3Ողորմեա՛ ինձ Աստուած ըստ մեծի ողորմութեան քում. ըստ բազում գթութեան քում քաւեա՛ զանօրէնութիւնս իմ։ 4Առաւել լուա՛ զիս յանօրէնութենէ իմմէ. եւ ՚ի մեղաց իմոց սո՛ւրբ արա զիս։ 5Զանօրէնութիւնս իմ ես ինձէ՛ն գիտեմ, եւ մեղք իմ առաջի իմ են յամենայն ժամ։ 6Քեզ միայն մեղայ Տէր, եւ չար առաջի քո արարի։ Որպէս արդար եղիցես ՚ի բանս քո, եւ յաղթօղ ՚ի դատել քեզ։ 7Անօրէնութեամբ յղացաւ, եւ ՚ի մեղս ծնաւ զիս մայր իմ։ 8Դու Տէր զճշմարտութիւն սիրեցեր, զանյայտս եւ զծածկեալս իմաստութեամբ քով յայտնեցեր ինձ։ 9Ցօղեա՛ յիս մշտկաւ եւ սուրբ եղէց, լուա՛ եւ քան զձիւն սպիտակ եղէց։ 10Լսելի՛ արա ինձ ցնծութիւն եւ ուրախութիւն, եւ ցնծասցեն ոսկերք իմ տառապեալք։ 11Դարձո՛ զերեսս քո ՚ի մեղաց իմոց. զամենայն անօրէնութիւնս իմ քաւեա՛ յինէն։ 12Սիրտ սուրբ հաստեա՛ յիս Աստուած, եւ հոգի ուղի՛ղ նորոգեա ՚ի փորի իմում։ 13Մի՛ ընկենուր զիս Տէր յերեսաց քոց, եւ զՀոգի Սուրբ քո մի՛ հաներ յինէն։ 14Տո՛ւր ինձ ցնծութիւն փրկութեան, եւ հոգւով պետութեամբ քով հաստատեա՛ զիս։ 15Ուսուցից անօրինաց զճանապահս քո, եւ ամպարիշտք առ քե՛զ դարձցին։ 16Փրկեա՛ զիս յարենէ Աստուած Աստուած փրկութեան իմոյ. ցնծասցէ՛ լեզու իմ յարդարութեան քում։ 17Տէր եթէ զշրթունս իմ բանաս, բերան իմ երգեսցէ զօրհնութիւնս քո։ 18Թէ կամեցեալ էիր պատարագս մատուցանէաք. բայց դու ընդ ողջակէզս իսկ ո՛չ հաճեցար։ 19Պատարագ Աստուծոյ հոգի խոնարհ, զսիրտ սուրբ եւ զհոգի խոնարհ Աստուած ո՛չ արհամարհէ։ 20Բարի՛ արա Տէր կամօք քովք Սիոնի, եւ շինեսցին պարիսպք Երուսաղեմի։ 21Յայնժամ հաճեսցիս ընդ պատարագս արդարութեան. ուխտից պատարագս հանցեն ՚ի սեղան քո զուարակս։ Տունք. ի։