2Յարիցէ Աստուած եւ ցրուեսցի՛ն ամենայն թշնամիք նորա, փախիցեն ատելիք նորա յերեսաց նորա։ 3Որպէս պակասէ ծուխ պակասեսցին, որպէս հալի մո՛մ առաջի հրոյ՝ այնպէս կորիցեն մեղաւորք յերեսաց Աստուծոյ։ 4Արդարք ուրախ եղիցին՝ ցնծասցեն առաջի նորա, եւ զուարճասցին յուրախութեան իւրեանց։ 5Օրհնեցէք զԱստուած եւ սաղմո՛ս ասացէք անուան նորա. ճանապարհ արարէք այնմիկ որ նստի ընդ արեւմուտս՝ եւ Տէ՛ր է անուն նորա։ Ցնծասցեն առաջի նորա, եւ խռովեսցի՛ն յերեսաց նորա։ 6Որ հայրն է որբոց եւ դատաւո՛ր այրեաց, Աստուած ՚ի տեղւոջ սրբութեան իւրում։ 7Աստուած բնակեցուցանէ՛ զմիակրօնս ՚ի տան, եւ հանէ զկապեալսն քաջութեամբ իւրով, սոյնպէս եւ զդառնացօղս որ բնակեալ են ՚ի գերեզմանս։ 8Աստուած ընդ ելանել քեզ առաջի ժողովրդեան քոյ. ընդ անցանել քեզ ընդ անապատ 9երկիր շարժեցա՛ւ։ Քանզի եւ երկինք ցօղեցին յերեսաց Աստուծոյ ՚ի Սինէ, առաջի Աստուծոյ Իսրայէլի։ 10Անձրեւ կամաց պատրաստեցեր Աստուած ժառանգութեան քում. թէպէտ հիւանդացաւ՝ սակայն դու հաստատեցեր զնա, 11եւ գազանք քո բնակեսցեն ՚ի նմա։ Պատրաստ արարեր քաղցրութեամբ քով աղքատի Աստուած. 12Տէր տացէ զբան ոյք աւետարանեն զօրութեամբ բազմաւ։ 13Թագաւոր զօրութեանց սիրելւոյ, զգեղեցկութիւն տան քո բաժանեալ յաւարի, 14թէպէտ եւ ննջեսջիք ՚ի մէջ վիճակաց։ Թեւք աղաւնւոյ արծաթապատ, եւ թիկնամէջք նորա ՚ի գոյն ոսկւոյ։ 15՚Ի գումարել երկնաւորին զթագաւորս ՚ի վերայ նորա, ձիւնասցին ՚ի Սաղմոն։ 16Լեառն Աստուծոյ լեառն պարարտ լեառն մածեալ եւ լեառն պարարտ, 17եւ զի՞նչ կարծէք լերինք հպարտացեալք։ Լեառն ընդ որ հաճեցաւ Աստուած բնակիլ ՚ի նմա. քանզի եւ Տէր իսկ բնակեսցէ ՚ի նմա ՚ի սպառ։ 18Կառք Աստուծոյ բիւրապատի՛կք հազարք ուղղիչք, եւ Տէր ՚ի նոսա ՚ի Սինէ սրբութենէ իւրմէ։ 19Ե՛լ ՚ի բարձունս գերեաց զգերութիւն. ա՛ռ աւար բաշխեաց պարգեւս եւ ետ որդւոց մարդկան. քանզի թերահաւատից եւս բնակեալ եղիցի ՚ի նմա։ 20Տէր Աստուած օրհնեալ. օրհնեալ Տէր զօրհանապազ, առաջնորդեսցէ՛ մեզ Աստուած փրկիչ մեր։ 21Աստուած մեր Աստուած կենարար, եւ ՚ի Տեառնէ են ելք մահու։ 22Բայց սակայն Աստուած փշրեսցէ՛ զգլուխ թշնամեաց մերոց, եւ զհերն կարճովին, որ գնան յանօրէնութեան իւրեանց։ 23Ասաց Տէր. ՚Ի խորոց անդնդոց դարձուցից, եւ ՚ի միջոյ ժանեաց զայն ՚ի դո՛ւրս կորզեցից։ 24Որպէս թացցի ոտն քո յարեան, եւ լեզուք շանց քոց յարենէ թշնամեաց քոց։ 25Երեւեցան գնացք քո Աստուած, գնացք Աստուծոյ թագաւորին մերոյ սրբոյ։ 26Կանխեցին իշխանք հանել զօրհնութիւն, ՚ի մէջ գուսանաց եւ գովչաց։ 27Յեկեղեցիս օրհնեցէք զԱստուած, եւ զՏէր յաղբերացն Իսրայէլի։ 28Անդ Բենիամին՝ ՚ի տղայութեան զարմանալի, իշխանք Յուդայ առաջնորդք նորա՝ իշխանք Զաբուղոնի եւ իշխանք Նեփթաղիմայ։ 29Հրամայեա՛ Աստուած զօրութեամբ քով. զօրացո՛ զայս զոր հաստատեցեր ՚ի մեզ։ 30՚Ի տաճարի քում յԵրուսաղէմ, քեզ մատուսցեն թագաւորք զպատարագս։ 31Սաստեա՛ ՚ի գազան եղեգան, ՚ի ժողովս զուարակաց՝ եւ ՚ի դասս երնջուց։ Խոտեսցին այնոքիկ որ ընտրեալ են արծաթով, ցրուեա՛ զհեթանոսս եւ ոյք կամին ընդ պատերազմ։ 32Եկեսցեն հրեշտակք յԵգիպտոսէ. Հնդիկք յառաջագոյն ձեռնտո՛ւ լիցին առ Աստուած։ 33Թագաւորութիւնք երկրի օրհնեցէ՛ք զԱստուած, եւ սաղմո՛ս ասացէք Տեառն։ Ճանապա՛րհ արարէք այնմիկ, 34որ նստի յերկի՛նս երկնից ընդ յարեւելս։ Ահա տացէ զձայն իւր զձա՛յն զօրութեան, եւ տո՛ւք զփառս Աստուծոյ։ 35՚Ի վերայ Իսրայէլի մեծվայելչութիւն նորա, եւ զօրութիւն նորա մինչեւ յամպս երկնից։ 36Սքանչելի է Աստուած ՚ի վերայ սրբոց իւրոց, Աստուած Իսրայէլի։ Նա տացէ զօրութիւն հաստատութիւն ժողովրդեան իւրոյ. օրհնեա՛լ է Աստուած։ Տունք. լը։