1Եւ տարաւ ի ներքս զտապանակն Աստուծոյ, եւ հաստատեաց զնա ի մէջ խորանին՝ զոր պատրաստեաց նմա Դաւիթ. եւ մատուցին ողջակէզս եւ զփրկութեանցն առաջի Աստուծոյ։ 2Եւ կատարեաց Դաւիթ մատուցանել զողջակէզսն եւ զփրկութեանցն, եւ օրհնեաց զժողովուրդն յանուն Տեառն։ 3Եւ բաշխեաց ամենայն Իսրայելի յառնէ մինչեւ ցկին, ի մարդ՝ հաց մի ի հացարարոցէ. եւ պատառ մի ի կասկարայից։

4Եւ կարգեաց առաջի երեսաց տապանակին կտակարանացն Տեառն, ի Ղեւտացւոցն, պաշտօնեայս երգել ձայնիւ՝՝ եւ խոստովան լինել եւ օրհնել զՏէր Աստուած Իսրայելի. 5ԶԱսափ առաջնորդ, եւ երկրորդ նմա Զաքարիաս, զՅեէլ, զՍամիրամովթ, զՅեքիէլ, զՄատաթիաս, զԵղիաբ, զԲանեա, զԱբդեդովմ եւ զԵիէլ, նուագարանօք տաւղաց եւ քնարաց. եւ Ասափ ծնծղայիւք նուագէր, 6եւ Բանեա եւ Ոզիէլ քահանայք՝ փողովք, հանապազ առաջի տապանակի կտակարանացն Աստուծոյ։

7Եւ յաւուրն յայնմիկ յայնժամ կարգեաց Դաւիթ ի սկզբանն օրհնել զՏէր ի ձեռն Ասափայ եւ եղբարց նորա։

8Երգ։ Խոստովան եղերուք Տեառն եւ կարդացէք զանուն նորա, ծանուցէք ժողովրդոց զգործս նորա։ 9Երգեցէք նմա եւ օրհնեցէք զնա, պատմեցէք ամենեցուն զսքանչելիս նորա զոր արար Տէր՝՝։ 10Օրհնեցէք զանուն սուրբ նորա. ուրախ լիցի սիրտ՝ որ խնդրէ զհաճոյս նորա՝՝։ 11Խնդրեցէք զՏէր եւ հզօրք եղիջիք՝՝, խնդրեցէք զերեսս նորա յամենայն ժամ։ 12Յիշեցէք զսքանչելիս նորա զոր արար, զնշանս եւ զիրաւունս բերանոյ նորա. 13զաւակ Իսրայելի ծառայք նորա, որդիք Յակոբայ ընտրեալք նորա։ 14Նա է Տէր Աստուած մեր, յամենայն երկրի են իրաւունք նորա։ 15Յիշեսցէ յաւիտենից՝՝ զուխտ իւր, զբանն իւր զոր պատուիրեաց ի հազար ազգ, 16զուխտն զոր եդ ընդ Աբրահամու եւ զերդումն իւր ընդ Իսահակայ. 17հաստատեաց զնա Յակոբու ի հրամանս, եւ Իսրայելի ուխտ յաւիտենական. 18ասէ. Քեզ տաց զերկիրն Քանանու, զվիճակ ժառանգութեան ձերոյ։ 19Զի էին նոքա՝՝ սակաւք թուով, եւ նուազք եւ պանդուխտք ի նմա։ 20Գնացին նոքա ազգէ յազգ եւ ի թագաւորութենէ ի ժողովուրդ յայլ։ 21Ոչ թող առն հարստահարել զնոսա, եւ կշտամբեաց վասն նոցա զթագաւորս. 22մի՛ մերձենայք յօծեալսդ իմ, եւ ի մարգարէսդ իմ մի՛ լինիք չար։

23Օրհնեցէք զՏէր, ամենայն երկիր, պատմեցէք օր ըստ օրէ զփրկութիւն նորա։ 24Պատմեցէք ի հեթանոսս զփառս նորա, յամենայն ժողովուրդս զսքանչելիս նորա. 25զի մեծ է Տէր եւ օրհնեալ է յոյժ, ահաւոր է ի վերայ ամենայն աստուածոց։ 26Վասն զի ամենայն աստուածք ազգաց կուռք են, եւ Աստուած զերկինս արար։ 27Փառք եւ գովութիւն առաջի երեսաց նորա, զօրութիւն եւ պարծանք ի տեղւոջ նորա։ 28Տուք Տեառն, տոհմք ազանց, տուք Տեառն փառս եւ զօրութիւն։ 29Տուք Տեառն զփառս անուան նորա. առէք պատարագս եւ մատուցէք առաջի երեսաց նորա, եւ երկիր պագէք Տեառն ի սրահ սրբութեան նորա՝՝։ 30Եւ երկիցէ յերեսաց նորա ամենայն երկիր, յաջողեսցի երկրի՝՝ եւ մի՛ սասանեսցի։ 31Ուրախ եղիցին երկինք եւ ցնծասցէ երկիր. եւ ասասցեն ի հեթանոսս. Տէր թագաւորեաց։ 32Հնչեսցէ ծով լիութեամբն իւրով, փայտք անդաստանի՝՝ եւ ամենայն որ է ի նմա։ 33Յայնժամ ուրախ եղիցին ամենայն ծառք անտառի զի եկն՝՝ դատել զերկիր։ 34Խոստովան եղերուք Տեառն, զի բարի է, զի յաւիտեան է ողորմութիւն նորա։

35Եւ ասացէք. Կեցո զմեզ, Աստուած փրկութեան մերոյ, եւ ապրեցո զմեզ ի թշնամեաց մերոց՝՝. զի օրհնեսցուք զանուն քո սուրբ, եւ պարծեսցուք յօրհնութիւնս քո։ 36Օրհնեալ Տէր Աստուած Իսրայելի յաւիտենից մինչեւ յաւիտեանս. եւ ասասցէ ամենայն ժողովուրն. Ամէն։ Եւ օրհնեցին զՏէր։

37Եւ եթող անդ առաջի տապանակի կտակարանացն Տեառն զԱսափ եւ զեղբարս նորա պաշտել առաջի տապանակին յամենայն ժամ օր ըստ օրէ։ 38Եւ Աբդեդովմ եւ եղբարք նորա վաթսուն եւ ութ. եւ Աբդեդովմ էր որդի Իդիթունայ, եւ Ովսեէ ի դռնապանսն։ 39Եւ զՍադովկ քահանայ եւ զեղբարս նորա զքահանայս առաջի խորանին Տեառն ի Բամա որ ի Գաբաւոն, 40մատուցանել ողջակէզս Տեառն ի վերայ սեղանոյ ողջակիզացն հանապազ առաւօտուց եւ երեկորին. եւ ըստ ամենայնի զոր ինչ գրեալ է յօրէնսն Տեառն զոր պատուիրեաց որդւոցն Իսրայելի ի ձեռն Մովսիսի ծառային Աստուծոյ՝՝։ 41Եւ ընդ նմա Եման եւ Իդիթուն, եւ այլք ընտրեալք յանուանէ, օրհնել զՏէր, զի յաւիտեան է ողորմութիւն նորա. 42եւ ընդ նոսա փողք եւ ծնծղայք, նուագել քնարօք՝՝ երգոցն Աստուծոյ, եւ որդիքն Իդիթունայ ի դրանն։ 43Եւ գնաց ամենայն ժողովուրդն իւրաքանչիւր ոք ի տուն իւր, եւ դարձաւ Դաւիթ օրհնել զիւր տունն։