1Տէր Հայր կենաց իմոց եւ Աստուած իմ, մի՛ թողուր զիս ՚ի խորհուրդս նոցա: 2Եւ ՚ի վերայ խորհրդոց իմոց ո՞ կացուսցէ խրատ սաստից, եւ ՚ի վերայ սրտի իմոյ հանճար իմաստութեան. 3զի մի՛ յաճախեսցեն տգիտութիւնք իմ, եւ մեղք իմ ՚ի վերայ իմ մի՛ բազմասցին. եւ մի՛ ընդ ոտիւք գտայց անկեալ թշնամեաց իմոց: 4Տէր Հայր եւ Աստուած կենաց իմոց, զբաղումն աչաց ինձ մի՛ տար, 5եւ զցանկութիւն աչաց եւ սրտի հեռացո յինէն: 6Պէտք մարմնոյ եւ ցանկութիւն գիջութեան ինձ մի յաղթեսցէ, եւ բանս անձին ժպրհութեան ինձ մի՛ պատրաստեր: 7Զխրատ իմաստութեան լուարուք, եւ որ պահեսցէ զնա՝ մի՛ կործանեսցի շրթամբք: 8Հպարտն եւ հայհոյիչն եւ անօրէնն կործանեսցին: 9Զբերան քո մի՛ ընդելացուսցես յերդումն՝ զի կործանումն մեծ է ՚ի նմանէ: 10Եւ յանուն Սրբոյն երդմամբ մի՛ սովորիր, 11զի որ յաճախէ երդնուլ՝ ՚ի մեղաց ո՛չ ազատի. 13զի թէ ստիցէ՝ մեղք նորա ՚ի վերայ նորա, եւ թէ անցցէ ընդ երդումն՝ կրկին վնաս. 14եւ թէ ՚ի տարապարտուց երդուաւ՝ սակայն ո՛չ արդարանայ: 15Զի են բանք երդման՝ որ հաւասար են մահու, մի՛ գտցին այսոքիկ ՚ի ժառանգութեան արդարոց. 16եւ ՚ի մեղս անօրինաց մի՛ գնասցես, 17եւ զբերան քո մի՛ սովորեցուսցես յերդումն ընդ նոսա, 19զի մի՛ յետոյ բացցես զաչս, եւ զօր ծնընդեան քո նզովեսցես: 21Երկու իրք են որ յաճախեն ՚ի մեղս, եւ երրորդն հասուցանէ զբարկութիւն: 22Բարկ անձն իբրեւ զհուր՝ զի այրի եւ ո՛չ շիջանի՝ մինչեւ կլանէ ինչ. 23եւ մարդ պոռնիկ անդամօք մարմնոյն՝ ո՛չ դադարէ, մինչեւ հուր բորբոքի. 24զի մարմին նորա քաղցր է, եւ ՚ի չարեաց ո՛չ դադարէ մինչեւ մեռցի: 25Զի ասէր ՚ի կենդանութեան իւրում, 26թէ ես յումմէ երկնչիմ, 27եւ զմեղս իմ Բարձրեալն ո՞ւր յիշեսցէ: 28Ո՛չ գիտաց՝ թէ աչք Տեառն տեսանէ զգաղտնիս, եւ զվախճան նորա նա սահմանեաց. 30՚ի մէջ քաղաքաց պարտաւորեսցի այնպիսին, 31եւ ուր ակն ո՛չ ունիցի՝ կալցին զնա: 32Սոյնպէս կին որ թողու զայր իւր, եւ ստանայ ժառանգ յօտարէ. 33նախ՝ զօրէնս Բարձրելոյն անարգեաց, երկրորդ անգամ՝ յայր իւր մեղաւ, երրորդ անգամ՝ շնութեամբ պոռնկեցաւ: 34Զայնպիսին յատեան մատուսցեն, եւ որդւովքն հանդերձ դատապարտեսցեն. 35զի արմատք որդւոցն մի՛ հաստատեսցին, եւ ոստք նոցա պտուղ մի՛ բերցեն. 36զի յիշատակ նոցա յանէծս հասցէ՝ եւ մի՛ ջնջեսցի, 37զի ծանիցեն մնացեալքն՝ թէ չի՛ք ինչ լաւ՝ քան զերկիւղ Տեառն, եւ չիք այլ քաղցր՝ քան զհայել ՚ի պատուիրանս Աստուծոյ: