Սաղմոս ՚ի Դաւիթ. ԻԷ։

1Առ քեզ կարդացի Աստուած իմ, մի՛ լռեր յինէն. մի՛ երբէք լռիցես յինէն. զի մի՛ նմանիցեմ այնոցիկ որ իջանեն ՚ի գուբ։ 2Լո՛ւր Տէր ձայնի խնդրուածաց իմոց յաղաչել ինձ առ քեզ, ՚ի համբառնա՛լ ձեռաց իմոց ՚ի տաճար սուրբ քո։ 3Մի՛ համարիր ընդ ամպարիշտս զանձն իմ. մի՛ ընդ այնոսիկ որ գործեն զանօրէնութիւն կորուսաներ զիս։ Ոյք խօսէին զխաղաղութիւն ընդ ընկերս իւրեանց, եւ չարութիւն է ՚ի սիրտս նոցա։ 4Տո՛ւր նոցա Տէր ըստ գո՛րծս նոցա, ըստ անօրէնութեան գնացից նոցա հատո՛ նոցա։ Ըստ գործոց ձեռաց նոցա հատո՛ նոցա՝ զհատուցումն նոցա նոցին։ 5Ո՛չ իմացան նոքա զգործս Տեառն, եւ ո՛չ ՚ի գործս ձեռաց նորա հայեցան. կործանեսցես զնոսա եւ այլ մի՛ շինեսցին։ 6Օրհնեալ է Տէր զի լուաւ ձայնի՛ աղօթից իմոց. 7Տէր օգնակա՛ն իմ եւ պաշտպան իմ։ ՚Ի նա յուսացաւ սիրտ իմ, օգտեցաւ եւ զուարճացաւ մարմին իմ. եւ ես կամօք իմովք խոստովան եղէց նմա։ 8Տէր զօրութիւն ժողովրդեան իւրոյ, ապաւէն փրկութեան օծելոյ իւրոյ։ 9Փրկեա՛ զժողովուրդս քո. եւ օրհնեա՛ զժառանգութիւնս քո, հովուեա՛ եւ բարձրացո՛ զնոսա մինչեւ յաւիտեան։ Տունք. ժա։