՚Ի կատարած. Սաղմոս ՚ի Դաւիթ. ԻԴ։

1Առ քեզ Տէր համբարձի զանձն իմ. 2Աստուած իմ ՚ի քեզ յուսացայ՝ մի՛ ամաչեցից, 3եւ մի՛ ծիծաղեսցին զինեւ թշնամիք իմ։ Ամենեքեան որ համբերեն քեզ մի՛ ամաչեսցեն, 4այլ ամաչեսցեն անօրէնք յունայնութեան իւրեանց։ Զճանապահս քո Տէր ցո՛յց ինձ, եւ զշաւիղս քո ուսո՛ ինձ։ 5Առաջնորդեա՛ ինձ ՚ի ճշմարտութեան քում եւ ուսո՛ զիս, զի դու ես Աստուած փրկիչ իմ. եւ ես քեզ համբերի զօրհանապազ։ 6Յիշեա՛ Տէր՝ զգթութիւնս քո եւ զողորմութիւնս որ ենն յաւիտենից։ 7Զմեղս մանկութեան իմոյ եւ զանգիտութեան իմոյ մի՛ յիշեր. այլ յիշեա՛ զիս Տէր ըստ ողորմութեան քում՝ վասն քաղցրութեան քոյ, 8զի քաղցր եւ ուղիղ ես Տէր։ Վասն այսորիկ օրէնսգէ՛տ առնես զմեղաւորս ՚ի ճանապարհի, 9առաջնորդե՛ս հեզոց ՚ի դատաստանի. ուսուցանե՛ս հեզոց զճանապահս քո։ 10Ամենայն ճանապարհք Տեառն ողորմութեամբ եւ ճշմարտութեամբ են այնոցիկ, որ խնդրեն զուխտ եւ զվկայութիւն նորա։ 11Վասն անուան քոյ Տէր քաւեա՛ զմեղս իմ զի բազում եղեն. 12ո՛վ է մարդ որ երկնչի ՚ի Տեառնէ, օրէնսգէ՛տ առնէ զնա ՚ի ճանապարհ յոր եւ հաճեցաւ։ 13Անձն նորա ՚ի բարութեան հանգիցէ, եւ զաւակ նորա ժառանգեսցէ զերկիր։ 14Զօրութի՛ւն է Տէր երկիւղածաց իւրոց, եւ զկտակարանս իւր ուսուցանէ նոցա։ 15Աչք իմ յամենայն ժամ առ Տէր. եւ նա՛ հանէ յորոգայթէ զոտս իմ։ 16Նայեա՛ առ իս եւ ողորմեա՛ ինձ, զի միամօր եւ աղքատ եմ ես։ 17Նեղութիւնք սրտի իմոյ բազում եղեն յոյժ, եւ ՚ի վշտաց իմոց հա՛ն զիս։ 18Տե՛ս զխոնարհութիւն իմ եւ զվաստակ իմ, եւ թո՛ղ ինձ զամենայն մեղս իմ։ 19Տե՛ս զթշնամիս իմ զի բազում եղեն, ատելութիւն զոր ՚ի նանիր ատեցին զիս։ 20Պահեա՛ զանձն իմ եւ փրկեա՛ զիս, եւ մի՛ յամօթ եղէց զի յուսացայ ՚ի քեզ։ 21Անբիծք եւ ուղիղք կցորդ եղեն ինձ, եւ ես քեզ համբերի. 22փրկեա՛ Աստուած զԻսրայէլ յամենայն նեղութեանց նորա։ Տունք. ժը։