1Եւ եղեւ յետ այսորիկ մեռաւ Նաաս արքայ որդւոցն Ամոնայ, եւ թագաւորեաց Անան որդի նորա ընդ նորա։ 2Եւ ասէ Դաւիթ. Արասցուք ողորմութիւն ընդ Անանայ որդւոյն Նաասու, որպէս արար հայր նորա ընդ իս ողորմութիւն։ Եւ առաքեաց հրեշտակս Դաւիթ մխիթարել զնա վասն հօր նորա. եւ եկին ծառայքն Դաւթի յերկիր որդւոցն Ամոնայ մխիթարել զնա։ 3Եւ ասեն իշխանքն Ամոնայ ցԱնան. Միթէ փառաւորե՞լ Դաւիթ զհայր քո առաջի քո առաքեաց քեզ զմխիթարիչսդ. ո՞չ ապաքէն զի քննեսցեն զքաղաքս,՝՝ եւ դիտել զերկիրս եկին ծառայքն նորա առ քեզ։ 4Եւ ա՛ռ Անան զծառայսն Դաւթի, եգերծ զնոսա, եւ եհատ զդրօշակսն նոցա զհասարակածն մինչեւ ի վեր՝՝, եւ արձակեաց զնոսա։ 5Եւ եկին պատմել Դաւթի վասն արանցն. առաքեաց ընդ առաջի նոցա, վասն զի էին ամաչեցեալք յոյժ. եւ ասէ արքայ. Նստարուք յԵրիքով մինչեւ աճեսցեն մօրուք ձեր, եւ ապա եկեսջիք։

6Եւ տեսին որդիքն Ամոնայ թէ ամաչեաց զօրն Դաւթայ՝՝, առաքեաց Անան եւ որդիքն Ամոնայ հազար տաղանդ արծաթոյ, եւ ի վարձու կալան իւրեանց յԱսորեաց Միջագետաց եւ յԱսորեաց Մաաքայ եւ Սուբայ՝ կառս եւ հեծեալս։ 7Եւ ի վարձու կալան իւրեանց երեսուն եւ երկու հազարս կառաց, եւ զարքայն Մաաքայ եւ զզօրն նորա, եւ եկին բանակեցան յանդիման Մեդաբայ. եւ որդիքն Ամոնայ ժողովեցան ի քաղաքացն իւրեանց, եւ եկին պատերազմել։

8Լուաւ Դաւիթ, եւ առաքեաց զՅովաբ եւ զգունդ զօրաւորացն։ 9Եւ ելին որդիքն Ամոնայ եւ ճակատեցան ի պատերազմ առ դրան քաղաքին. եւ թագաւորքն եկեալք բանակեցան առանձինն ի դաշտին։ 10Եւ ետես Յովաբ եթէ եղեն դէմ յանդիման պատերազմել ընդ նմա, առաջի երեսաց եւ զկնի, ընտրեաց յամենայն երիտասարդացն Իսրայելի եւ կարգեաց ընդդէմ Ասորւոցն. 11եւ զմնացորդս զօրուն ետ ի ձեռս Աբեսսեայ եղբօր իւրոյ, եւ կարգեաց ընդդէմ որդւոցն Ամոնայ. 12եւ ասէ. Եթէ զօրասցի քան զմեզ Ասորին, լիցիս մեզ ի փրկութիւն. եւ եթէ որդիքն Ամոնայ զօրասցին քան զքեզ, ապրեցուցից զքեզ. 13քաջ լեր, եւ զօրասցուք վասն ժողովրդեան մերում եւ վասն քաղաքաց Աստուծոյ մերոյ, եւ Տէր որ ինչ բարի իցէ յաչս նորա՝ արասցէ։ 14Եւ ճակատեցաւ Յովաբ եւ զօրն որ ընդ նմա ընդդէմ Ասորեացն ի պատերազմին, եւ փախեան ի նմանէ։ 15Եւ որդիքն Ամոնայ տեսին թէ փախեան Ասորիքն, փախեան եւ նոքա յերեսաց Յովաբայ եւ յերեսաց՝՝ Աբեսսեայ եղբօր նորա, եւ մտին ի քաղաքն։ Եւ եկն Յովաբ յԵրուսաղէմ։

16Եւ ետես Ասորին եթէ յաղթեաց նմա Իսրայէլ, առաքեաց հրեշտակս եւ եհան զԱսորեստանեայն յայնմ կողմանէ Գետոյն, եւ զՍովփաք զօրավար զօրացն Ադրազարու առաջի նոցա։ 17Եւ պատմեցին Դաւթի, եւ գումարեաց զամենայն Իսրայէլ, անց ընդ Յորդանան եւ եկն ի վերայ նոցա, եւ ճակատեցաւ ընդդէմ նոցա, եւ կարգեցաւ Դաւիթ ընդդէմ Ասորւոյն, եւ պատերազմէր ընդ նմա։ 18Եւ փախեաւ Ասորին յերեսաց Դաւթայ, եւ կոտորեաց Դաւիթ յԱսորեացն եւթն հազար կառաց եւ քառասուն հազար հետեւակաց, եւ զՍովփաք զօրավար զօրուցն սպան։ 19Եւ տեսին ծառայքն Ադրազարու եթէ անկան առաջի Իսրայելի, եդին ուխտ ընդ Դաւթայ, եւ ծառայեցին նմա. եւ ոչ եւս կամեցաւ Ասորին օգնել որդւոցն Ամոնայ։