Սաղմոս ՚ի Դաւիթ օրհնութեան. ՂԷ։

1Օրհնեցէ՛ք զՏէր յօրհնութիւն նոր, զի սքանչելիս արար։ Փրկեաց զնա աջ իւր, եւ բազուկ սուրբ իւր։ 2Եցոյց Տէր զփրկութիւն իւր, առաջի ազգաց յայտնեաց զարդարութիւն իւր։ 3Յիշեաց ողորմութեամբ իւրով զՅակովբ, ճշմարտութեամբ իւրով զտունն Իսրայէլի. եւ տեսին ամենայն ծագք երկրի զփրկութիւն Աստուծոյ մերոյ։ 4Աղաղակեցէ՛ք առ Տէր ամենայն երկիր, օրհնեցէ՛ք ցնծացէ՛ք եւ սաղմոս ասացէք։ 5Սաղմո՛ս ասացէք Աստուծոյ մերում օրհնութեամբ, օրհնութեամբ եւ ՚ի ձայն սաղմոսաց։ 6՚Ի ձայն օրհնութեան կռածոյ փողոյ. օրհնութեամբ ցնծութեամբ եւ ՚ի ձայն եղջե՛ր փողոյ. եւ աղաղակեցէ՛ք առաջի թագաւորին Տեառն։ 7Խռովեսցի ծով լրիւ իւրով, տիեզերք եւ ամենայն բնակիչք նորա. 8եւ գետք ծափս հարցեն ՚ի միասին ձեռամբ։ 9Լերինք ցնծասցեն առաջի Տեառն, զի գայ եւ հասեալ է Տէր ՚ի դատել զերկիր։ Դատի զաշխարհս արդարութեամբ, եւ զժողովուրդս իւր ուղղութեամբ։ Տունք. ժ։ Գոբղայս. լգ։