1Անուն վատ՝ ամօթ եւ անարգանք ժառանգէ, եւ մարդ մեղաւոր զերկխօսութիւն: 2Մի՛ հպարտանար յանձին քո խորհուրդ՝ 3զի մի՛ ապականիցես զպտուղ քո, եւ անարգեսցիս իբրեւ զփայտ անպտուղ: 4Անձն չար կորուսանէ զըստացիչս իւր, եւ ոտնհար լիցի անձն իւր թշնամեաց իւրոց: 5Քաղցրախօս մարդ՝ բազում բարեկամս առնէ, եւ լեզու քաղցր՝ ՚ի բազմաց յաճախ առնու գովութիւն: 6Ո՛րդեակ՝ բազումք եղիցին բարեկամք քո, բայց ՚ի հազարաց եղիցի քեզ մի խորհրդակից: 7Եթէ ստանաս քեզ բարեկամ՝ ՚ի ժամանակի նեղութեան ստացիր, բայց մի վաղվաղակի հաւատար ՚ի նա. 8զի են բարեկամք սիրոյ ժամանակի, բայց յաւուր բարկութեան ոչինչ են: 9Եւ է՛ բարեկամ՝ որ լինի ՚ի տեղի թշնամւոյ, եւ առ կագ զթշնամութիւն իւր յայտնէ նախատել զքեզ: 10Բարեկամ հաղորդ սեղանոյ՝ ո՛չ օգնէ քեզ ՚ի նեղութեան. 11եւ բարեաց քոց լիցի բաժանորդ՝ որպէս եւ դու. 12եւ թէ նեղութիւն հասանէ քեզ՝ ամբաստան լիցի զքէն, եւ յերեսաց քոց թագուն շրջի: 13Զա՛տ կաց ՚ի թշնամեաց քոց, եւ ՚ի սուտակասպաս բարեկամէ եւ յերկխօսէ զգո՛յշ լեր: 14Բարեկամ հաւատարիմ՝ աշտարակ ամուր, եւ որ եգիտ զնա՝ եգիտ գանձ: 15Հաւատարիմ բարեկամի չիք գինք, 17եւ որ ՚ի Տեառնէ երկնչի՝ բարեկամ բարի յաջողի նմա, զի որպէս եւ նա է՝ նոյնպէս եւ բարեկամն: 18Ո՛րդեակ՝ ՚ի մանկութեան քում ընտրեա՛ զիմաստութիւն, եւ մինչեւ ՚ի ծերութիւն գտանես զհանճար: 21Եւ զի դժուարին է հանճար տգիտաց, զի ո՛չ կարեն նմա հասու լինել: 23Զգօնութիւն ըստ անուան իւրում կայ, եւ յայտնի բազմաց ո՛չ է: 24Լո՛ւր ինձ որդեա՛կ, եւ ընկալ զխրատ իմ, եւ մի՛ լինիր ՚ի բաց ՚ի հանճարէ իմմէ: 25Ա՛րկ դու զոտս քո ՚ի կապս նորա, եւ ընդ անուր նորա զպարանոց քո: 27Յամենայն մտաց մատի՛ր դու առ նա, եւ յամենայն զօրութենէ պահեա՛ զճանապարհս նորա: 28Խնդրեա՛ դու եւ քննեա՛ եւ յայտնեա՛ ՚ի քեզ. 29եւ ՚ի վախճանի գտցես զհանգիստ նորա: 30Եւ կապանք իմաստութեան եղիցին քեզ ապաստանս զօրութեան, եւ անուրք նորա ՚ի զարդ ոսկւոյ: 32Եւ պսակ ցնծութեան դիցի ՚ի գլուխ քո: 33Ո՛րդեակ՝ եթէ կամիս խորագէտ լինել՝ 35՚ի մէջ ծերոց կացցես, եւ որ իմաստունն է՝ ՚ի նա մերձեսցիս: Զօր ամենայն զպատգամս Աստուծոյ կամեա՛ դու լսել, եւ առակք իմաստութեան ՚ի քէն մի անցցեն: 36Եթէ զոք ՚ի հանճարեղաց գտցես, ստէպ կանխեա՛ առ նա: 37Խորհեա՛ դու ՚ի հրամանս Տեառն, եւ նա հաստատեսցէ զսիրտ քո, եւ զիմաստութեան ցանկութիւն տացէ քեզ: