1Եւ տեսի՝ եւ ահա Գա՛ռն կայր ՚ի վերայ լերինն Սիոնի. եւ ընդ նմա հարեւր քառասուն եւ չորս հազարք, որ ունէին զանուն նորա, եւ անուն Հօր նորա գրեալ ՚ի վերայ ճակատուց նոցա: 2Եւ լուայ ձայն յերկնից որպէս զձայն ջուրց բազմաց՝ եւ ձայն որոտման մեծի. եւ լուա՛յ իբրեւ զձայն քնարահարաց, զի հարկանէին զքնարս իւրեանց: 3Եւ երգէին զերգս նո՛րս առաջի աթոռոյն՝ եւ առաջի չորից կենդանեացն՝ եւ առաջի երիցանցն. եւ ո՛չ ոք կարէ գիտել զերգս նոցա. բայց միայն հարեւր քառասուն եւ չորս հազարքն, որք ազատեա՛լ են յերկրէ: 4Սոքա՛ են՝ որք ընդ կանայս ո՛չ խառնակեցան, եւ են կուսանք. սոքա զկնի երթան Գառինն ուր եւ երթիցէ. սոքա ընտրեցան ՚ի մարդկանէ առաջի Աստուծոյ եւ Գառինն: 5Եւ ՚ի բերան նոցա ո՛չ գտաւ սուտ, զի անբի՛ծք են:

6Եւ տեսի ա՛յլ հրեշտակ թռուցեալ ՚ի մէջ երկնից. եւ ունէր աւետի՛ս յաւիտենական՝ աւետարանել ամենայն ազգաց, եւ լեզուաց որ բնակեալ են յերկրի: 7Եւ ասէ՛ր ՚ի ձայն մեծ. Երկերո՛ւք յԱստուծոյ՝ եւ տո՛ւք փառս նմա, զի եկն ժամ դատաստանի նորա. եւ երկի՛ր պագէք Արարչին երկնի եւ երկրի եւ ծովու եւ աղբերաց ջուրց: 8Եւ ա՛յլ հրեշտակ երկրորդ գայր զհետ նորա եւ ասէր. Անկա՛ւ անկա՛ւ Բաբելոն մեծն՝ ՚ի գինւոյ արբեցութենէ՝ ՚ի ցասմանէ՝ ՚ի պոռնկութենէ իւրմէ, որ արբեցոյց զամենայն հեթանոսս:

9Եւ ա՛յլ հրեշտակ երրորդ գա՛յր զհետ նոցա՝ եւ ՚ի ձայն մեծ ասէր. Ո՛վ ոք երկրպագեաց գազանին եւ պատկերի նորա, եւ կամ զդրոշմ նշանի՛ նորա ա՛ռ ՚ի ճակատ իւր եւ կամ ՚ի վերայ աջու ձեռին իւրոյ, 10այնպիսին արբցէ՛ ՚ի բաժակէ ցասմանն Աստուծոյ՝ արկելոյ յանապակէ բարկութեան բաժակին. եւ տանջեսցի՛ հրով եւ ծծմբով առաջի Աստուծոյ եւ Գառինն: 11Եւ ծուխ նոցա ելցէ՛ յաւիտեանս յաւիտենից. եւ ո՛չ ունին հանգիստ՝ որք երկի՛ր պագին գազանին ՚ի տուէ եւ ՚ի գիշերի. եւ որք երկիր պագին պատկերին, եւ առին զդրոշմ եւ զանուն նորա: 12Եւ համբերութիւն սրբոցն աստ է. ա՛յս որք պահեն զպատուիրանս Աստուծոյ, եւ զհաւատս Յիսուսի: 13Եւ լուա՛յ ձայն յերկնից՝ որ ասէր ցիս. Գրեա՛. Երանի՛ մեռելոցն որք ՚ի Տէր ննջեցին այժմիկ վաղվաղակի. զայս ասէ Հոգին, քանզի հանգեա՛ն յաշխատութենէ իւրեանց. բայց միայն գործք իւրեանց չոգան զհետ նոցա:

14Եւ տեսի՝ եւ ահա ա՛մպ սպիտակ, եւ ՚ի վերայ ամպոյն նստէր նման Որդւոյ մարդոյ, եւ ՚ի գլո՛ւխ իւր պսա՛կ ոսկի, եւ ՚ի ձեռին իւրում ունէր գերանդի սրեալ: 15Եւ այլ հրեշտակ ելանէր յերկնից, աղաղակէ՛ր ՚ի ձայն մեծ՝ եւ ասէր. Որ նստիսդ ՚ի վերայ ամպոյդ՝ առաքեա՛ զգերանդիդ քո՝ եւ հնձեա՛, զի եկն ժամանակ հնձոց, եւ հասեալ են հունձք երկրի: 17Եւ այլ հրեշտակ ելանէր ՚ի տաճարէն որ յերկինս, եւ ունէր եւ սա՛ գերանդի սրեալ: 18Եւ ա՛յլ հրեշտակ ելանէր ՚ի սեղանոյն, որ ունէր իշխանութիւն ՚ի վերայ հրոյ, եւ աղաղակեաց ՚ի ձա՛յն մեծ առ հրեշտակն՝ որ ունէր զգերանդին սրեալ՝ եւ ասէր. Կթեա՛ զողկոյզս յայգւոյ երկրէ, զի հասեա՛լ է խաղողդ ՚ի դմա: 19Եւ արկ հրեշտակն զգերանդի իւր յերկիր, եւ կթէր զխաղող նորա, եւ արկանէ՛ր ՚ի հնծանն Աստուծոյ ՚ի մեծ: 20Եւ կոխեցաւ հնծանն արտաքոյ քաղաքին, եւ ելանէ՛ր ՚ի հնծանէն արիւն մինչեւ ՚ի սանձս ձիոյն. եւ երկայնութիւն նորա հազա՛ր եւ վեց հարեւր ասպարէս: