2Բղխեսցէ՛ սիրտ իմ զպատգամս քո բարիս, եւ ասացից զգործս իմ թագաւորի։ Լեզու իմ որպէս գրիչ արագագի՛ր դպրի, 3գեղեցիկ տեսանելով քան զամենայն որդիս մարդկան։ Սփռեցան շնորհք ՚ի շրթանց քոց. վասն այնորիկ օրհնեա՛ց զքեզ Աստուած յաւիտեան։ 4Ա՛ծ զսուր ընդ մէջ քո Հզօր, 5զվայելչութիւն գեղոյ քոյ։ Լարեա՛ ուղղեա՛ եւ թագաւորեա՛՝ վասն ճշմարտութեան հեզութեան եւ արդարութեան, եւ առաջնորդեսցէ քեզ սքանչելապէս աջ քո։ 6Նետք քո սրեալ են Հզօր, եւ ժողովուրդք ՚ի ներքոյ քոյ անկցին, ՚ի սիրտս թշնամեաց թագաւորի։ 7Աթոռ քո Աստուած յաւիտեանս յաւիտենից, գաւազան ուղղութեան գաւազան արքայութեան քոյ։ 8Սիրեցեր զարդարութիւն, եւ ատեցեր զանօրէնութիւն։ Վասն այսորիկ օծ զքեզ Աստուած Աստուած քո իւղով ուրախութեամբ, առաւել քան զընկերս քո։ 9Զմուռս եւ ստաշխն եւ կասիա ՚ի զգեստէ քումմէ, ՚ի տաճարաց փղոսկրէից, ուստի ուրախ արարին զքեզ 10դստերք թագաւորաց ՚ի պատիւ քո։ Կացցէ դշխոյ ընդ աջմէ քումմէ, ՚ի հանդերձս ոսկեհուռն զարդարեալ եւ պաճուճեալ։ 11Լո՛ւր դուստր եւ տե՛ս՝ խոնարհեցո՛ զունկն քո. մոռա՛ զժողովուրդ քո եւ զտուն հօր քոյ. 12զի ցանկացաւ թագաւոր գեղոյ քոյ։ Սա ինքն է Տէր քո՝ երկի՛ր պագցես սմա, եւ դուստր Ծուրայ երկի՛ր պագցէ սմա. եւ պատարագօք 13զերեսս սորա պաշտեսցեն մեծամեծք ժողովրդոց։ 14Ամենայն փառք դստեր թագաւորի ՚ի ներքոյ, ՚ի վերջաւորս ոսկեհուռն 15զարդարեալ եւ պաճուճեալ։ Տարցին թագաւորի կուսանք զհետ նորա, եւ զընկերս նորա տարցին նմա։ 16Ածցեն ցնծութեամբ եւ ուրախութեամբ եւ տարցին ՚ի տաճար թագաւորի, 17եւ փոխանակ հարց քոց եղիցին որդիք քո։ Կացուսցես զնոսա իշխա՛նս ընդ ամենայն երկիր, 18յիշեսցի անուն քո ընդ ամենայն ազգս ազգաց։ Վասն այսորիկ ժողովուրդք խոստովա՛ն եղիցին առ քեզ, յաւիտեան՝ եւ յաւիտեանս յաւիտենից։ Տունք. ժը