1Եւ եղեւ յետ այսորիկ եհար Դաւիթ զայլազգիսն, եւ վանեաց զնոսա. եւ առ զԳէթ եւ զգեղս նորա ի ձեռաց այլազգեացն։ 2Եւ եհար զՄովաբ, եւ էին Մովաբացիքն ծառայք Դաւթի բերել ընծայս։ 3Եւ եհար Դաւիթ զԱդրազար արքայ Սուբայ յԵմաթ, յերթալ նորա հաստատել զձեռն իւր ի վերայ գետոյն Եփրատայ։ 4Եւ ա՛ռ Դաւիթ զնորա հազար կառս եւ եւթն հազար ձիոց եւ քսան հազար արանց հետեւակաց. եւ քակեաց Դաւիթ զամենայն զկառսն, եւ եթող ի նոցանէ հարեւր կառս։ 5Եւ եկն Ասորին ի Դամասկոսէ օգնել Ադրազարայ արքայի Սուբայ. եւ եհար Դաւիթ յԱսորեացն քսան եւ երկու հազարս արանց։ 6Եւ եդ Դաւիթ ամրոց յԱսորիս ի Դամասկոսի, եւ էին Դաւթի ծառայք՝ բերել նմա ընծայս. եւ ապրեցոյց Տէր զԴաւիթ յամենայն տեղիս ուր եւ երթայր։ 7Եւ ա՛ռ Դաւիթ զմանեակսն ոսկեղէնս որ էին ի ծառայսն Ադրազարայ, եւ եբեր զայն յԵրուսաղէմ։ 8Եւ ի Մատեբեթայ եւ յընտիր ընտիր քաղաքացն՝՝ Ադրազարու ա՛ռ Դաւիթ պղինձ բազում յոյժ. եւ ի նոցանէ արար Սողոմոն զծովն պղնձի եւ զսիւնսն եւ զկահսն պղնձիս։

9Եւ լուաւ Թովու արքայ Եմաթայ եթէ եհար Դաւիթ զամենայն զօրութիւնսն Ադրազարայ արքայի Սուբայ։ 10Եւ առաքեաց զԱդուրամ զորդի իւր առ արքայ Դաւիթ հարցանել զնմանէ ի խաղաղութիւն, եւ օրհնել զնա. վասն զի պատերազմ տայր ընդ նմա Ադրազար, եւ եհար զնա. քանզի այր թշնամի էր Թովու Ադրազարայ. եւ ամենայն անօթք ոսկեղէնք եւ արծաթեղէնք ի ձեռս նորա։ 11Եւ զայնոսիկ սրբեաց Դաւիթ Տեառն ընդ արծաթոյն եւ ոսկւոյն զոր ա՛ռ յամենայն ազգացն, յԵդովմայ եւ ի Մովաբայ եւ յորդւոցն Ամոնայ եւ յայլազգեացն եւ յԱմաղեկայ։ 12Եւ Աբեսսա որդի Շարուհեայ եհար զԵդովմ ի հովտին Աղովնայ ութուտասն հազար։

13Եւ եդ ի հովտին ամրոց. եւ էին՝՝ Եդովմայեցիք ծառայք Դաւթի. եւ փրկեաց Տէր զԴաւիթ յամենայն տեղիս ուր եւ երթայր։

14Եւ թագաւորեաց Դաւիթ ի վերայ ամենայն Իսրայելի, եւ էր առնել իրաւունս եւ արդարութիւն ամենայն ժողովրդեան իւրում։ 15Եւ Յովաբ որդի Շարուհեայ ի վերայ զօրացն, եւ Յովսափատ որդի Աքիղուդայ՝ յիշատակաց դպիր. 16եւ Սադովկ՝ որդի Աքիտովբայ, եւ Աբիմելէք՝ որդի Աբիաթարայ՝ քահանայք, եւ Սուսա՝ դպրապետ. 17եւ Բանեա որդի Յովիդայայ՝ ի վերայ Քերեթայն եւ Ոփելեթայն. եւ որդիք Դաւթի առաջինք՝ փոխանորդք արքայի։