1Եւ սոքա եկին առ Դաւիթ ի Սիկեղակ, մինչդեռ նեղեալ էր յերեսաց Սաւուղայ որդւոյ Կիսեայ. եւ սոքա էին ի զօրաւորսն օգնականք ի պատերազմին, 2եւ աղեղամբ յաջուց եւ յահեկաց, եւ պարսաւորք քարամբք եւ նետիւք, յեղբարցն Սաւուղայ ի Բենիամինէ 3իշխան Աքիեզեր, եւ Յովաս որդիք Սամայ՝ Գաբաացի, եւ Յեզեէլ եւ Փաղէտ որդիք Ազմովթայ, Բարաքիա եւ Յէու Անաթովթացի, 4Սամէաս Գաբաւոնացի, զօրաւոր ի մէջ երեսնից, եւ ի վերայ երեսնիցն, Յերեմիաս եւ Յեզիէլ եւ Յովնան եւ Զաբադ՝ ի Գադերոնայ, 5Եղիոզա եւ Յարիմութ եւ Բաաղիա եւ Սամարիա եւ Սափատիաս յԱրիբեղայ, 6Եղկանա, Յեսիա, Եղիէլ եւ Յովզարայ եւ Յեզբամա Կորացիք, 7Յովէլ եւ Զաբադիա, որդիք Յերոմայ Գեդովրացւոյ։

8Եւ ի Գադայ որոշեցան առ Դաւիթ, եւ յանապատէն՝՝ զօրաւորք ուժով, արք որք հարկանէին պատերազմ, առեալ վահանս եւ աշտեայս, եւ դէմք նոցա իբրեւ զդէմս առիւծու, եւ թեթեւագոյնք ոտիւք իբրեւ զայծեմունս ի վերայ լերանց արագութեամբ։ 9Եզեր՝ իշխան, Աբդիաս՝ երկրորդ, Եղիաբ՝ երրորդ, 10Մասման՝ չորրորդ, Յերեմիաս՝ հինգերորդ, 11Եթթի՝ վեցերորդ, Եղիէլ՝ եւթներորդ, 12Յովնան՝ ութերորդ, Եղզաբաթ՝ իններորդ, 13Յերեմիաս՝ տասներորդ, Մաքաբանա՝ մետասաներորդ։ 14Սոքա յորդւոցն Գադայ իշխանք զօրացն, ի հարեւրսն փոքր, եւ մեծ ի մէջ հազարացն։ 15Սոքա են որք անցին ընդ Յորդանան յամսեանն առաջնում, եւ նա էր լի յամենայն յատակսն իւրում՝՝. եւ հալածեցին զամենայն բնակիչս հովտացն՝ յարեւելից մինչեւ յարեւմուտս։

16Եւ եկին յորդւոցն Բենիամինի եւ Յուդայ յօգնութիւն Դաւթի։ 17Եւ Դաւիթ ել ընդ առաջ նոցա, եւ ասէ ցնոսա. Եթէ խաղաղութեամբ եկիք առ իս, եղիցի սիրտ իմ ընդ ձեզ. ապա թէ մատնել զիս թշնամեաց իմոց եկիք, ոչ ճշմարտութեամբ ձեռին՝՝, տեսցէ Աստուած հարցն մերոց եւ յանդիմանեսցէ։ 18Եւ զօրացոյց Հոգին զԱմեսսա՝ զիշխան երեսնիցն, եւ ասէ. Երթ, Դաւիթ, որդի Յեսսեայ եւ զօրդ քո՝՝, խաղաղութիւն քեզ, եւ խաղաղութիւն օգնականաց քոց. վասն զի օգնեաց քեզ Աստուած քո։ Եւ ընկալաւ զնոսա Դաւիթ, եւ կացոյց զնոսա իշխանս զօրացն։

19Եւ ի Մանասէէ դիմեցին առ Դաւիթ ի գալ այլազգեացն ի վերայ Սաւուղայ ի պատերազմ, եւ ոչ օգնեաց նոցա. վասն զի խորհրդիւ եղեւ զօրագլխացն այլազգեաց, որք ասացին եթէ՝ Գլխովք արանցդ այդոցիկ դառնայ դա առ տէր իւր Սաւուղ։ 20Ի գնալն նորա ի Սիկեղակ՝ դիմեցին առ նա ի Մանասէէ, Եդնա, Յովզաբադ եւ Եղիու եւ Սաղթի, իշխանք հազարացն որք էին Մանասէի. 21եւ նոքա գումարեցան ընդ Դաւթի ի վերայ հինին. վասն զի զօրաւորք էին ուժով, ամենեքեան իշխանք ի վերայ զօրուն. 22քանզի աւուրց յաւուրս գային առ Դաւիթ ի զօրութիւն մեծ իբրեւ զօրութիւն Աստուծոյ։

