47Կենդանի է Տէր եւ օրհնեալ է Աստուած, եւ բարձր եղիցի Աստուած փրկութեան իմոյ։ 48Աստուած որ խնդրէ զվրէժ իմ, եւ հնազա՛նդ առնէ զժողովուրդս ընդ ինեւ։ Փրկիչ իմ ՚ի թշնամեաց իմոց բարկացողաց, 49յայնցանէ որ յարուցեալ էին ՚ի վերայ իմ բարձր արարեր զիս, եւ յառնէ անիրաւէ փրկեցեր զիս։ 50Վասն այսորիկ խոստովան եղէց քեզ ՚ի հեթանոսս, եւ անուան քում սաղմոս ասացից։

Կանոնս Գոբղայս. է̃

51Մեծ արարեր զփրկութիւն թագաւորի նորա, առնել ողորմութիւն ընդ օծելոյ նորա, ընդ Դաւթի եւ ընդ զաւակի նորա ազգէ մինչեւ յազգ։ Տունք. ծ։ ։ Սաղմոս. ժէ։ Տունս. մլը։