2Լուիցէ քեզ Տէր յաւուր անձկութեան, օգնական եղիցի քեզ անուն Աստուծոյ Յակովբայ։ 3Առաքեսցէ քեզ Տէր օգնութիւն ՚ի սրբութենէ իւրմէ ՚ի Սիովնէ, եւ ընկալցի՛ զքեզ։ 4Յիշեսցէ Տէր զամենայն պատարագս քո, եւ զուխտս քո ընդունելի՛ արասցէ։ 5Տացէ քեզ Տէր ըստ սրտի քում, եւ զամենայն խորհուրդս քո նա՛ կատարեսցէ։ 6Ցնծասցուք մեք ՚ի փրկութեան քում, յանուն Աստուծոյ մերոյ մեք մե՛ծք եղիցուք. 7Լցուսցէ Տէր զամենայն խնդրուածս քո. այժմ ծանեայք՝ զի կեցոյց Տէր զօծեալ իւր։ Լուաւ սմա յերկնից ՚ի սրբութենէ իւրմէ, ՚ի զօրութիւն փրկութեան աջոյ իւրոյ։ 8Սոքա կառօք եւ սոքա երիվարօք, այլ մեք զանուն Տեառն Աստուծոյ մերոյ կարդասցուք։ 9Սոքա խափանեցան եւ անկան, մեք յարեա՛ք եւ ուղիղք եղաք։ 10Տէր կեցո՛ զթագաւորն եւ լո՛ւր մեզ, յաւուր յորում կարդասցուք առ քեզ։ Տունք. ժ։