23Եւ այսոքիկ են անուանք իշխանաց զօրուն, որք եկին առ Դաւիթ ի Քեբրոն, դարձուցանել զթագաւորութիւնն Սաւուղայ առ նա ըստ բանին Աստուծոյ։ 24Որդիք Յուդայ վահանակիրք եւ տիգաւորք, վեց հազար եւ ութ հարեւր զօրաւորք ի պատերազմի։ 25Եւ յորդւոցն Շմաւոնի հզօրք ուժով ի պատերազմել՝ եւթն հազար եւ հարեւր։ 26Յորդւոցն Ղեւեայ՝ չորք հազար եւ վեց հարեւր։ 27Եւ Յուդաս առաջնորդ, եւ՝՝ յորդւոցն Ահարոնի ընդ նմա երեք հազար եւ եւթն հարեւր, 28եւ Սադովկ մանուկ հզօր ուժով ի տանէ հօր իւրոյ, եւ իշխանք քսան եւ երկու։ 29Եւ յորդւոցն Բենիամինի յեղբարցն Սաւուղայ երեք հազար, եւ յոլովք ի նոցանէ էին վերակացուք տանն Սաւուղայ։ 30Եւ յորդւոցն Եփրեմայ՝ քսան հազար եւ ութ հարեւր զօրաւորք ուժով, արք անուանիք ըստ տանց տոհմիցն իւրեանց։ 31Եւ ի կիսոյ ցեղէն Մանասէի՝ ութուտասն հազար, որք անուանեցան յանուանէ թագաւորեցուցանել զԴաւիթ։ 32Եւ յորդւոցն Իսաքարայ որք գիտէին զհանճար, ի ժամանակի ճանաչելով թէ զինչ առնիցեն Իսրայելի, յիշխանութեան իւրեանց՝՝ երկերիւր. եւ ամենեքեան եղբարք իւրեանց ընդ նոսա։ 33Եւ ի Զաբուղոնէ որք ելանէին ի մարտ պատերազմի ամենայն պատերազմական գործեաւ յիսուն հազար, օգնել Դաւթի՝ ոչ ունայնաձեռն՝՝։ 34Եւ ի Նեփթաղիմայ իշխանք հազարք, եւ ընդ նոսա վահանաւորք եւ տիգաւորք երեսուն հազար։ 35Եւ ի Դանայ կարգեալք ի պատերազմ՝ քսան եւ ութ հազար եւ ութ հարեւր։ 36Եւ յԱսերայ որք ելանէին օգնել ի պատերազմի, քառասուն հազար։ 37Եւ յայնմ կողմանէ Յորդանանու, ի յՌուբենէ եւ ի Գադայ եւ ի կիսոյ ցեղէն Մանասէի ամենայն պատերազմական գործեօք՝ հարեւր քսան հազար։ 38Ամենեքեան նոքա արք պատերազմօղք կարգեալք ի մարտ. խաղաղական անձամբ եկին ի Քեբրոն թագաւորեցուցանել զԴաւիթ ի վերայ Իսրայելի. եւ այլ մնացորդքն Իսրայելի իբրեւ զանձն մի՝ թագաւորեցուցանել զԴաւիթ։ 39Եւ էին անդ աւուրս երիս, ուտէին եւ ըմպէին. վասն զի պատրաստեցին նոցա եղբարքն իւրեանց։ 40Եւ սահմանակիցք նոցին, մինչեւ յԻսաքար եւ ի Զաբուղոն եւ ի Նեփթաղիմ բերէին նոցա ուղտուք եւ իշովք եւ ջորւովք եւ եզամբք կերակուրս, ալեւր եւ թուզ եւ չամիչ եւ գինի եւ ձէթ, եւ զուարակս եւ ոչխարս բազումս. վասն զի ուրախութիւն էր յԻսրայելի։